ក្ដៅចិត្ត ទ្រាំមិនបាន Zlatan ធ្លាប់បោះមិត្តរួមក្រុមមួយរូប ចូលទៅក្នុងធុងសំរាម

ខ្សែប្រយុទ្ធស៊ុយអែត Zlatan Ibrahimovic ធ្លាប់ទំលាក់អតីតមិត្តរួមក្រុម Gennaro Gattuso ទៅក្នុងធុងសំរាម ក្រោយមានការប្រកែកគ្នា នៅក្នុងបន្ទប់ផ្លាស់សំលៀកបំពាក់ របស់ក្លឹប AC Milan នេះបើតាមការបង្ហើបរបស់ ខ្សែបម្រើ Urby Emanuelson។

នៅក្នុងបទសម្ភាសន៍របស់ Voetbal International ខ្សែបម្រើហូឡង់ Emanuelson បានឆ្លើយនូវសំនួរជាច្រើនទាក់ទងនឹងរឿងផ្ទាល់ខ្លួនដែលធ្លាប់ជួបប្រទះ។ កីឡាករវ័យ៣២ឆ្នាំរូបនេះ ក៏បានលើកឡើងផងដែរ នូវអ្វីដែលអតីតមិត្តរួមក្រុម Thiago Silva បានខ្សឹបប្រាប់អំពី ខ្សែប្រយុទ្ធ Ibrahimovic ថាមានជំលោះជាមួយនឹង Gattuso(ដែលបច្ចុប្បន្នជាអ្នកចាត់ការក្លឹប AC Milan) ហើយក៏បានធ្វើរឿងមិននឹកស្មានដល់មួយ។

Silva បាននិយាយថា ថ្ងៃមួយនោះ កំឡុងពេលហ្វឹកហាត់ Gattuso បានព្យាយាមបង្អាប់ Zlatan ហើយប្រើពាក្យញុះញង់ផ្សេងៗ ប៉ុន្ដែ Zlatan មិនបាននិយាយស្ដីមួយម៉ាត់នោះទេ។ ហើយក្រោយមក នៅក្នុងបន្ទប់ផ្លាស់សំលៀកបំពាក់ គេទាំងពីរនាក់ក៏បានជួបគ្នាម្ដងទៀត ហើយ Zlatan ក៏បានលើក Gattuso បោះទៅក្នុងធុងសំរាម ហើយវាជារឿងដែលគួរអោយអស់សំនើចមួយ៕

ប្រភព៖ talkSPORT

មតិយោបល់