ក្តៅ! Liverpool អាច​នឹង​ត្រូវ​លេង​ត​ទល់ Napoli ដោយ​គ្មាន​វត្តមាន​អ្នក​ចាត់​ការ​ Jurgen Klopp

ជំនួប​ត្រៀម​ប៉ះ​គ្នា​ជុំ​ទី ៦ ទល់​នឹង Napoli នា​ពាក់​កណ្តាល​ខែ​ធ្នូ​ខាង​មុខ​នេះ ក្រុម​ហង្ស​អាច​នឹង​បាត់បង់​វត្តមាន​អ្នក​ចាត់​ការ​នៅ​លើ​ទីលាន​ប្រកួត បន្ទាប់​ពី​លោក Jurgen Klopp បច្ចុប្បន្ន​កំពុង​ប្រឈម​នឹង​ការ​ហាម​មិន​ឲ្យ​ចូលរួម​ ១ ប្រកួត​ពី UEFA ក្រោយ​ផ្ទុះ​មតិ​ប្រតិកម្ម​មិន​សំចៃ​មាត់​លោក​អាជ្ញាកណ្តាល​លោក Szymon Marciniak។

បរាជ័យ​ក្រោម​ថ្វី​ជើង​ក្លឹប PSG កាល​ពី​ថ្ងៃ​ព្រហស្បតិ៍​កន្លង​ទៅ បាន​ធ្វើ​ឲ្យ​អ្នក​ចាត់​ការ​សញ្ជាតិ​អាល្លឺម៉ង់​ផ្ទុះ​កំហឹង​​យ៉ាង​ខ្លាំង​សម្បា រហូត​បន្ទោស​អ្នក​ដើរ​តួ​កាត់​សេចក្តី​លើ​ទីលាន​ថា​មិន​ទាន់​បាន​រៀប​ចំ​ខ្លួន​ហើយ​រួចរាល់​នៅ​ឡើយ។

បញ្ជាក់​ប្រាប់ Viasport លោក​មាន​ប្រសាសន៍​ថា៖ “យើង​ទទួល​បាន​បាល់​ពិន័យ ១១ ម៉ែត្រ តាម​ថា​អាជ្ញាកណ្តាល​មិន​ចង់​ឲ្យ​ផង ខ្ញុំ​គិត​មិន​ចេញ​ទេ​ថា​វា​មាន​រឿង​អ៊ីចឹង​ដោយ​របៀប​ណា មួយ​ទៀត​គឺ​ត្រង់​ការ​ពិន័យ Verratti គួរ​ណា​តែ​លើក​កាត​ក្រហម ខុស​អ្វី​តែ​យើង​រង​កាត​លឿង ៦ លើក ប៊ិះ​តែ​នឹង​កាត​ក្រហម​ម្តងៗ​ហើយ”។

លោក​សង្កត់​ធ្ងន់​ថា៖ “បញ្ជាក់​ទៅ​អាជ្ញាកណ្តាល​គួរ​តែ​រៀប​ចំ​ខ្លួន​ឲ្យ​ស្រួលបួល​សម្រាប់​ប្រកួត​ធំ​បែប​នេះ ហើយ​ឲ្យ​ប្រាកដ​ថា​ទៀងត្រង់ ១០០ ភាគរយ”។

ប្រភព:Metro