ក្រោយចប់ការប្រកួត គ្រូធំ Juventus សរសើរកីឡាករក្រុម Man Utd ម្នាក់មិនដាច់ពីមាត់

គ្រូបង្វឹកក្រុម Juventus លោក Massimiliano Allegri ជឿជាក់ថាកីឡាករ Marouane Fellaini បានធ្វើឱ្យការប្រកួតមួយនេះមានភាពខុសប្លែកទាំងស្រុង និងបានជួយឱ្យក្រុម Manchester United ទទួលជ័យជម្នះដោយលទ្ធផល 2-1 ក្នុងក្របខ័ណ្ឌ Champions League ។

ជាក់ស្តែងខ្សែប្រយុទ្ធសញ្ជាតិបែលហ្ស៊ិករូបនេះបានបង្ហាញទម្រង់យ៉ាងល្អនៅក្នុងការប្រកួតនេះ​ ហើយគ្រូបង្វឹកលោក Allegri  បាននិយាយថា  Fellaini គឺជាឧបសគ្គដ៏ធំសម្រាប់ការប្រកួតនៅក្នុងពូល H នេះ ។

មិនតែប៉ុណ្ណោះលោក Allegri បានប្រាប់សន្និសីទសារព័ត៌មានមួយថា ៖ ” នៅក្នុងការប្រកួតដំបូងពួកគេមិនមានវត្តមានរបស់កីឡាករ Fellaini នោះទេ ហើយយើងបានប្រើអវត្តមានរបស់គាត់ដើម្បីផលប្រយោជន៍របស់យើង ” ។

គ្រូបង្វឹកសញ្ជាតិអីុតាលីរូបនេះបាននិយាយទៀតថា ៖ ” យប់នេះគាត់បានចូលលេង ហើយគាត់អាចគ្រប់គ្រងបាល់ខ្ពស់ៗ បើទោះបីជាពេលខ្លះយើងល្អនៅក្នុងការលេងបាល់នៅលើដីក៏ដោយ ” ៕

គួរបញ្ជាក់ថា Juventus នៅតែឈរនៅលើកំពូលតារាងនៃពូល H ដោយមាន 9 ពិន្ទុ នឹងមានពីរពិន្ទុដាច់ពីក្រុម Man Utd ហើយប្រកួតបន្ទាប់ពួកគេនឹងត្រូវជួបក្រុម Valencia  និង Young Boys  ៕

ប្រភព: Sportskeeda

 

 

 

មតិយោបល់