គ្រូធំក្រុម Hoffenheim ជឿជាក់ថាកីឡាករ Arsenal ម្នាក់ អាចនឹងល្អដូច Messi និង Ronaldo

គ្រូបង្វឹកក្រុម Hoffenheim លោក Julian Nagelsmann ជឿជាក់ថាតារាឆ្នើមវ័យក្មេងរបស់ក្រុមកាំភ្លើងធំ Arsenal  កីឡាករ Reiss Nelson អាចមានសមត្ថភាពគ្រាប់គ្រាន់ដើម្បីអាចឈានដល់កំរិតរបស់កីឡាករ Lionel Messi និង Cristiano Ronaldo នាថ្ងៃខាងមុខ ។

គួរបញ្ជាក់ថា Nelson បានចាកចេញពីទឹកដី Emirates ដើម្បីផ្ទេរមកកាន់ក្លិប Hoffenheim របស់អាឡឺម៉ង់ក្នុងលក្ខណខ្ចីជើងរយៈពេលយូរ បន្ទាប់ពីគេបានចុះហត្ថលេខាលើកិច្ចសន្យារយៈពេលបីឆ្នាំជាមួយនឹងក្រុម Arsenal កាលពីខែសីហា ។

 

ជាក់ស្តែងតារាឆ្នើមវ័យក្មេងរូបនេះបានបង្ហាញពីទម្រង់លេងគួរឱ្យចាប់អារម្មណ៍របស់គេនៅក្នុងក្របខ័ណ្ឌ Bundesliga ដោយស៊ុតបញ្ចូលទីបានចំនួនប្រាំគ្រាប់ក្នុងការបង្ហាញខ្លួនចំនួនប្រាំមួយប្រកួតសម្រាប់ក្រុម Hoffenheim ។

យ៉ាងណាមិញគ្រូបង្វឹកក្រុម Hoffenheim លោក Nagelsmann បានកោតសរសើរដល់កីឡាករវ័យក្មេងរូបនេះ ដោយនិយាយថាគេអាចមានលក្ខណៈល្អដូចទៅនឹងកីឡាករ Cristiano Ronaldo, Lionel Messi ឬ Arjen Robben ។

មិនតែប៉ុណ្ណោះដោយថ្លែងទៅកាន់សារព័រមាន Independent លោក Nagelsmann បាននិយាយថា ៖ ” Nelson មានសមត្ថភាពខ្ពស់ណាស់ក្នុងការអភិវឌ្ឍ  នោះហើយជាមូលហេតុដែលយើងខ្ចីគាត់មក ហើយគាត់ជាកីឡាករដែលមិនគួរឱ្យជឿក្នុងស្ថានភាពមួយទល់នឹងមួយ ” ៕

ប្រភព: Sportskeeda 

 

មតិយោបល់