គ្រូ Chelsea ថាកីឡាករពីររូប មិនទាន់ល្អគ្រប់គ្រាន់ ដើម្បីលេងក្នុងក្រុមរបស់លោកទេ

លោក Maurizio Sarri ដែលជាអ្នកចាត់ការក្លឹប Chelsea គិតថាបច្ចុប្បន្ន ខ្សែបម្រើ Danny Drinkwater និង ខ្សែការពារ Victor Moses មិនទាន់ល្អគ្រប់គ្រាន់ ដើម្បីអាចលេងអោយក្រុមរបស់លោកបាននៅឡើយទេ។

Sarrismo ជាក្បួនលេងដ៏ជាក់លាក់មួយ ដែលមិនមែនកីឡាករគ្រប់រូបអាចសំរបខ្លួនជាមួយនឹងរបៀបលេងនេះ បានគ្រប៉គ្នានោះទេ តួយ៉ាង ដូចជាកីឡាករពីររូបខាងលើជាដើម។

ដូចក្នុងករណីរបស់ Drinkwater វាពិតជាពិបាក ដែលត្រូវប្រជែងជាមួយនឹងកីឡាករឆ្នើមនៅតំបន់បម្រើ ដែលមានដូចជា Mateo Kovacic, Cesc Fabregas, N’Golo Kante, Ross Barkley, Jorginho និង Ruben Loftus-Cheek។ ដូច្នេះហើយបានជា គ្រូបង្វឹកមិនចង់អោយ អតីតកីឡាកររបស់ Leicester City រូបនេះ បង្ហាញសមត្ថភាពសំរាប់ តោខៀវតទៅទៀត។

លោក Sarri បាននិយាយថា៖ “នៅក្នុងស្ថានភាពនេះ Drinkwater សំរាប់ខ្ញុំ គឺមិនសក្ដិសមនៅតំបន់បម្រើ ដែលត្រូវការខ្សែបម្រើតែពីរនាក់នោះទេ។ ខ្ញុំបានប្រាប់គេកាលពីពីរខែមុន នូវអ្វីដែលខ្ញុំបានគិត។”

ដោយឡែកសំរាប់ Moses វិញ តំណែងខ្សែការពារ ដែលបង្ហាញភាពលេចធ្លោក្រោមការដឹកនាំរបស់លោក Antonio Conte ហាក់មិនត្រូវនឹងទម្រង់លេងរបស់លោក Sarri ដូចគ្នា។ អតីតអ្នកចាត់ការក្លឹប Napoli បានបន្ថែមថា៖ “ហើយ Moses សក្ដិសមនឹងលេងតំណែង wing-back ជាងលេងជា ខ្សែប្រយុទ្ធស្លាប ឬ ខ្សែការពារ។ បើក្រលេកមើលការប្រកួតនៅ Premier League ស្ថានភាពពិតជាលំបាក។”

ប្រភព៖ Be Soccer

មតិយោបល់