គ្រូ Real Madrid និយាយលើកទឹកចិត្តក្រុមរបស់ខ្លួន ក្រោយទទួលបានលទ្ធផលមិនសូវល្អ ប៉ុន្មានប្រកួតចុងក្រោយ

អ្នកចាត់ការក្លឹប Real Madrid លោក Julen Lopetegui បាននិយាយនៅក្នុងសន្និសីទកាសែត មុនពេល Real Madrid ត្រូវប៉ះក្រុម Alaves សំរាប់ការប្រកួតក្នុងលីគ LaLiga នៅថ្ងៃសៅរ៍នេះ ដោយលើកឡើងថា មិនមានកង្វល់ពីស្ថានភាពក្នុងក្រុមរបស់លោកឡើយ ហើយបានផ្ដាំផ្ញើទៅអ្នករិះគន់ថា ក្រុមរបស់លោកមានពិន្ទុស្មើជាមួយនឹងក្រុម Barcelona នៅក្នុងតារាងលីគកំពូលអេស្ប៉ាញ។

បើទោះជាទទួលបានលទ្ធផលមិនសូវល្អ សំរាប់ប៉ុន្មានប្រកួតកន្លងទៅ ប៉ុន្ដែអ្នកចាត់ការរូបនេះ ជឿជាក់ថា វាជារឿងសំខាន់ដែលត្រូវទទួលស្គាល់ ការបង្ហាញទម្រង់លេងល្អរបស់ក្រុម ហើយលោកបារម្ភតែទៅលើការប្រកួត នៅចុងសប្ដាហ៍នេះ តែប៉ុណ្ណោះ។

លោកបាននិយាយថា៖ “នេះគឺ Real Madrid អ្វីដែលសំខាន់គឺ អ្វីដែលយើងកំពុងគិត។ យើងដឹងថាបញ្ហានឹងមកដល់ ហើយយើងត្រូវតែរកវិធីជំនះវាអោយបាន។ យើងត្រូវតែផ្ដោតទៅលើភាពវិជ្ជមាន។

“គ្រប់គ្នាតែងតែមាន តំរូវការខ្ពស់ពីយើង ហើយយើងគួរចាត់ទុកវាថាជារឿងធម្មតា។ ការផ្ដោតអារម្មណ៍គឺជារឿងមួយដ៏ត្រឹមត្រូវ។ យើងមានពិន្ទុស្មើក្រុមកំពូលតារាង[Barcelona] ហើយនៅ Champions League យើងដឹងថាយើង នៅតែបន្ដដូចទៅនឹងអ្វីដែលយើងបានធ្វើ កាលប៉ះក្រុម Roma។

“ពិតណាស់ យើងបាត់បង់បីពិន្ទុ ក្នុងការប្រកួតទល់នឹងក្រុម CSKA Moscow ប៉ុន្ដែកាលនោះដោយសារតែយើងគ្មានសំណាង។ ហើយពេលនេះយើងត្រូវផ្ដោត ទៅនឹងការប្រកួតទល់នឹង Alaves ដែលជាក្រុមមិនទាន់បរាជ័យ៦ប្រកួត ហើយលេងនៅពីមុខអ្នកគាំទ្ររបស់ពួកគេ។”

ប្រភព៖ Marca

មតិយោបល់