ដំណឹងល្អ! កីឡាករឆ្នើមពីររូបរបស់ Real Madrid ត្រលប់មកហ្វឹកហាត់បានបណ្ដើរៗហើយ

Real Madrid បានបញ្ចប់ការហ្វឹកហាត់ជាលើកទី៣ សំរាប់សប្ដាហ៍នេះ ដោយគ្មានវត្តមានកីឡាករ ដែលក្រុមជម្រើសជាតិពួកគេកោះហៅ ហើយអ្វីដែលគួអោយចាប់អារម្មណ៍ជាងនេះទៅទៀតនោះគឺ ខ្សែការពារ Marcelo ក៏បានត្រលប់មកចូលរួមហ្វឹកហាត់នឹងគេផងដែរ ហើយរូបគេអាចត្រៀមខ្លួនរួចរាល់ សំរាប់ការបង្ហាញខ្លួនប្រកួតបន្ទាប់ នៅថ្ងៃទី២០ ខែតុលានេះ ទល់នឹងក្រុម Levante។

ដោយឡែកកីឡាករ Dani Carvajal និង Karim Benzema មិនបានហ្វឹកហាត់ជាមួយនឹងមិត្តរួមក្រុមនោះទេ កាលពីថ្ងៃពុធនេះ ដោយពួកគេរង់ចាំរបួសអាចធូរស្បើយសិន។

ខ្សែប្រយុទ្ធឆ្នើម Isco ក៏បានត្រលប់មកចូលរួមហ្វឹកហាត់វិញផងដែរ ដោយរូបគេមានគំរោងត្រលប់មកចូលរួមប្រកួតលើទីលានវិញ ក្នុងជំនួប El Clasico នៅចុងខែតុលានេះ។

នៅក្រោមការបញ្ជារបស់លោក Julen Lopetegui កីឡាករដែលនៅសេសសល់ នៅក្នុងក្រុមឈុតធំបានហ្វឹកហាត់ជុំគ្នាជាមួយនឹងកីឡាករឈុតយុវជនដែលមានដូចជា Kiko Casilla, Luca Zidane, Alvaro Odriozola, Sergio Reguilon, Marcos Llorente, Mariano Diaz និង Lucas Vazquez៕

ប្រភព៖ Marca