ទោះ​ស៊ុត​បាន​ច្រើន​ជាង តែ​បើ​មើល​ស្ថិតិ​មួយ Icardi ធ្វើ​បាន​ល្អ​ជាង Ronaldo

នា​វេលា​ម៉ោង ០២:៣០ នាទី​ព្រឹក​ចូល​ថ្ងៃ​សោរ៍​ក្លឹប Juventus នឹង​បើក​ទ្វារ​កីឡដ្ឋាន​ស្វាគមន៍​ក្លឹប​យក្ស Inter Milan ក្នុង​ជំនួប​ក្របខ័ណ្ឌ Serie A។ ក្នុង​នោះ​មាន​បុគ្គល ២ រូប​ដែល​អ្នក​គាំទ្រ​រង់ចាំ​អុត​មើល​រួម​មាន Cristiano Ronaldo និង Mauro Icardi។

ផ្ទេរ​ចេញ​ពី Real Madrid ក្នុង​តម្លៃ ១១២ លាន​អឺរ៉ូ​ផ្លាស់​មក Turin បុរស​សញ្ជាតិ​ព័រទុយហ្គាល់​បាន​បន្ត​រក​គ្រាប់​បាល់​មិន​ដក​ជើង​ក្នុង​ប៉ុន្មាន​ប្រកួត​ចុង​ក្រោយ ថ្វី​បើ​ដើម​រដូវ​កាល​ហាក់​ជួប​ភាព​រកាំរកូស​បន្តិចបន្តួច​ក្តី។

ទៅ​មើល Icardi ក៏​រក្សា​តំណែង​ល្អ​មួយ​នៅ Top Scorer ក្រោយ​រដូវ​កាល​ចាស់​កាន់​ពាន​អ្នក​ស៊ុត​បាល់​ល្អ​បំផុត​និង​កាល​ពី​ប៉ុន្មាន​ថ្ងៃ​មុន​ឈ្នះ​ពាន​កីឡាករ​ល្អ​បំផុត​ប្រចាំ​ឆ្នាំ​នៅ Serie A អម​ជាមួយ​លោក Max Allegri ជា​អ្នក​ចាត់​ការ​ឆ្នើម។

មើល​តាម​ស្ថិតិ​ពី Opta មាន​ក្លឹប​តែ ៦ ប៉ុណ្ណោះ​ដែល​អាច​បង្កើត​គ្រាប់​បាល់​បាន​ច្រើន​ជាង​ខ្សែ​ប្រយុទ្ធ​អាហ្សង់ទីន​ដោយ​រួម​មាន Sampdoria 13, Napoli 11, Fiorentina 11, Inter 9, Roma 9 និង Verona 9។ ស្ថិតិ​រក​បាន​ ៨ គ្រាប់​ក្នុង​ ១១ ប្រកួត​ជួយ​ឲ្យ Icardi មាន​ស្ថិតិ​បំបែក​គ្រាប់​បាល់​រៀងរាល់ ១០៨ នាទី​ម្តង យក​ឈ្នះ Ronaldo មាន ១០ គ្រាប់​ក្នុង ១៤ ប្រកួត បាន​ត្រឹម​មួយ​គ្រាប់​រៀងរាល់ ១២៥ នាទី។

យ៉ាងណាមិញ​បើ​ស្ទាបស្ទង់​ស្ថិតិ​នេះ​ហាក់​ជា​មិន​រសើប​ខ្លាំង​ប៉ុន្មាន​ទេ ព្រោះ​ម្នាក់ៗ​សុទ្ធ​សឹង​បង្ហាញ​ទម្រង់​លេង​ល្អ​ឲ្យ​ក្លឹប​រៀង​ខ្លួន គ្រាន់​ថា​អ្វី​ដែល​អ្នក​រាល់​គ្នា​ទន្ទឹង​រង់ចាំ តើ Inter Milan អាច​ផ្តល់​បទពិសោធន៍​បរាជ័យ​ជា​លើក​ដំបូង​ប្រចាំ​រដូវ​កាល​ជូន Juve បាន​ដែរ​ឬ​ទេ?

ប្រភព: Sportskeeda

មតិយោបល់