បើសិនជា Hazard ចាកចេញ Chelsea មានជម្រើសកីឡាករ៥រូប ដើម្បីជំនួសតំណែងរូបគេ

អនាគតរបស់ តារាឆ្នើម Eden Hazard នៅ Chelsea មិនទាន់មានភាពប្រាកដប្រជានៅឡើយទេ ថាតើកីឡាករបែលហ្ស៊ិករូបនេះ ព្រមបន្ដកុងត្រាថ្មី ឬ ចាកចេញពីទឹកដី Stamford Bridge។ ហើយបើក្នុងករណី រូបគេចាកចេញពិតមែននោះ មានជម្រើសកីឡាករ៥រូប ដែលអាចជំនួសតំណែង ប្រធានក្រុមជម្រើសជាតិបែលហ្ស៊ិករូបនេះ ក្រោមការដឹកនាំរបស់អ្នកចាត់ការ Maurizio Sarri។

៥. Wilfried Zaha (Crystal Palace)

អតីតខ្សែប្រយុទ្ធរបស់ក្លឹបបិសាចក្រហមរូបនេះ បានដើរតួយ៉ាងសំខាន់ ក្នុងការសង្គ្រោះ ក្រុម Crystal Palace មិនអោយធ្លាក់ទៅលីគលំដាប់ទី២។ Zaha បានអភិវឌ្ឍខ្លួន អោយកាន់តែប្រសើរពីមួយថ្ងៃទៅមួយថ្ងៃ ហើយទម្រង់ប្រយុទ្ធរបស់គេគឺគ្រោះថ្នាក់ មិនខុសពី Hazard នោះទេ បូករួមនិងបច្ចេកទេសផងដែរ។

៤. Callum Hudson-Odoi (Chelsea)

ខ្សែប្រយុទ្ធវ័យ១៨ឆ្នាំរូបនេះ បានបង្ហាញថា រូបគេពិតជាមានសមត្ថភាពខ្ពស់ ប្រសិនបើរូបគេត្រូវបានផ្ដល់ឱកាស។ ទោះបីសមត្ថភាពរបស់គេ មិនទាន់ឈានដល់កំរិត Hazard ក្ដី ប៉ុន្ដែខ្សែប្រយុទ្ធអង់គ្លេសរូបនេះ ប្រឹងប្រែងរៀនសូត្រពីរៀមច្បង ដែលនៅជុំវិញខ្លួន ពិតណាស់រូបគេអាចនឹងក្លាយជាកំពូលកីឡាករមួយរូប។

៣. Gareth Bale (Real Madrid)

Bale ជាកីឡាករម្នាក់ ដែលស្ថិតនៅក្នុងចំនោមកីឡាករកំពូលនៅលើលោក និង ជាកីឡាករគោលដៅដែល Chelsea ចង់បាន។ បើនិយាយពីកំរិតសមត្ថភាព Bale មិនចាញ់ Hazard ប៉ុន្មាននោះទេ ហើយរូបគេជាជម្រើសដ៏សមរម្យមួយ សំរាប់តោខៀវប្រសិនបើ កីឡាករបែលហ្ស៊ិកចាកចេញមែននោះ។

២. Hirving Lozano (PSV Eindhoven)

ខ្សែប្រយុទ្ធម៉ិចស៊ីកូ បានបង្ហាញភាពលេចធ្លោខ្លាំង បន្ទាប់ពីការបង្ហាញសមត្ថភាពក្នុងការប្រកួត World Cup នៅរុស្ស៊ី ហើយសំរាប់រដូវកាលនេះវិញ កីឡាករវ័យ២៣ឆ្នាំរូបនេះ រកគ្រាប់បាល់បាន ១០គ្រាប់ ដោយលេងត្រឹមតែ១០ប្រកួតប៉ុណ្ណោះ។

មិនត្រឹមតែសំរាប់ការប្រកួតក្នុងលីគប៉ុណ្ណោះទេ Lozano ក៏ធ្វើបានល្អនៅក្នុងការប្រកួត Champions League ផងដែរ។ ហើយរូបគេក៏អាចទទួលបានជោគជ័យនៅ Premier League ផងដែរ ប្រសិនបើ Chelsea ចង់បានរូបគេមកចូលរួម។

១. Lorenzo Insigne (Napoli)

ធ្លាប់លេងក្រោមការដឹកនាំរបស់លោក Maurizio Sarri វាគ្មានអ្វីដែលគួរអោយភ្ញាក់ផ្អើលនោះទេ ដែលកីឡាករអ៊ីតាលី ដ៏មានទេពកោសល្យរូបនេះ ព្រមផ្លាស់មកលេងនៅទឹកដី Stamford Bridge នោះ។ Insigne អាចនឹងងាកមកចាប់អារម្មណ៍សំរាប់ការប្រកួត Premier League ខណៈដែលអតីតមិត្តរួមក្រុម Jorginho អាចសំរបខ្លួនបានយ៉ាងល្អនៅទីនោះ៕

ប្រភព៖ talkSPORT

មតិយោបល់