លោក Mourinho ចង់អោយ United ត្រៀមលុយទិញ ខ្សែការពារពីររូប សំរាប់ខែមករាខាងមុខ

លោក Jose Mourinho ចង់អោយ Manchester United បង្ហាញការគាំទ្រ ជាសាធារណៈ មកលើរូបលោក ដោយត្រៀមការចំណាយសំរាប់ការដោះដូរនៅខែមករាខាងមុខនេះ។ អ្នកចាត់ការវ័យ៥៥ឆ្នាំរូបនេះ បានបញ្ជាក់យ៉ាងច្បាស់ថា លោកមិនទាន់បានពង្រឹងតំបន់ការពារ កាលពីការដោះដូររដូវក្ដៅកន្លងទៅនោះទេ។

ហើយបច្ចុប្បន្ននេះ ក្រុមមិនសូវទទួលបានលទ្ធផលល្អសំរាប់រដូវកាលថ្មី លោក Mourinho កំណត់គោលដៅចង់បាន ខ្សែបម្រើកណ្ដាល Milan Skriniar របស់ក្លឹប Inter Milan និង ខ្សែការពារ Alessio Romagnoli របស់ក្លឹប AC Milan ដើម្បីជួសជុលប្រព័ន្ធការពារនៅក្នុងក្រុម នាពេលបច្ចុប្បន្ននេះ។

បើយោងតាមប្រភព ESPN FC បានអោយដឹងថា United បានបញ្ជាក់ជាសំងាត់ថា ក្លឹបមិនទាន់មានគំរោងចែកផ្លូវពីអ្នកចាត់ការសញ្ជាតិព័រទុយហ្គាល់នោះទេ ប៉ុន្ដែលោក Mourinho ចង់អោយក្លឹប បង្ហាញកាយវិការគាំទ្រមកលើរូបលោក។

គួររំលឹកថា អតីតអ្នកចាត់ការក្លឹបតោខៀវរូបនេះ ជានិច្ចកាលតែងតែ លើកឡើងពីបញ្ហាតំបន់ការពារនៅក្នុងក្រុម ដែលបានជួបប្រទះ ដោយកាលពីថ្មីៗនេះ លោកបានបង្ខំចិត្ត ប្ដូរខ្សែការពារ Eric Bailly ចេញ ក្រោយលេងបាន ១៨នាទី កាលពីការប្រកួតនៅទឹកដី Old Trafford កាលពីថ្ងៃសៅរ៍កន្លងទៅ ក្រោយត្រូវ Newcastle នាំមុខពីរគ្រាប់នៅ ១០នាទីដំបូងនៅក្នុងការប្រកួតនោះ។

អនាគតរបស់ Bailly នៅ United ហាក់មានភាពស្រពេចស្រពិល ក្រោយការប្រកួតនោះ ដោយរូបគេត្រូវស្ថិតនៅក្នុងចំនោម កីឡាករ១០រូប ដែលមានគំរោងដើរចេញពីក្លឹប បើសិនជាលោក Mourinho បន្ដដឹកនាំក្រុម។

ហើយបិសាចក្រហមមិនត្រឹមតែចង់បាន ខ្សែការពារ Skriniar និង Romagnoli មកចូលរួមតែពីររូបនោះទេ ខ្សែការពាររបស់ក្រុមជម្រើសជាតិស៊ុតអែត Andreas Granqvist ក៏ស្ថិតនៅក្នុងបញ្ជីកីឡាករដែល ក្រុមរបស់លោក Mourinho ប្រាថ្នាផងដែរ នេះបើតាមការបញ្ជាក់របស់ សាមីខ្លួនផ្ទាល់៕

ប្រភព៖ Daily Mail

មតិយោបល់