ការបោះឆ្នោតពាន Ballon d’Or ត្រូវបានលុបចេញ ក្រោយ Messi ទទួលបានសំលេងច្រើនលើសលប់

ទស្សនាវដ្ដីបារាំង France Football បានលុបចោលនូវការបោះឆ្នោតដោយអ្នកគាំទ្រ សំរាប់ការជ្រើសរើសកីឡាករល្អបំផុតសំរាប់ពាន Ballon d’Or បន្ទាប់ពី តារាឆ្នើម Lionel Messi និង Mohamed Salah ទទួលបានសំលេងយ៉ាងច្រើនលើសលប់។

មានការបោះឆ្នោតសរុប ៧០ម៉ឺនសំលេង ប៉ុន្ដែមានតែកីឡាករពីររូបប៉ុណ្ណោះ ដែលទទួលបានការគាំទ្រ យ៉ាងច្រើនផុសផុល។ ខ្សែប្រយុទ្ធឆ្នើម Salah របស់ក្រុម Liverpool បានបង្ហាញភាពលេចធ្លោខ្លាំងសំរាប់រដូវកាលមុន ដោយរកគ្រាប់បាល់បាន ៤២គ្រាប់ ទាំង Premier League និង Champions League កាលពីរដូវកាលមុន ទទួលបានការបោះឆ្នោត ៥០% បន្ទាប់ពីការបោះឆ្នោតទទួលបាន ២៥ម៉ឺន សំលេង។

ប៉ុន្ដែម្ចាស់ពាន Ballon d’Or ៥សម័យ Messi បាននាំមុខ ខ្សែប្រយុទ្ធអេហ្ស៊ីបវិញ មុនពេលដែលការបោះឆ្នោតនោះ ត្រូវបានលុបចោល។ ទោះបីជាមិនសូវមានភាគរយខ្ពស់ ក្នុងការឈ្នះពាន Ballon d’Or នៅក្នុងឆ្នាំនេះ ប៉ុន្ដែ Lionel Messi ទទួលបាន ៤៨% ក្នុងការបោះឆ្នោត ដែលរៀបចំឡើងដោយ France Football ដែលជាអ្នកគ្រប់គ្រងពានរង្វាន់កីឡាករល្អបំផុត។

ដោយឡែកខ្សែប្រយុទ្ធ Mohamed Salah របស់ Liverpool ឈរនៅលេខ២ ដែលមាន ៣១% ហើយ Cristiano Ronaldo ស្ថិតនៅលេខ៣ ដែលមាន៨% ប៉ុណ្ណោះ។ ចំណែកឯ ខ្សែបម្រើ Luka Modric ដែលគេរំពឹងថាមានសង្ឃឹមខ្ពស់ថា អាចជាម្ចាស់ពាននេះ ទទួលបានការបោះឆ្នោតតែ ២%ប៉ុណ្ណោះ ដែលស្មើទៅនឹង ខ្សែប្រយុទ្ធ Kylian Mbappe និង Neymar របស់ក្លឹប Paris Saint-Germain។

គួររំលឹកថា នៅក្នុងចំនោមកីឡាករដែលនៅក្នុងបញ្ជីបេក្ខភាពទាំង ៣០រូប ដែលត្រូវប្រជែងពាន Ballon d’Or មាន១៤រូបមកពីលីគកំពូលអេស្ប៉ាញ ខណៈដែល នៅ Premier League មាន១១រូប ហើយមានកីឡាករសញ្ជាតិបារាំងដែលជាម្ចាស់ពានបាល់ទាត់ពិភពលោក ៧រូបស្ថិតនៅក្នុងចំនោមនោះផងដែ។

ការលុបចេញនូវការបោះឆ្នោត របស់ France Football បានបង្កអោយអ្នកគាំទ្របាល់ទាត់ជាច្រើន មានការខឹងសម្បារយ៉ាងខ្លាំងផងដែរ៕

ប្រភព៖ Marca