អតីតកីឡាករជើងចាស់លោក Roy Keane បានបង្ហាញការយល់ឃើញ ជុំវិញការប្រកួតដែល Arsenal យកឈ្នះ ១-០ ទៅលើម្ចាស់ដី Old Trafford កាលពីយប់មិញ ដោយលោកជឿថា ចំណូលថ្មី Thomas Partey គឺជាប្រភេទកីឡាករដែលសក្តិសមបំផុតសម្រាប់បិសាចក្រហមក្នុងការចុះហត្ថលេខា។
Partey ផ្ទេរមកចូលរួមនៅ Arsenal ជាមួយតម្លៃខ្លួន ៤៥ លានផោន នៅថ្ងៃចុងក្រោយនៃទីផ្សារដោះដូររដូវក្តៅ ហើយកាលពីយប់មិញគេបង្ហាញទម្រង់លេងយ៉ាងល្អ ដែលជាកីឡាករក្រឡុកទាំងតំបន់លើក្រោមឲ្យក្រុមរបស់ខ្លួន។
ក្រោយចប់ការប្រកួត Keane បាននិយាយប្រាប់ Sky Sports អំពីការលេងរបស់ Partey ថា៖ “ខ្ញុំគិតថាគេអស្ចារ្យណាស់ នៅពេលដែលខ្ញុំកាន់តែមើលគេលេង គឺកាន់តែប្រាថ្នាចង់ឲ្យគេមកក្លាយជាកីឡាករនៅតំណែងបម្រើសម្រាប់ Man Utd ដែរ”។
លោកបន្តទៀតថា៖ “គេរឹងមាំខ្លាំងណាស់ ហើយបើតាមបទពិសោធន៍ខ្ញុំធ្លាប់លេងប៉ះ Arsenal ជាមួយ Patrick Vieira គឺខ្ញុំគិតថាក្មេងនេះមានឱកាសតាមស្មើកម្រិតលេងរបស់ Patrick ធ្លាប់សម្រេចបានហើយ”៕
ប្រភព៖ Metro
អានអត្ថបទបន្ទាប់៖ គ្រប់គ្នាគេពាក់អាវមានប៉ាក់រូបផ្កា ចម្លែកតែ Matic អត់ពាក់ដូចគេ តើដោយសារមូលហេតុអ្វី?
នៅកំឡុងខែវិច្ឆិកាជារៀងរាល់ឆ្នាំ ក្លឹបនៅ Premier League ទាំងអស់នឹងអនុវត្តទំនៀមទម្លាប់មួយដែលបណ្តាកីឡាករមានប៉ាក់រូបផ្កានៅលើអាវរបស់ពួកគេ។ ដោយក្នុងការប្រកួតដ៏ធំរវាង Arsenal និង Man Utd កាលពីយប់មិញ ក៏ដើរតាមសកម្មភាពបែបហ្នឹងដែរ តែសម្រាប់ Nemanja Matic គឺមិនបានអនុវត្តនោះទេ។
ហេតុផលដែលខ្សែបម្រើរបស់ក្លឹប Man Utd មិនអនុវត្តដូចបណ្តាកីឡាករដទៃ ក៏ដោយសារតែគេមិនអាចទទួលយកនូវភាពឈឺចាប់ ដែលធ្លាក់លើប្រទេសជាតិរបស់គេ កំឡុងពេលមានសង្រ្គាមកាលពីជាង ២០ ឆ្នាំមុន។
នោះគឺកើតឡើងនៅឆ្នាំ ១៩៩៩ ក្នុងប្រទេសស៊ែប៊ី នៅពេលដែល Matic ទើបតែមានអាយុ ១២ ឆ្នាំ ហើយក្នុងប្រទេសនិងតំបន់រស់នៅរបស់គេមានមនុស្សស្លាប់និងរងរបួសជាច្រើន ក៏ដោយសារតែការទម្លាក់គ្រាប់បែកក្នុងដំណើរការប្រតិបត្តិការយោធាដែលមានប្រទេសជាច្រើនចូលរួម ហើយរួមទាំងយោធារបស់ចក្រភពអង់គ្លេសផងដែរ។
បែបនេះមានន័យថា យោធាអង់គ្លេសក៏មានចំណែកក្នុងការស្លាប់របស់ប្រជាជននៅឯប្រទេសស៊ែប៊ីនាឆ្នាំនោះដូចគ្នា អ៊ីចឹងហើយទើប Matic មិនអាចពាក់រូបផ្កាលើអាវតំណាងដល់ការគោរពសម្រាប់ក្រុមយោធាដែលធ្លាប់សម្លាប់ជាតិសាសន៍របស់គេបាន៕