រឿងរ៉ាវពាក់ព័ន្ធនឹងការបង្កើតពានរង្វាន់ថ្មី European Super League ឬហៅកាត់ ESL ហាក់មិនទាន់ស្ងប់ស្ងាត់ទៅវិញទេ ដរាបណាមិនទាន់មានការសម្រេចច្បាស់ការថាពាននោះនឹងត្រូវរំ.សាយចោល ឬបែបណា។
មកទល់ពេលនេះមានក្លឹបនៅអង់គ្លេសជាបន្តបន្ទាប់ បានប្រកាសដកខ្លួនចេញពីផែនការណ៍បង្កើតពានថ្មី ESL ហើយដំបូងគេបង្អស់គឺក្លឹបមេឃខៀវ Manchester City។
យ៉ាងណាបែរបង្វែរមកមើលក្លឹបតោខៀវ Chelsea ឯណេះវិញ ក៏ផ្ទុះរឿងគួរឲ្យចាប់អារម្មណ៍មួយដែរ នោះគឺការចូលរួមត.វ៉ារបស់អ្នកគាំទ្រនៅឯមុខកីឡដ្ឋាន មុនការប្រកួតទល់ Brighton។
គេក៏ស្រាប់តែប្រទះឃើញប្រធានផ្នែកបច្ចេកទេសលោក Petr Cech និងជាអតីតអ្នកចាំទីកាន់ឆ្នាំមួយរូបនៅក្លឹប បានចេញមកសម្របសម្រួល ដោយស្រែកប្រាប់ទៅកាន់អ្នកគាំទ្រវិញបែបនេះថា៖ “ចូរទុកពេលឲ្យពួកខ្ញុំដោះស្រាយសិន សូមទុកពេលឲ្យពួកខ្ញុំសិន”។
Petr Cech outside Stamford Bridge. pic.twitter.com/tbatAEEhyo
— FourFourTweet (@FourFourTweet) April 20, 2021
សារទាំងនេះធ្វើឲ្យគេជឿថា Chelsea ក៏ឈរលើឆន្ទៈដូចក្លឹបអង់គ្លេសឯទៀតអ៊ីចឹងដែរ ពោលគឺមិនចូលរួមជាមួយក្លឹបនៅលីគឯទៀត ក្នុងការបង្កើតពានថ្មីនោះឡើយ ហើយប្រហែល ៩០ ភាគរយបើមើលតាមស្ថានភាពបច្ចុប្បន្នគម្រោងបង្កើតពាន ESL នឹងត្រូវបានផ្អាក៕
ប្រភព៖ Metro
អានអត្ថបទបន្ទាប់៖ ដើម្បីយកឈ្នះ ESL សមាគម UEFA ប្រើវិធីនេះ ឥឡូវមានក្លឹប ៦ ហើយដែលត្រលប់មកវិញ
សង្គ្រាមក្នុងវិស័យកីឡាបាល់ទាត់ ដែលកើតឡើងរវាងសមាគមបង្កើតពានរង្វាន់ថ្មី ESL និងសមាគមបាល់ទាត់អឺរ៉ុប UEFA ហាក់កំពុងក្តៅគគុកខ្លាំងនៅប៉ុន្មានថ្ងៃចុងក្រោយនេះ។ ជាលទ្ធផលយើងឃើញថាក្លឹបចំនួន ៦ នៅអង់គ្លេស ក្នុងចំណោមសមាជិកក្រុមទាំង ១២ បានប្រកាសដកឈ្មោះចេញហើយ។
បើសួរថា តើមានមូលហេតុអ្វីដែលក្លឹបទាំងនោះសម្រេចត្រលប់មកចូលរួមជាមួយ UEFA វិញ? នោះវាមានហេតុផលគួបផ្សំច្រើន ដោយមួយអាចមកពីកត្តាអ្នកគាំទ្រធ្វើការត.វ៉ាខ្លាំង និងទីពីរគឺដោយសារ UEFA បានធ្វើកំណែប្រែប្រព័ន្ធលេងថ្មី និងបន្ថែមប្រាក់រង្វាន់ច្រើនជាងមុន។
តាមរបាយការណ៍ពី Bloomberg និង RMC Sport បានចុះផ្សាយថា UEFA នឹងបន្ថែមកញ្ចប់នៃការចំណាយក្នុងព្រឹត្តិការណ៍ប្រកួតរបស់ខ្លួន ពីប្រាក់ ៤,៥ ពាន់លានអឺរ៉ូ ឡើងមកដល់ ៧ លានលានអឺរ៉ូ។ ទំហំនេះបើធៀបនឹងផែនការណ៍នៅពាន ESL គឺចាយត្រឹម ៣,៥ ពាន់លានអឺរ៉ូ ដែលខុសគ្នា ១ ទ្វេជា ២។
គួរបញ្ជាក់ថា រូបមន្តនៃការប្រកួតថ្មីរបស់ UEFA នឹងសម្រេចបើកឲ្យដំណើរការចាប់ពីឆ្នាំ ២០២៤ តទៅ ហើយបើមើលតាមស្ថានភាពបច្ចុប្បន្នក្លឹបធំៗមួយចំនួនទៀតនៅអ៊ីតាលី អាចនឹងបន្តដកខ្លួនចេញពី ESL ហើយត្រលប់មកចូលរួមជាមួយ UEFA តាមគន្លងក្លឹបអង់គ្លេសវិញ។ ក្លឹបដែលពិបាកនឹងសម្រេចបំផុត គឺអាចជាក្លឹប Real Madrid ព្រោះពួកគេមានប្រធានក្លឹបលោក Florentino Perez ជាអ្នកផ្តួចផ្តើមគំនិតដ៏ធំនោះតែម្តង៕
ប្រភព៖ AF