តារាឆ្នើម Kylian Mbappe របស់ក្លិប Paris Saint-Germain ត្រូវបានគេរាយការណ៍ថាបានចាប់ផ្តើមស្វែងរកទិញផ្ទះនៅក្នុងទីក្រុងម៉ាឌ្រីដ ចំពេលមានការចាប់អារម្មណ៍ខ្លាំងពីសំណាក់ក្លិប Real Madrid ។
ជាក់ស្តែងកីឡាករវ័យ ២២ ឆ្នាំរូបនេះ នៅសល់រយ:ពេលត្រឹមតែ ១ ឆ្នាំទៀតប៉ុណ្ណោះ លើកុងត្រាបច្ចុប្បន្នជាមួយក្លិប Ligue1 ខណ:នៅតែមិនទាន់មានការពិភាក្សាណាមួយត្រូវធ្វើឡើងនៅឡើយនោះទេ ជុំវិញការបន្តកិច្ចសន្យាថ្មីបន្ថែមទៀត ។
ហើយយ៉ាងណាមិញ របាយការណ៍ពី Goal ថ្មីៗនេះ បាននិយាយថា Mbappe បានប្រាប់ទៅអ្នកតំណាងរបស់គេ ឲ្យចាប់ផ្តើមស្វែងរកទិញអចលនទ្រព្យទុក នៅឯទីក្រុងម៉ាឌ្រីដ ក្នុងប្រទេសអេស្ប៉ាញ ។
បញ្ជាក់ថាក្រុម PSG គ្រោងនឹងទាមទារថ្លៃឈ្នួលខ្ទង់រយលានផោន ប្រសិនបើខ្សែប្រយុទ្ធឆ្នើមរបស់ពួកគេរូបនេះ ពិតជាសំរេចចិត្តចាកចេញទៅនោះ ។ ស្របបពេល Real Madrid ត្រូវបានគេជឿជាក់ថាជាក្លិបកំពុងនាំមុខគេ ដើម្បីចុះហត្ថលេខាលើ Mbappe ៕
ប្រភព: Sportmole
អានអត្ថបទបន្ទាប់៖ នេះបេក្ខភាពសំខាន់ ៣ រូបដែលអាចនឹងមកជំនួសតំណែងនាយកក្លឹប Ed Woodward
នាយកគ្រប់គ្រងក្លឹប Manchester United លោក Ed Woodward បានប្រកាសកាលពីពេលកន្លងទៅរួចមកហើយថា លោកនឹងដើរចេញពីតំណែងក្រោយចប់ឆ្នាំ ២០២១ ហើយនៅពីក្រោយរឿងរ៉ាវនោះ ពុំមានការបញ្ជាក់ហេតុផលច្បាស់ណាមួយឡើយ។
យ៉ាងណាបើនិយាយពីបេក្ខភាពអ្នកចូលមកកាន់តំណែងបន្ទាប់ គឺឆ្លងកាត់ការជ្រើសរើសដោយក្រុមប្រឹក្សាភិបាលជាន់ខ្ពស់របស់ក្លឹប ហើយមកទល់ពេលនេះយើងមិនទាន់ទទួលបានដំណឹងផ្លូវការ ថាចាត់តាំងនរណាឲ្យឡើងមកកាន់តំណែងបន្ទាប់នៅឡើយ។
បើតាមរបាយការណ៍ពី Manchester Evening News បានចុះផ្សាយថា បេក្ខភាព ៣ រូបដែលមានភាគរយខ្ពស់បំផុត នៅពេលបច្ចុប្បន្ននេះ រួមមានអតីតអ្នកចាំទីជើងចាស់លោក Edwin van der Sar ដែលបច្ចុប្បន្នជាប្រធាននាយកប្រតិបត្តិនៅក្លឹប Ajax ទីពីរគឺលោក Richard Arnold និងទី ៣ គឺលោក Cliff Baty ដែលជានាយកផ្នែកចាត់ការនិងជានាយកផ្នែកហិរញ្ញវត្ថុនៅក្លឹប Man Utd។
គួររំឭកថា Van der Sar ធ្លាប់ពាក់ព័ន្ធនឹងក្លឹបម្ចាស់ដី Old Trafford កំឡុងពេលលោកចាយពេល ៦ ឆ្នាំរួមអាជីពនាមជាកីឡាករ ហើយបទពិសោធន៍ផ្នែកជាអ្នកដឹកនាំ គឺលោកទទួលបន្ទុកនៅក្លឹប Ajax ក្នុងតំណែងជានាយកជាន់ខ្ពស់រយៈពេល ៥ ឆ្នាំមកហើយ៕
ប្រភព៖ Sportsmole