Edinson Cavani បានសាងកំណត់ត្រាប្រវត្តិសាស្ដ្រមួយបន្ទាប់ពីរកគ្រាប់បាល់បាន២ ទាំងពីរជើងក្នុងការប្រកួតសម្រាប់ Manchester United នៅវគ្គពាក់កណ្ដាលផ្ដាច់ព្រ័ត្រ UEFA Europa League ទល់នឹង Roma។
ក្រុមបិសាចក្រហមបានកក់កៅអីឡើងទៅវគ្គផ្ដាច់ព្រ័ត្រទោះបរាជ័យ ៣-២ នៅទឹកដី Olimpico កាលពីយប់ថ្ងៃព្រហស្បតិ៍ក្ដី ដោយកាលពីជើងទី១ក្រុមរបស់លោក Ole Gunnar Solskjaer ទទួលជ័យជម្នះ ៦-២ នៅទឹកដី Old Trafford។
Cavani រកបានពីរគ្រាប់សម្រាប់ Man Utd ទាំងពីរជើងទល់នឹង Roma ដែលធ្វើឱ្យខ្សែប្រយុទ្ធវ័យ៣៤ឆ្នាំ តាមស្មើកំណត់ត្រាមួយនៅក្នុងការប្រកួតពានរង្វាន់អឺរ៉ុប។
ខ្សែប្រយុទ្ធជនជាតិអ៊ុយរូហ្កាយជាកីឡាករដែលរកបានយ៉ាងតិចពីរគ្រាប់ សម្រាប់ការប្រកួតទាំងពីរជើងនៅវគ្គពាក់កណ្ដាលផ្ដាច់ព្រ័ត្រ បន្ទាប់ពី Klaus Allofs ដែលអាចធ្វើបានសម្រាប់ Koln ក្នុងរដូវកាល ១៩៨៥-៨៦ នៅ UEFA Cup ទល់នឹង KSV Waregem។
អានអត្ថបទបន្ទាប់៖ Mourinho ចង់ឲ្យ Roma ចរចាយកអតីតកូនក្រុមស៊ីថ្លៃកប់ពពកមួយរូបពីក្លឹប Man Utd
លោក Jose Mourinho នឹងចូលដឹកនាំក្លឹប AS Roma នាមជាអ្នកចាត់ការដែលជាប់កុងត្រារយៈពេល ៣ ឆ្នាំចាប់ពីរដូវកាលក្រោយតទៅ ហើយនៅទីផ្សារដោះដូរខាងមុខលោកក៏មានសិទ្ធវិភាគនិងផ្តល់យោបល់ឲ្យក្លឹបថាគួរនាំយកកីឡាកររូបណាមកចូលរួមខ្លះដែរ។
តាមរបាយការណ៍ពី TodoFichajes បានចុះផ្សាយ បុរសវ័យ ៥៨ ឆ្នាំ លេចលឺថាចង់ចុះហត្ថលេខាយក David de Gea ដែលជាអតីតកូនក្រុមរបស់ខ្លួននៅក្លឹបបិសាចក្រហម។ អ្នកចាំទីសញ្ជាតិអេស្ប៉ាញជាប់កុងត្រាជាមួយម្ចាស់ដី Old Trafford ដល់ចុងខែមិថុនា ឆ្នាំ ២០២៣ ហើយបច្ចុប្បន្នគេអាចមានតម្លៃផ្ទេរចេញខ្ទង់ ២៥ លានអឺរ៉ូ។
យ៉ាងណាយើងមិនច្បាស់នោះទេថា United ព្រមលក់ចេញ De Gea ឬអត់ ព្រោះក្នុងដៃរបស់ក្លឹបក៏មាន Dean Henderson មួយរូបទៀតដែលអាចឈរជើងជំនួសកីឡាករវ័យ ៣០ ឆ្នាំ។ ប៉ុន្តែ De Gea ទើបតែជួយឲ្យ United យកឈ្នះ Roma ឡើងទៅវគ្គផ្ដាច់ព្រ័ត្រ UEL យប់មិញ បែបនេះបើគេនៅបន្តបង្ហាញទម្រង់លេងល្អតទៅទៀត ក៏ពិបាកនឹងឲ្យក្លឹបអង់គ្លេសកាត់ចិត្ត។
លើកលែងតែករណីមួយដែល United ចង់សម្រួលដល់ការចំណាយ អ៊ីចឹងការផ្ទេរចេញ De Gea ពិតជាអាចកើតឡើង ព្រោះសព្វថ្ងៃគេស៊ីថ្លៃច្រើនជាង ៣០០ ០០០ ផោន/សប្តាហ៍ ដែលច្រើនជាង ១ ទ្វេជា ៣ ធៀបនឹង Henderson៕
ប្រភព៖ Sportsmole