លោក Jose Mourinho នឹងចូលដឹកនាំក្លឹប AS Roma នាមជាអ្នកចាត់ការដែលជាប់កុងត្រារយៈពេល ៣ ឆ្នាំចាប់ពីរដូវកាលក្រោយតទៅ ហើយនៅទីផ្សារដោះដូរខាងមុខលោកក៏មានសិទ្ធវិភាគនិងផ្តល់យោបល់ឲ្យក្លឹបថាគួរនាំយកកីឡាកររូបណាមកចូលរួមខ្លះដែរ។
តាមរបាយការណ៍ពី TodoFichajes បានចុះផ្សាយ បុរសវ័យ ៥៨ ឆ្នាំ លេចលឺថាចង់ចុះហត្ថលេខាយក David de Gea ដែលជាអតីតកូនក្រុមរបស់ខ្លួននៅក្លឹបបិសាចក្រហម។ អ្នកចាំទីសញ្ជាតិអេស្ប៉ាញជាប់កុងត្រាជាមួយម្ចាស់ដី Old Trafford ដល់ចុងខែមិថុនា ឆ្នាំ ២០២៣ ហើយបច្ចុប្បន្នគេអាចមានតម្លៃផ្ទេរចេញខ្ទង់ ២៥ លានអឺរ៉ូ។
យ៉ាងណាយើងមិនច្បាស់នោះទេថា United ព្រមលក់ចេញ De Gea ឬអត់ ព្រោះក្នុងដៃរបស់ក្លឹបក៏មាន Dean Henderson មួយរូបទៀតដែលអាចឈរជើងជំនួសកីឡាករវ័យ ៣០ ឆ្នាំ។ ប៉ុន្តែ De Gea ទើបតែជួយឲ្យ United យកឈ្នះ Roma ឡើងទៅវគ្គផ្ដាច់ព្រ័ត្រ UEL យប់មិញ បែបនេះបើគេនៅបន្តបង្ហាញទម្រង់លេងល្អតទៅទៀត ក៏ពិបាកនឹងឲ្យក្លឹបអង់គ្លេសកាត់ចិត្ត។
លើកលែងតែករណីមួយដែល United ចង់សម្រួលដល់ការចំណាយ អ៊ីចឹងការផ្ទេរចេញ De Gea ពិតជាអាចកើតឡើង ព្រោះសព្វថ្ងៃគេស៊ីថ្លៃច្រើនជាង ៣០០ ០០០ ផោន/សប្តាហ៍ ដែលច្រើនជាង ១ ទ្វេជា ៣ ធៀបនឹង Henderson៕
ប្រភព៖ Sportsmole
អានអត្ថបទបន្ទាប់៖យប់មិញ Ole សរសើរកីឡាករ ២ រូបមិនដាច់ពីមាត់ ក្រោយបានឡើងដល់វគ្គផ្តាច់ព្រ័ត្រ UEL
ក្លឹប Manchester United បានចាញ់នៅជើងទី ២ ក្រោមលទ្ធផល ៣-២ ទល់ Roma តែបូកគ្រាប់បាល់ទាំងពីរជើង ពួកគេនៅតែទទួលបានជ័យជម្នះ ដោយសរុបលទ្ធផលគឺ ៨-៥។
ជាមួយជ័យជម្នះដែលអាចរុញឲ្យ United បន្តទៅវគ្គផ្តាច់ព្រ័ត្រនៅ Europa League សារនេះ លោក Ole Gunnar Solskjaer ជាអ្នកចាត់ការ បានសរសើរដល់កីឡាករ ២ រូប ដែលធ្វើបានល្អបំផុតនៅប្រកួតជើងទី ២ នោះគឺរួមមាន David de Gea និង Edinson Cavani។
គ្រូបង្វឹកសញ្ជាតិន័រវេសនិយាយ៖ “យើងលេងបានល្អច្រើនកាលពីនៅដី Old Trafford ដែលអាចជួយឲ្យយើងបានឡើងមកពេលនេះ តែយប់នេះវិញគឺខ្ញុំរាងខក.ចិត្តបន្តិច ជាពិសេសគឺការលេងរបស់យើងនៅតង់ទីពីរ”។
លោកបន្ត៖ “យើងតាមថាអាចឲ្យពួកគេរកបានដល់លទ្ធផល ៨-៦ បានស្រួល ដោយវាជាប្រកួតដ៏ចម្លែក តែសំណាងយើងនៅតែមានបាល់លេង ហើយក៏មានអ្នកចាំទីល្អបំផុតមួយក្នុងលោក និងខ្សែប្រយុទ្ធកណ្តាលដែលគេវ័យ ៣៤ ឆ្នាំហើយ តែនៅអាចរកបានគ្រាប់បាល់ជាបន្តបន្ទាប់ ចង្វាក់លេងរបស់គេ ការបញ្ចប់ទីរបស់គេ គឺពិតណាស់ថាស្ថិតនៅកម្រិតកំពូល”៕
ប្រភព៖ Metro