ក្រុមរបស់កីឡាករ Cristiano Ronaldo ត្រូវបានគេរាយការណ៍ថាបានទាក់ទងជាមួយក្លិបធំៗដូចជា Manchester United, Paris St-Germain និង Real Madrid ចំពេលមានការសង្ស័យលើអនាគតរបស់ខ្លួន នៅឯ Juventus ។
ជាក់ស្តែងខ្សែប្រយុទ្ធវ័យ ៣៦ ឆ្នាំរូបនេះ នៅសល់រយ:ពេលត្រឹមតែមួយឆ្នាំទៀតប៉ុណ្ណោះលើកិច្ចសន្យាជាមួយក្រុម Juve បច្ចុប្បន្ន ហើយវាត្រូវបានគេជឿជាក់ថាកីឡាករព័រទុយហ្គាល់ កំពុងស្ថិតនៅក្នុងភាពស្រពិចស្រពិលជាមួយកិច្ចចរចារបន្តថ្មីបន្ថែមទៀត ។
តែទោះយ៉ាងណាយោងតាម ESPN អះអាងថាអ្នកតំណាងរបស់ Ronaldo នៅតែទទួលយកការចាប់អារម្មណ៍ពីសំណាក់ក្លឹបកំពូលៗ មួយចំនួននៅអឺរ៉ុប រួមទាំងអតីតក្រុម United និង Madrid ទៀតផង ។
ជាក់ស្តែងប្រធានក្រុមជម្រើសជាតិព័រទុយហ្កាល់រូបនេះ អាចរកបាន ៣៦ គ្រាប់ ក្នុងការបង្ហាញខ្លួន ៤៤ ប្រកួតកាលពីរដូវកាលមុន ប៉ុន្តែទោះជាយ៉ាងណាគេបានអាចជួយ Juve រក្សាតំណែងជើងឯក Serie A បានឡើយ ខណ:គ្រូបង្វឹកលោក Andrea Pirlo ក៏ត្រូវបានបណ្តេញចេញពីតំណែងដែរ ។
ហើយជាលទ្ធផល Ronaldo ត្រូវបានគេយល់ថាកំពុងពិចារណាលើអនាគតរបស់ខ្លួននៅក្នុងទីក្រុង Turin នៅរដូវក្តៅខាងមុខនេះ ដោយលេចលឺថាអ្នកតំណាងរបស់ខ្សែប្រយុទ្ធរូបនេះ កំពុងទាក់ទងជាមួយក្លិប Man United, PSG និង Madrid ជុំវិញការផ្លាស់ប្តូរដ៏មានសក្តានុពលមួយ៕
ប្រភព: Daily Star
អានអត្ថបទបន្ទាប់៖ កីឡាករអង់គ្លេសកាន់កាប់តំណែងកំពូលតារាងកីឡាករថ្លៃបំផុត ខណៈ Mbappe នៅក្រៅ Top 10
ខ្សែបម្រើវ័យក្មេង Phil Foden របស់ក្លិប Manchester City ក្លាយជាកីឡាករដែលមានតម្លៃខ្ពស់បំផុត នេះបើយោងតាមរង្វាយតម្លៃរបស់ CIES Football Observatory។
CIES បានបង្ហាញបញ្ជីតម្លៃកីឡាករបាល់ទាត់ចុងក្រោយបង្អស់ក្នុងចំណោមក្លិបធំៗនៃលីគកំពូលទាំង៥នៅអឺរ៉ុប ខណៈ Foden ដែលទើបឈ្នះពានកីឡាករវ័យក្មេងប្រចាំឆ្នាំរបស់ PFA មានតម្លៃប្រមាណ ១៩០,២លានអឺរ៉ូ។
នៅក្នុងវ័យ២១ឆ្នាំ ខ្សែបម្រើជនជាតិអង់គ្លេសរូបនេះ បានសាងភាពលេចធ្លោសម្រាប់ Man City ដោយជួយពួកគេឈ្នះ Premier League និង League Cup ព្រមទាំងស្ថិតនៅក្នុងជម្រើស១១នាក់ប្រចាំរដូវកាលនៃលីគកំពូលអង់គ្លេសផងដែរ។
គេថែមទាំងរកគ្រាប់បាល់បាន៣គ្រាប់ និង assist ៣លើកនៅ UEFA Champions League ដែលជួយឱ្យក្រុមលោក Pep Guardiola ឈានដល់វគ្គផ្ដាច់ព្រ័ត្រពានអឺរ៉ុបមួយនេះ ប៉ុន្ដែត្រូវខកចិត្តដោយបរាជ័យក្រោមថ្វីជើង Chelsea ដោយលទ្ធផល ១-០។
ដោយឡែកខ្សែប្រយុទ្ធ Mason Greenwood របស់ Manchester United ស្ថិតនៅលេខរៀងទី២ មានតម្លៃ១៧៨លានអឺរ៉ូ តាមពីក្រោយដោយមិត្តរួមក្រុម Marcus Rashford ដែលឈរនៅលេខ៣ មានតម្លៃ១៥៥,៥លានអឺរ៉ូ។
កីឡាករវ័យក្មេងទាំងពីររូបនេះបានរួមចំណែកជួយ Man United ឡើងដល់វគ្គផ្ដាច់ព្រ័ត្រ UEFA Europa League តែត្រូវបរាជ័យ ក្រោមថ្វីជើង Villarreal ដោយការស៊ុតប៉េណាល់ទីកាត់សេចក្ដី។ Rashford ត្រូវបានកោះហៅចូលរួមក្រុមជម្រើសជាតិអង់គ្លេស ត្រៀមប្រកួត EURO ខណៈ Greenwood បានដកខ្លួនពីជម្រើសជាតិ ដោយសារបញ្ហារបួស។
ខ្សែប្រយុទ្ធ Erling Haaland ដែលរកគ្រាប់បាល់បាន៤១គ្រាប់សម្រាប់ Borussia Dortmund គ្រប់ពានរង្វាន់ក្នុងរដូវកាល ២០២០-២១ មានតម្លៃ ១៥៥,៥លានអឺរ៉ូ។ ខ្សែប្រយុទ្ធន័រវែសស្ថិតនៅក្នុងចំណាតថ្នាក់ទី៤ ប៉ុន្ដែគេឈរនៅកំពូលតារាង បើមិនគិតកីឡាករនៅ Premier League។
ដោយឡែកខ្សែបម្រើព័រទុយហ្កាល់ Bruno Fernandes របស់ក្រុមបិសាចក្រហម ទទួលបានចំណាត់ថ្នាក់លេខ៥មានតម្លៃ ១៥៤,៣លានអឺរ៉ូ។
ខ្សែបម្រើ Frankie de Jong(១៣៨,៧លានអឺរ៉ូ) និង Pedri(១៣៣,២លានអឺរ៉ូ) របស់ Barcelona ស្ថិតនៅលេខរៀងទី ៦ និង ទី៧ តាមពីក្រោយដោយ Alphanso Davies(១៣១,៦លានអឺរ៉ូ ) និង Joao Felix(១២៧,៨លានអឺរ៉ូ) ដែលនៅលេខរៀងទី៨ និង ទី៩។
រីឯម្ចាស់ពាន Champions League, Mason Mount របស់ Chelsea ឈរនៅចំណាត់ថ្នាក់លេខ១០ ខណៈ តារាឆ្នើមបារាំង Kylian Mbappe ធ្លាក់មកលេខ១២ មានតម្លៃតែ ១១៨,៣លានអឺរ៉ូប៉ុណ្ណោះ។ ចំណាត់ថ្នាក់ដ៏គួរឱ្យភ្ញាក់ផ្អើលរបស់ Mbappe អាចបណ្ដាលមកពីកត្តាសំខាន់ៗមួយចំនួន ហើយរឿងដែលសំខាន់ជាងគេនោះគឺ គេនៅសល់កិច្ចសន្យាជាមួយក្លិប Paris Saint-Germain តែមួយរដូវកាលទៀតប៉ុណ្ណោះ។
បច្ចុប្បន្នគេកំពុងចូលរួមជាមួយក្រុមជម្រើសជាតិបារាំង ក្នុងការចូលរួមព្រឹត្តិការណ៍ EURO 2020 ដែលនឹងធ្វើឡើងនៅប៉ុន្មានថ្ងៃខាងមុខនេះ ខណៈក្រុមដែលបង្វឹកដោយលោក Didier Deschamps ស្ថិតនៅក្នុងពូល F ដែលជាពូលមរ.ណៈ ជាមួយក្រុមការពារជើងឯកព័រទុយហ្កាល់ ក្រុមជើងឯក World Cup 2014 អាល្លឺម៉ង់ និង ក្រុមហុងគ្រី។
Ederson ជាអ្នកចាំទីថ្លៃជាងគេមានតម្លៃ ៦១,៩លានអឺរ៉ូ ខណៈមិត្តរួមក្រុម Man City, Ruben Diaz ជាខ្សែការពារថ្លៃបំផុត ពោលគឺ ១១៤,៤លានអឺរ៉ូ។
សូមបញ្ជាក់ថា តម្លៃរបស់កីឡាករត្រូវបានគណនាផ្អែកលើ អាយុ ទម្រង់លេង រយៈពេលនៃកុងត្រា តម្លៃសេដ្ឋកិច្ចរបស់ក្លិបដែលពួកគេកំពុងលេង និងកត្តាសំខាន់ៗមួយចំនួនផ្សេងទៀត៕
ប្រភព៖ BBC