ចចាមអារ៉ាមជុំវិញទីផ្សារដោះដូររដូវក្តៅ ដែលថា Man Utd ចង់បានកីឡាករថ្មីនៅតំណែងការពារ ពេលនេះត្រូវបានលោក Fabrizio Romano ជាប្រភពគួរឲ្យទុកចិត្ត បានចេញមុខមកនិយាយហើយ ដោយថាវាគឺជាការពិត។
ប្រភពបានឲ្យដឹងថា ម្ចាស់ដី Old Trafford មើលឃើញនៅចំណូលថ្មី ៣ រូប ដែលនឹងច្បិចយក ១ មកចូលរួមនៅក្លឹបរបស់ខ្លួន ក្នុងនោះរួមមាន Jules Kounde, Pau Torres និង Raphael Varane។
ប្រាប់កាលពីពេលថ្មីៗនេះ Romano ថា៖ “យើងនឹងរង់ចាំមើលថាមានរឿងអ្វីកើតឡើងជាមួយ Kounde ដោយគេក៏ស្ថិតក្នុងបញ្ជីនោះដែរ ហើយក៏មានឈ្មោះរបស់ Pau Torres តែតម្លៃផ្តាច់កុងត្រារបស់គេខ្ពស់ដល់ទៅ ៦៥ លានអឺរ៉ូ”។
លោកបន្ថែមថា៖ “រីឯស្ថានភាពរបស់ Varane ក៏កំពុងវិល.វល់ ដោយមិនទាន់មានការព្រមព្រៀងលើការបន្តកុងត្រាថ្មីនៅ Real Madrid ដែរ អ៊ីចឹងយើងក៏នឹងចាំមើលតើ Ancelotti នឹងចាត់ចែងបែបណា ហើយខាង Manchester United នេះនឹងសម្រេចបែបណាដែរ”។
បញ្ជាក់ថា មានភាគរយច្រើនគឺ Varane ដែលអាចនឹងមកចាប់ដៃគូជាមួយ Maguire នៅតំណែងការពារកណ្តាល នារដូវកាលក្រោយ ព្រោះទី ១) គឺគុណភាពរបស់កីឡាករបារាំងគួបផ្សំកត្តាតម្លៃ ទី ២) គឺ Real មានចិត្តចង់លក់កីឡាករខាងលើដូចគ្នា ព្រោះសុពលភាពកុងត្រារបស់គេត្រូវផុតនៅឆ្នាំក្រោយ ២០២២ ហើយ៕
ប្រភព៖ GiveMeSport
អានអត្ថបទបន្ទាប់៖ គ្រូជម្រើសជាតិអ៊ីតាលី កំណត់គោលដៅដែលរំពឹងថាក្រុមរបស់ខ្លួនអាចទៅដល់ នៅ EURO 2020
លោក Roberto Mancini បានបង្ហាញទំនុកចិត្តក្រុមជម្រើសជាតិអ៊ីតាលីរបស់លោក ដែលបានកំណត់គោលដៅឡើងឱ្យដល់វគ្គពាក់កណ្ដាលផ្ដាច់ព្រ័ត្រ ក្នុងព្រឹត្តិការណ៍ EURO 2020។
ក្រុមអ៊ីតាលីនឹងជួបជាមួយទួកគេសម្រាប់ការប្រកួតបើកឆាកនៅក្នុងព្រឹត្តិការណ៍ប្រកួតពានធំជាងគេរបស់អឺរ៉ុប នៅកីឡដ្ឋាន Olimpico នៅទីក្រុងរ៉ូម ប្រទេសអ៊ីតាលី។
បន្ទាប់ពីរងការខកចិត្តមិនអាចចូលរួមការប្រកួត FIFA World Cup 2018 ជុំចុងក្រោយបាន បើគិតមកទល់នឹងពេលនេះមានរយៈពេល៥ឆ្នាំទៅហើយ។ ទោះយ៉ាងណាក្ដី ក្រុមអ៊ីតាលីទទួលបានលទ្ធផលល្អដោយមិនបរាជ័យ២៧ប្រកួតចុងក្រោយ ហើយពួកគេស្ថិតក្នុងចំណោមក្រុមប្រជែងពានរបស់ EURO 2020។
គ្រូបង្វឹកជម្រើសជាតិអ៊ីតាលី លោក Mancini បាននិយាយថា៖ “ខ្ញុំគិតថាបន្ទាប់ពីគ្រប់យ៉ាងដែលយើងបានឆ្លងកាត់ ពេលនេះជាពេលដែលត្រូវញញឹមជាថ្មី។ នោះនឹងជាគោលដៅរបស់យើងនៅខែក្រោយ យើងចង់ឱ្យអ្នកគាំទ្ររីករាយ”។
“ខ្ញុំគិតថាវាជាពេលវេលាដ៏អស្ចារ្យសម្រាប់គ្រប់គ្នានៅ៩០នាទី យើងនឹងផ្ដល់ឱ្យគ្រប់យ៉ាង។ ការប្រកួតបើកឆាកគឺជាការប្រកួតដ៏លំបាកមួយ លើសរាល់ការប្រកួតបើកឆាកទាំងអស់នៅព្រឹត្តិការណ៍នេះ។ យើងបានធ្វើការជាមួយគ្នា(កីឡាករ)មួយរយៈវែងមកហើយ ហើយរីករាយ និងបន្ដភាពរីករាយ។ ពេលបញ្ចប់ព្រឹត្តិការណ៍ យើងពិតជាពេញចិត្តចំពោះការឈានទៅប្រកួតនៅទីក្រុងឡុងដ៍(វគ្គពាក់កណ្ដាលផ្ដាច់ព្រ័ត្រ)”៕
ប្រភព៖ AS