ក្រុមអ៊ីតាលីមើលស្រាលមិនបានទេនៅ Euro 2020 សារនេះ គឺពួកគេកំពុងធ្វើបានល្អខ្លាំង ពោលតាំងពីវគ្គជម្រុះមកម្ល៉េះ។ តំបន់ប្រយុទ្ធបញ្ចប់ទីក៏ល្អ ហើយតំបន់ការពារក៏ពូកែទប់មិនឲ្យរបូតគ្រាប់បាល់ថែមទៀត។
កាលពីយប់មិញអ៊ីតាលី បំបាក់ទួរគី ដោយលទ្ធផល ៣-០ បន្តការឈ្នះ ដោយមិនរបូតគ្រាប់បាល់ចំនួន ៩ ប្រកួតបណ្តាក់គ្នានៅរយៈពេលចុងក្រោយ។ ក្រោមការដឹកនាំរបស់លោក Roberto Mancini អ៊ីតាលី រកបាន ២៨ គ្រាប់ និងទប់បាល់មិនឲ្យចូលទី ៩ ប្រកួតជាប់ៗគ្នា។
ពួកគេកំពុងស្ថិតក្នុងកំណត់ត្រាទប់បាល់ Clean Sheet បានយូរបំផុត ដែលនឹងតាមស្មើកំណត់ត្រាចាស់ដែលមានអាយុកាល ៣១ ឆ្នាំ នោះគឺចន្លោះខែវិច្ឆិកា ឆ្នាំ ១៩៨៩ ដល់ខែមិថុនា ឆ្នាំ ១៩៩០ ក្រុមអ៊ីតាលីធ្លាប់ទប់បាល់មិនឲ្យចូលទី ១០ ប្រកួតជាប់គ្នា។
កំណត់ត្រានេះអ៊ីតាលីមានឱកាសអាចតាមស្មើនៅពេលប៉ះស្វីស នាថ្ងៃទី ១៧ មិថុនា ហើយក៏អាចនឹងបំបែកបាន ប្រសិនបន្តទប់មិនឲ្យរបូតគ្រាប់បាល់ពេលប៉ះវែលនៅថ្ងៃទី ២០ មិថុនា ដែលជាប្រកួតចុងក្រោយនៅ Euro វគ្គចែកពូល៕
ប្រភព៖ Opta
អានអត្ថបទបន្ទាប់៖ Mourinho ថាបើមើលតាមគន្លងចាស់ Kovacic ប្រាកដជានឹងផ្ទេរទៅក្លឹបនេះបន្ទាប់
អ្នកចាត់ការលោក Jose Mourinho បាននិយាយអំពីអនាគតរបស់ខ្សែបម្រើ Mateo Kovacic ដែលថាមានភាគរយ គេអាចនឹងផ្ទេរទៅចូលរួមនៅក្លឹប Tottenham Hotspur។ ដ្បិតមិនមានចចាមអារ៉ាមពីសារព័ត៌មានណាមួយ ដែលចុះផ្សាយអំពីរឿងនេះ តែបុរសរហស្សនាម “Special One” ព្យាករណ៍តាមគន្លងចាស់ដែលបានកើតឡើងកន្លងមក។
នោះគឺតាំងពីឆ្នាំ ២០១៣ ក្រោយចាកចេញពី Dinamo Zagreb កីឡាករក្រូអាតតែងតែដើរតាមគន្លងរបស់ Mourinho ក្នុងការចាកចេញពីក្លឹបមួយទៅក្លឹបមួយចំនួន ៣ ក្លឹបរួចមកហើយ ប៉ុន្តែមិនធ្លាប់បានស្ថិតក្នុងរដូវកាលតែមួយជាមួយគ្នានោះទេ តួយ៉ាងដូចជាក្លឹប Inter Milan, Real Madrid និង Chelsea។
ប្រាប់ talkSPORT អតីតគ្រូ Spurs និយាយថា៖ “Kovacic ខ្ញុំតែងតែមានអារម្មណ៍ថាគេលេងបានល្អ លើសពីអ្វីដែលអ្នករាល់គ្នាគិត ហើយខ្ញុំពិតជាសោក.ស្តាយព្រោះគេតែងតែឆ្លងកាត់នៅក្លឹបដែលខ្ញុំធ្លាប់បង្វឹកនៅទីនោះ តែមិនធ្លាប់ស្ថិតក្នុងសម័យកាលជាមួយខ្ញុំម្តងណាឡើយ”។
លោកបន្តថា៖ “គេធ្លាប់លេងឲ្យ Real Madrid ក៏មិនមែនជាមួយខ្ញុំ កាលលេងឲ្យ Chelsea ក៏មិនមែនជាមួយខ្ញុំ ហើយកាលនៅ Inter នោះ ក៏នៅតែមិនមែនជាមួយខ្ញុំ អ៊ីចឹងខ្ញុំកាន់តែស្រលាញ់គេការដែលគេឆ្លងកាត់ពីក្លឹបមួយទៅក្លឹបមួយដូចជាខ្ញុំ ហើយទៅថ្ងៃខាងមុខប្រហែលជាគេទៅលេងឲ្យ Tottenham ដែរហើយ ពោលអាចជារដូវកាលក្រោយ តែក៏មិនស្ថិតក្រោមការដឹកនាំរបស់ខ្ញុំដូចគ្នា”៕
ប្រភព៖ Metro