តាមការបកស្រាយរបស់អ្នកសារព័ត៌មាន Duncan Castles បានឲ្យដឹងថា ក្លឹប Tottenham Hotspur គឺបានចរចាត្រូវរ៉ូវរួចអស់ហើយជាមួយភាគីក្លឹប Sevilla លើការនាំយក Julen Lopetegui មកដឹកនាំក្លឹបអង់គ្លេស ជំនួសការចាកចេញរបស់លោក Jose Mourinho កាលពីខែមុន។
យ៉ាងណាចុងក្រោយគ្រប់យ៉ាងបែរជាមិនអាចសម្រេចទៅបាន ក្រោមមូលហេតុបញ្ហារឿងគ្រួសារ និងបញ្ហាមួយចំនួនផ្សេងទៀត ដដែលនាំឲ្យ Tottenham ងាកទៅចាប់អារម្មណ៍លើអតីតគ្រូនៅ Roma គឺ Paulo Fonseca វិញ។
តាមការបញ្ជាក់ប្រាប់ពី Castles និយាយ៖ “ពួកគេ [Spurs] បានចរចាជាមួយគ្រូ Julien Lopetegui ដោយបានព្រមព្រៀងជាមួយ Sevilla ហើយថាបញ្ចប់កុងត្រារបស់លោកមុនកាលកំណត់នៅទំហំប្រាក់ ៤ លានផោន ដែលនេះព្រមព្រៀងរួចអស់ហើយ តែក្រោយមកបញ្ហាបុគ្គលដែលទាក់ទងគ្រួសារគាត់ ពោលគឺការបម្លាស់ទីលំនៅ ក៏នាំឲ្យកិច្ចព្រមព្រៀងនោះត្រូវបានលុបចោលវិញ ហើយ Tottenham ក៏ងាកទៅចាប់អារម្មណ៍លើ Fonseca”។
គួរបញ្ជាក់ថា បើ Spurs យក Lopetegui បានប្រហែលជាល្អ ព្រោះបុរសម្នាក់នេះក៏រាប់បានថាមានបទពិសោធន៍ជោកជាំ ធ្លាប់ជួយឲ្យ Sevilla ឈ្នះពាននៅ Europa League ហើយនៅរដូវកាល ២០២០/២១ នេះសោតក្រុមក៏ឈរចំណាត់ថ្នាក់ល្អថែមទៀត រីឯអតីតកាលក៏ធ្លាប់ដឹកនាំក្លឹបយក្ស Real Madrid ផងដែរ៕
ប្រភព៖ Sportsmole
អានអត្ថបទបន្ទាប់៖ Sterling ស៊ុតចូលទីមែនតែ Mourinho ថាម្នាក់នេះទៅវិញទេដែលជាកីឡាករអង់គ្លេសល្អបំផុតក្នុងការប្រកួត
លោក Jose Mourinho បានកោតសរសើរការលេងរបស់ក្រុមជម្រើសជាតិអង់គ្លេស ក្នុងការប្រកួត EURO 2020 ដោយបានយកឈ្នះក្រូអាតដោយលទ្ធផល ១-០ នៅក្នុងវគ្គចែកពូលកាលពីថ្ងៃអាទិត្យនេះ។
Raheem Sterling រកគ្រាប់បាល់ជ័យជម្នះតែមួយគ្រាប់គត់ជួយឱ្យក្រុមតោកំណាចអង់គ្លេស ទទួលបាន៣ពិន្ទុសម្រាប់ការប្រកួតបើកឆាកនៅកីឡដ្ឋានជាតិ Wembley។
គ្រាប់បាល់ដែលខ្សែប្រយុទ្ធរបស់ក្លិប Manchester City រកបានគឺជាការបញ្ជូនយ៉ាងល្អពី Kalvin Phillips ដែលបានបង្ហាញភាពលេចធ្លោខ្លាំងនៅក្នុងការប្រកួតនេះ ហើយគេទទួលបានការសរសើរពីអតីតអ្នកចាត់ការ Manchester United និង Chelsea ផងដែរ។
នៅពេលដែលឱ្យជ្រើសរើសកីឡាករអង់គ្លេស ល្អបំផុតប្រចាំការប្រកួត លោក Mourinho បាននិយាយថា៖ “ខ្ញុំត្រូវតែជ្រើសយក Kalvin Phillips”។
អ្នកចាត់ការថ្មីរបស់ Roma បាននិយាយសរសើរសមត្ថភាពរបស់ Phillips ក្នុងការសហការជាមួយ Declan Rice នៅតំបន់កណ្ដាល និងការដាក់សម្ពាធលើគូប្រកួត ជាពិសេសតែឆក់ឱកាសផ្ដាច់បាល់ Luka Modric និង Mateo Covacic របស់ក្រុមក្រូអាតផងដែរ៕
ប្រភព៖ talkSPORT