ក្រុមបិសាចក្រហម Manchester United បានបង្ហាញពីបំណងក្នុងការចុះហត្ថលេខាជាមួយកីឡាករ Leon Goretzka ដោយឥតគិតថ្លៃ បន្ទាប់ពីពួកគេសង្ឃឹមថាខ្សែបម្រើរូបបនេះ នឹងយល់ព្រមដើរចេញពីក្លឹប Bayern Munich នៅពេលកុងត្រាបច្ចុប្បន្នរបស់គេត្រូវអស់សុពលភាព នៅចុងបញ្ចប់រដូវកាលឆ្នាំ ២០២១/២២ ខាងមុខ ។
ជាក់ស្តែងកីឡាករអាឡឺម៉ង់រូបនេះ កំពុងឈានចូលដល់ឆ្នាំចុងក្រោយហើយ នៃកិច្ចសន្យាបច្ចុប្បន្នរបស់គេនៅឯទឹកដី Allianz Arena ហើយនៅពេលជាមួយគ្នានោះ ក្រុម Man United ត្រូវបានគេរាយការណ៍ថាកំពុងធ្វើតាមដានយ៉ាងយកចិត្តទុកដាក់ចំពោះស្ថានភាពរបស់ Goretzka ខណ:ការពិភាក្សារវាងកីឡាកររូបនេះ ជាមួយក្លិប Bayern ជុំវិញការបន្តកុងត្រាថ្មីមួយផ្សេងទៀត នៅមិនទាន់បានធ្វើឡើងនៅឡើយនោះទេ ។
រំលឹកថា Goretzka បានចូលរួមជាមួយក្លិបយក្សនៅក្របខណ្ឌ Bundesliga ក្នុងការផ្ទេរមួយដោយឥតគិតថ្លៃពីក្រុម Schalke កាលពីឆ្នាំ ២០១៨ ដែលនោះមានន័យថាក្រុមយក្សនៅអាល្លឺម៉ង់ ក៏ប្រហែលជាមិនស្ទាក់ស្ទើក្នុងការអនុញ្ញាតឲ្យគេចាកចេញដោយគ្មានតម្លៃខ្លួនផងដែរ នៅពេលកុងត្រារបស់គេត្រូវអស់សុពលភាពនៅចុងរដូវកាលក្រោយនេះ ។
យ៉ាងណាមិញ គ្រូបង្វឹកលោក Ole Gunnar Solskjaer ត្រូវបានគេដឹងយ៉ាងច្បាស់ថាគាត់មានបំណងចង់ពង្រឹងតំបន់បម្រើក្នុងក្រុមបន្ថែមទៀត ជាពិសេសនៅពេលកីឡាករ Paul Pogba កំពុងតែមានអនាគតមិនច្បាស់លាស់ ដោយសារតែកិច្ចសន្យារបស់គេ ក៏នឹងត្រូវផុតកំណត់នៅរដូវក្តៅឆ្នាំក្រោយនេះផងដែរ ៕
ប្រភព: Metro
អានអត្ថបទបន្ទាប់៖ ក្រោយមកដល់ Alaba បង្ហើបប្រាប់ពីឈ្មោះកីឡាករ R.Madrid ម្នាក់ ដែលគេចង់ចាប់ដៃគូលេងជាមួយជាងគេ
David Alaba បានបង្ហើបថាឲ្យដឹងថាគេពិតជាចង់លេងជាមួយខ្សែការពារកណ្តាលកីឡាករ Raphael Varane ខ្លាំងណាស់ បន្ទាប់ពីបានបញ្ចប់ការផ្ទេរមកកាន់ក្លិប Real Madrid ជាផ្លូវការក្នុងពេលថ្មីៗនេះ ។
ជាក់ស្តែង Alaba ត្រូវបានបង្ហាញខ្លួនជាផ្លូវការនៅឯទឹកដី Santiago Bernabeu នៅថ្ងៃពុធនេះ បន្ទាប់ពីបានចុះហត្ថលេខាជាមួយក្រុម Los Blancos សម្រាប់ការផ្ទេរមួយ ដោយគ្មានតម្លៃខ្លួន ក្រោយពីកុងត្រារបស់គេជាមួយក្រុម Bayern Munich ត្រូវផុតសុពលភាព ។
ហើយយ៉ាងណាមិញខ្សែការពារសញ្ជាតិអូទ្រីស ដែលបានចុះកុងត្រា ៥ ឆ្នាំជាមួយ Madrid ឥឡូវនេះគេសង្ឃឹមថានឹងអាចមានឱកាសចាំដៃគូលេងជាមួយកីឡាករ Varane នៅក្នុងតំបន់ការពាររបស់ក្រុម រដូវកាលក្រោយ ។
មិនតែប៉ុណ្ណោះ ក្នុងអំឡុងពេលបង្ហាញខ្លួនជាផ្លូវការ Alaba បាននិយាយថា ៖ “ ជាការពិតខ្ញុំពិតជាចង់លេងជាមួយ Varane ។ អស់រយៈពេលជាច្រើនឆ្នាំមកហើយដែលគាត់តែងបង្ហាញទម្រង់លេងដ៏ល្អ ហើយមិនមែនទើបតែពេលឥឡូវនេះនោះទេ។ គាត់គឺជាខ្សែការពារដ៏អស្ចារ្យ និងមានគុណភាពខ្ពស់ម្នាក់ ” ។
ប៉ុន្តែទោះជាយ៉ាងណាក៏ដោយអនាគតរបស់ Varane ជាមួយក្លិបយក្សអេស្ប៉ាញ ហាក់មិនមានភាពច្បាស់លាស់នោះទេ ស្របពេលគេត្រូវបានភ្ចាប់ទំនាក់ទំនងយ៉ាងខ្លាំង ជាមួយនឹងការផ្ទេរទៅកាន់ក្លិប Man United នៅក្នុងរយ:ពេលប៉ុន្មានសប្តាហ៍ថ្មីៗនេះ ៕
ប្រភព: Goal