កីឡាករ Giorgio Chiellini ត្រូវបានគេគាំទ្រថានឹងក្លាយជាបេក្ខភាពដ៏សំខាន់បំផុតម្នាក់ ដើម្បីចូលរួមប្រជែងពានរង្វាន់ Ballon d’Or នៅឆ្នាំនេះ រួមជាមួយមិត្តរួមក្រុមជម្រើសជាតិអ៊ីតាលីកីឡាករ Jorginho និងខ្សែប្រយុទ្ធ Lionel Messi ដែរ ។
ជាក់ស្តែងនេះបើយោងតាមអ្វីដែលអ្នកចាត់ការក្រុម Shakhtar Donetsk លោក Roberto De Zerbi លើកឡើង ដោយគាត់ជឿជាក់ថាទម្រង់លេងដ៏ល្អរបស់ Chiellini អំឡុងការប្រកួតពានរង្វាន់ Euro ២០២០ កន្លងទៅ អាចនឹងធ្វើឲ្យគេមានសិទ្ធចូលរួមប្រជែងពានបុគ្គលដ៏ធំនេះផងដែរ ។
រំលឹកថា Chiellini ត្រូវបានទទួលការកោតសរសើរយ៉ាងខ្លាំងពីសំណាក់អ្នកគាំទ្រ ដោយសារតែលោកបានបង្ហាញភាពជាដៃគូយ៉ាងល្អជាមួយកីលាករ Leonardo Bonucci នៅក្នុងតំបន់ការពារកណ្តាលរបស់ក្រុមជម្រើសជាតិអ៊ីតាលី ខណ:ថែមទាំងបានជួយក្រុមរបស់លោក Roberto Mancini លើកពាន ក្រោយយកឈ្នះលើអង់គ្លេសទៀតផង ។
ហើយមិនតែប៉ុណ្ណោះនៅពេលគេសាកសួរអំពីបេក្ខភាព ដែលមានភាគរយច្រើននៅក្នុងការឈ្នះបានរង្វាន់បុគ្គលដ៏អស្ចារ្យនេះ លោក De Zerbi បាននិយាយប្រាប់ Gazzetta dello Sport ថា ៖ ” ប្រសិនបើអ្នកក្រឡេកមើលពីការឈ្នះពានរង្វាន់ Jorginho ស័ក្តិសមឈ្នះវា គាត់គួរតែទទួលបាន Ballon d’Or ។ គាត់គឺជាកីឡាករសំខាន់ម្នាក់របស់អ៊ីតាលី រួមជាមួយ Gigio Donnarumma, Leo Bonucci និង Giorgio Chiellini ” ។
លោកបន្តទៀតថា ៖ “ តែទោះយ៉ាងណា Messi នៅតែជា Messi ហើយដរាបណាគាត់នៅលេងបាល់ នោះគាត់នឹងស្ថិតក្នុងចំណោមបេក្ខភាពប្រជែងពាននេះដែរ ។ យើងធ្លាប់ដឹងហើយថាអតីតខ្សែការពារ Fabio Cannavaro ធ្លាប់បានឈ្នះពានរង្វាន់ Ballon d’Or ដូច្នេះវាគ្មានហេតុផលអ្វី ដែល Chiellini មិនអាចឈ្នះវាបាននោះទេ បើយើងក្រឡេកមើលពីភាពអស្ចារ្យរបស់គាត់ នៅក្នុងពាន Euro កន្លងទៅ ” ៕
ប្រភព: Sportbible
អានអត្ថបទបន្ទាប់៖ ក្រុមមួយនៅអាស៊ីហាលអាវមុនគេ ក្នុងវិញ្ញាសាបាល់ទាត់បុរសនៅតូក្យូអូឡាំពិក
ក្រុមបាល់ទាត់ជម្រើសជាតិអាល្លឺម៉ង់ យកបាន៣ពិន្ទុពីអារ៉ាប៊ីសាអ៊ូឌីត ៣-២ ទោះនៅសល់តែកីឡាករ១០រូបលើទីលាន ក្នុងការប្រកួតវគ្គចែកពូលតូក្យូអូឡាំពិក កាលពីថ្ងៃអាទិត្យកន្លងទៅនេះ។
កីឡាករ Nadiem Amiri ជាអ្នករកគ្រាប់បាល់បើកឆាកនាំមុខសម្រាប់អាល្លឺម៉ង់ ប៉ុន្ដែត្រូវបានខ្សែបម្រើ Sami Al-Najei រកគ្រាប់បាល់តាមស្មើជូនអារ៉ាប៊ី សាអូឌីត។
ខ្សែបម្រើ Ragnar Ache បានរកគ្រាប់បាល់នាំមុខជាថ្មីសម្រាប់អាល្លឺម៉ង់ នៅចុងតង់ទី១ ប៉ុន្ដែត្រូវបាន Al-Najei តាមស្មើជាថ្មី។ កីឡាករ Amos Pieper ត្រូវបានបណ្ដេញចេញពីទីលាន ក្រោយបង្កកំហុសលើ Al-Najei នៅនាទីទី៦៧។
ទោះយ៉ាងណាក្ដី អាល្លឺម៉ង់នៅតែមានឱកាសរកបាន៣ពិន្ទុពីការប្រកួតនោះ នៅពេលដែល Felix Uduokai តែតបញ្ចូលទីគ្រាប់បាល់ជ័យជម្នះ ពីការបញ្ជូនបាល់ជ្រុងដោយខ្សែប្រយុទ្ធ Max Kruse។
អារ៉ាប៊ីសាអូឌីត ត្រូវហាលអាវត្រឹមវគ្គចែកពូលនៃព្រឹត្តិការណ៍តូក្យូអូឡាំពិកជាផ្លូវការ ទោះនៅសល់មួយប្រកួតក៏ដោយ បន្ទាប់ពីបរាជ័យពីរប្រកួត ក្រោមថ្វីជើងអាល្លឺម៉ង់ និងកូឌីវ័រ ហើយប្រកួតចុងក្រោយពួកគេត្រូវប៉ះប្រេស៊ីល៕