តើអ្នកគិតថា ការផ្ទេរចេញកីឡាករនៃក្លឹបណាខ្លះ ដែលបាននាំផលចំណេញខ្ពស់បំផុតក្នុងប្រវត្តិសាស្រ្តបាល់ទាត់? យើងសង្កេតឃើញល្បាក់ ៤-៥ ឆ្នាំចុងក្រោយ បណ្តាក្លឹបធំៗនៅអឺរ៉ុប ហាក់ចាយលុយរយលានទាំងមិនស្ទាក់ស្ទើរ លើការនាំយកកីឡាករដែលពួកគេចង់បាន ហើយខ្លះក៏អាចមកបង្កើតផ្លែផ្កាជោគជ័យ ខ្លះក៏ធ្លាក់គុណភាពជាងមុនក៏មាន។
យ៉ាងណាក្នុងអត្ថបទនេះ CamboTrends សូមលើកមកបង្ហាញពីការផ្ទេរដែលអាចនាំផលចំណេញខ្ពស់បំផុត សម្រាប់ក្លឹបអាណាព្យាបាលហើយមាន ២ រូបនៅក្របខ័ណ្ឌអង់គ្លេស Premier League៖
៥) Jack Grealish
ជាការចំណេញលើគោកសម្រាប់ Aston Villa ព្រោះអី Grealish គឺជាយុវជនថ្នាល ដែលក្លឹបបានចាយពេលបណ្ដុះបណ្ដាល មុនផ្ទេរមកឈុតធំស៊ីតែប្រាក់ពលកម្មប៉ុណ្ណោះ។ ដូច្នេះមានន័យថា Villa មិនបានចាយសូម្បីតែមួយសេន្តលើការផ្ទេរចូល Grealish ហើយអាចលក់ចេញទៅវិញឲ្យ Man City នៅតម្លៃបំបែកកំណត់ត្រានាមកីឡាករអង់គ្លេស មានតម្លៃថ្លៃបំផុតដល់ទៅ ១១៧,៥ លានអឺរ៉ូ។
កញ្ចប់លុយធំដែល Villa ទទួលបានកាលនោះ ពួកគេបង្វែរទៅជាការនាំចូលកីឡាករសំខាន់មួយចំនួនមកពង្រឹងក្រុម តួយ៉ាងគឺ Leon Bailey, Danny Ings និង Emiliano Buendia។
៤) Philippe Coutinho
កីឡាករប្រេស៊ីលត្រូវបាន Liverpool ចាយលុយ ១៣ លានអឺរ៉ូ ថ្ពក់ចេញពី Inter Milan នៅឆ្នាំ ២០១៣។ រហូតមកទល់ឆ្នាំ ២០១៨ ក្លឹប Barcelona ក៏បានចរចាទិញយកគេចេញពី Anfield នៅតម្លៃគុណ ១ ជា ១០ គឺឡើងដល់ ១៣៥ លានអឺរ៉ូ។
ដូច្នេះមានន័យថា សម្រាប់ Coutinho គឺអាចនាំផលចំណេញ ១២២ លានអឺរ៉ូមកឲ្យ Liverpool។ យ៉ាងណាការផ្ទេររបស់ខ្សែបម្រើវ័យ ២៩ ឆ្នាំទៅ Camp Nou គេមិនបានបង្កើតផ្លែផ្កាជាដុំកំភួនអ្វីនោះទេ ពោលគឺអាចរាប់បានជាការខាត.បង់ដ៏ធំមួយសម្រាប់អ្នកមានបុណ្យទៅវិញ។
៣) Joao Felix
អតីតកាលជាប់ឈ្មោះជា ‘Ronaldo ទីពីរ’ ដែលគេបានបង្ហាញទម្រង់លេងយ៉ាងល្អ ឲ្យក្លឹបព័រទុយហ្គាល់ Benfica។ ឡើងមកលេងឲ្យឈុតធំបានតែមួយឆ្នាំ Felix ត្រូវបាន Atletico Madrid ចរចាទិញយកនៅតម្លៃ ១២៧,២ លានអឺរ៉ូ ដែលនេះជាលុយចំណេញទាំងដុ.លសម្រាប់ក្លឹបអាណាព្យាបាល។
ដ្បិតគេជាអតីតយុវជននៅថ្នាល FC Porto តែគ្រា Benfica ចរចាយកបាននៅឆ្នាំ ២០១៥ គឺជាការផ្ទេរឥតតម្លៃខ្លួន ហើយមកឆ្លងកាត់ការអភិវឌ្ឍតាំងពីថ្នាល U17 ដល់ U19 និងឈុត B មុនយុវជនវ័យ ២១ ឆ្នាំ ប្រែក្លាយជាគ្រាប់ពេជ្រដ៏ភ្លឺចិញ្ចាចមួយនៅអឺរ៉ុប។
២) Neymar Jr
បន្ទាប់ពីឃើញគុណភាពដ៏លេចធ្លោរបស់ Neymar គ្រាលេងឲ្យក្លឹប Santos នៅប្រទេសកំណើតប្រេស៊ីល ក៏នាំឲ្យ Barcelona ទ.ប់ចិត្តមិនជាប់ ហើយចាយលុយ ៨៨,២ លានអឺរ៉ូ ចរចាយកគេមកចូលរួមនៅទឹកដីអេស្ប៉ាញកាលពីឆ្នាំ ២០១៣។
រយៈពេល ៤ ឆ្នាំជាមួយ Barcelona សម្រាប់ខ្សែប្រយុទ្ធស្លាប Neymar គេធ្វើបានល្អបណ្តាក់រដូវកាល ហើយក៏ជាប់ឈ្មោះក្នុងចំណែក ប្រព័ន្ធប្រយុទ្ធល្អបំផុតមួយក្នុងលោកគឺ ‘MSN’។ យ៉ាងណាដល់ឆ្នាំ ២០១៧ ក្លឹបបារាំង PSG ដែលហ៊ានឲ្យថ្លៃពលកម្ម Neymar ខ្ពស់កប់ពពក ក៏បានទម្លាក់លុយ ២២២ លានអឺរ៉ូ លើការត្រងយកកីឡាករជំនាញជើងស្តាំចេញពីទឹកដីអេស្ប៉ាញ។ ការផ្ទេរនោះ បាននាំផលចំណេញ ១៣៣,៨ លានអឺរ៉ូ ដល់ក្លឹបអាណាព្យាបាល។
១) Kylian Mbappe
ដើមឡើយ Mbappe ជាយុវជនហ្វឹកហាត់ឲ្យក្លឹប Bondy ហើយក្រោយមកផ្ទេរមកថ្នាលយុវជន Monaco នៅលក្ខខណ្ឌឥតតម្លៃខ្លួន។ ក្រោមការដុសខាត់ អភិវឌ្ឍខ្លួនអស់រយៈពេលជាង ៣ ឆ្នាំ Mbappe បានក្លាយជាម៉ាស៊ីនបញ្ចប់ទីដ៏មុ.តស្រួ.ចមួយនៅអឺរ៉ុប ហើយរកគ្រាប់បាល់ជាបន្តបន្ទាប់ផ្អើ.លលីគបារាំង។
សមត្ថភាពរបស់ខ្សែប្រយុទ្ធវ័យក្មេង បានធ្វើឲ្យ PSG ទ.ប់ចិត្តមិនជាប់នោះទេ ហើយក៏ហ៊ានចំណាយលុយ ១៤៥ លានអឺរ៉ូ ទិញយកគេចេញពី Monaco ក្រោយខ្ចីជើងបានមួយរដូវកាល។ ទំហំប្រាក់នៃការផ្ទេរ គឺប្រាក់ចំណេញពេញតួសម្រាប់ក្លឹបអាណាព្យាបាល Monaco៕
ប្រភព៖ TransferMarkt