Cristiano Ronaldo ដឹងថា ការកសាងក្រុម Manchester United អាចនឹងប្រើពេលយូរ ប៉ុន្ដែគេជឿជាក់ថា អ្នកចាត់ការ Ralf Rangnick ត្រូវការពេលវេលាដើម្បីរៀបចំក្រុមឱ្យបានល្អប្រសើរឡើងវិញ។
ខ្សែប្រយុទ្ធវ័យ៣៦ឆ្នាំរូបនេះ បានត្រលប់មកចូលរួមក្លិបចាស់របស់គេនៅក្នុងរដូវក្ដៅកន្លងទៅ ក្រុមបិសាចក្រហមមិនទទួលបានលទ្ធផលល្អនោះទេ ក្រោមការដឹកនាំរបស់អ្នកចាត់ការ Ole Gunnar Solskjaer ដែលត្រូវបានបញ្ចប់តំណែងកាលពីខែវិច្ឆិកា និងគ្រូបង្វឹកស្ដីទីបច្ចុប្បន្នលោក Rangnick។
Ronaldo បានថ្លែងប្រាប់ Sky Sports ថា៖ “ខ្ញុំមិនចង់មកទីនេះ ដើម្បីឈរនៅលេខ៥ លេខ៦ ឬលេខ៧ឡើយ។ ខ្ញុំមកទីនេះដើម្បីព្យាយាមឈ្នះ ដើម្បីប្រកួតប្រជែង។ ខ្ញុំគិតពីការកសាងរឿងដ៏ល្អ ពេលខ្លះអ្នកត្រូវតែបំផ្លាញរឿងមួយចំនួន”។
“ហេតុអ្វីក៏មិនបាន – ឆ្នាំថ្មី ជីវិតថ្មី ហើយខ្ញុំសង្ឃឹមថា Manchester United អាចស្ថិតនៅកម្រិតដែលអ្នកគាំទ្រចង់បាន។ ពួកគេស័ក្ដិសមទទួលបានបែបនេះ។ យើងអាចផ្លាស់ប្ដូរនៅពេលនេះ។ ខ្ញុំដឹងពីរបៀបកែប្រែ ប៉ុន្ដែខ្ញុំមិនបង្ហើបពីវានៅពេលនេះឡើយ ព្រោះខ្ញុំមិនគិតថា វាសមរម្យសម្រាប់ខ្ញុំដើម្បីនិយាយរឿងនេះទេ”។
“អ្វីដែលខ្ញុំអាចនិយាយបានគឺយើងអាចធ្វើបានល្អជាងនេះ គឺយើងទាំងអស់គ្នា។ Manchester United ជារឿងដ៏សំខាន់ ដូច្នេះយើងត្រូវផ្លាស់ប្ដូររឿងនេះ។ ខ្ញុំគិតថាយើងប្រកួតប្រជែង ប៉ុន្ដែយើងមិនទាន់ឈានដល់កម្រិតល្អបំផុតនៅឡើយទេ។ ប៉ុន្ដែយើងមានវិថីដ៏វែងឆ្ងាយដើម្បីពង្រឹងសមត្ថភាព ហើយខ្ញុំជឿថាប្រសិនបើយើងផ្លាស់ប្ដូរការគិតរបស់យើង យើងអាចជោគជ័យរឿងធំៗ”៕
ប្រភព៖ Marca
អានអត្ថបទបន្ទាប់៖ Ronaldo ស្ថិតក្នុងចំណោមបេក្ខភាពកំពូល ៣ រូប ដែល PSG ត្រៀមយកមកជំនួស Mbappe
Kylian Mbappe មានភាគរយអាចនឹងចាកចេញនៅពេលខាងមុខ ដោយគេជឿថា នឹងមិនមានកុងត្រាថ្មីកើតឡើងបានឡើយ ពោលការចែកផ្លូវរវាងក្លឹប PSG នឹងឈានចូលមកដល់ត្រឹមរដូវក្តៅ ឆ្នាំ ២០២២ នេះហើយ។ ដូច្នេះខាងភាគីក្លឹបបារាំង ក៏ចាប់ផ្ដើមធ្វើការចរចាជាបណ្តើរៗដែរ អំពីការចង់បានកីឡាករថ្មី ទុកមកជំនួសយុវជនឆ្នើមខាងលើ។
បើតាមសារព័ត៌មាន Evening Standard ចុះផ្សាយថា ក្លឹបមានមូលដ្ឋានក្នុងទីក្រុងប៉ារីស បានសម្លឹងឃើញបេក្ខភាពកំពូល ៣ រូប ដោយក្នុងចំណោមនោះ ក៏មាន Cristiano Ronaldo នៃក្លឹប Man Utd ផងដែរ។
វាកើតឡើងបន្ទាប់ពីលេចលឺថា កីឡាករព័រទុយហ្គាល់ផ្ទាល់ ក៏មិនជារីករាយនឹងការលេងនៅទឹកដី Old Trafford ព្រោះអីក្លឹបមិនប្រាកដប្រជាថានឹងអាចបញ្ចប់ចំណាត់ថ្នាក់ ឈរនៅ Top 4 នោះដែរ ក្នុងការប្រជែង ក្របខ័ណ្ឌ Premier League។ ស្របពេលដែលបុរសវ័យ ៣៦ ឆ្នាំត្រូវផុតសុពលភាពនៅចុងខែមិថុនា ឆ្នាំ ២០២៣ ដូច្នេះក៏មានភាគរយខ្ពស់ ដែល CR7 អាចនឹងផ្ទេរចេញទៅកាន់ក្លឹបបារាំង។
ការរួបរួមរវាង Ronaldo&Messi នៅ PSG អាចនឹងកើតឡើងក៏ថាបាន មុនអ្នកទាំងពីរបញ្ចប់អាជីព ពីកីឡាករបាល់ទាត់។ តែយ៉ាងណាបើ ការចរចាយក Ronaldo មិនបានសម្រេច នោះក្លឹបនឹងបង្វែរទៅគោលដៅ ២ រូបផ្សេងទៀត រវាង Robert Lewandowski នៃក្លឹប Bayern Munich ឬអាចជា Erling Haaland នៃក្លឹប Borussia Dortmund។ ចុះសម្រាប់គ្នាយើងវិញ គិតថានរណា នឹងសក្តិសមក្នុងការជំនួសកន្លែងរបស់ Mbappe?
ប្រភព៖ Evening Standard