បើតាមសារព័ត៌មាន AS ចុះផ្សាយថា ក្លឹប Atletico Madrid បាននឹងកំពុងចាប់អារម្មណ៍ទៅលើកីឡាករក្រៅជម្រើសរបស់ក្លឹប Man Utd ព្រោះចង់យកមកបំពេញចន្លោះប្រហោង ដែលក្លឹបខ្លួនផ្ទាល់កំពុងជួបប្រទះនៅរយៈពេលចុងក្រោយ។
ប្រភពបានឲ្យដឹងថា ក្លឹបការពារជើងឯក La Liga បានមើលឃើញសមត្ថភាពនៃខ្សែការពារស្លាប Diogo Dalot ដោយគិតថា គេអាចមកជំនួសកន្លែង Kieran Trippier បាន។ បញ្ជាក់ឲ្យដឹង កីឡាករអង់គ្លេសទើបតែសម្រេចការផ្ទេរទៅកាន់ក្លឹប Newcastle United កាលពីប៉ុន្មានថ្ងៃមុន ដូច្នេះការពារស្លាបខាងក្រោម គឺក្លឹបរបស់លោក Diego Simeone កំពុងមានចន្លោះហើយ។
មកមើល Dalot គេជាកីឡាករព័រទុយហ្គាល់ មានវ័យទើបតែ ២២ ឆ្នាំប៉ុណ្ណោះ ហើយជាប់កុងត្រាជាមួយក្លឹបម្ចាស់ដី Old Trafford ដល់ចុងខែមិថុនា ឆ្នាំ ២០២៣។ យ៉ាងណាគេមិនសូវទទួលបានឱកាសលេងនោះទេ ព្រោះអី Role របស់គេ ជាន់ជាមួយនឹង Aaron Wan-Bissaka ដូចនៅរដូវកាលនេះ ឈរជើងមិនទាន់បាន ១ ០០០ នាទីផង។
បើ Atletico ចាប់អារម្មណ៍ចង់បានគេ ក៏ទំនងជាត្រូវចាយលុយល្បាក់ ១៥ ទៅ ២០ លានផោន តែក៏មិនច្បាស់ថា United ព្រមប្រគល់ឲ្យឬអត់ដែរ ព្រោះក្រែងលគិតចង់រក្សាទុកគេ ជាកីឡាករបម្រុងពេល Bissaka ជួបបញ្ហាចៃដន្យណាមួយ។ សម្រាប់ក្លឹបអេស្ប៉ាញ ក្រៅពីចាប់ចិត្តមកលើ Dalot ទៀតសោតក៏មានគោលដៅ នៃក្លឹប RB Leipzig គឺ Rasmus Christensen និង Daniel Wass នៃក្លឹប Valencia ផ្សេងទៀតដែរ៕
ប្រភព៖ AS
អានអត្ថបទបន្ទាប់៖ បែបចង់បានខ្លាំង! ប្រធានក្លឹប R.Sociedad ទាក់ទងទៅឪពុកកីឡាករ Man Utd រូបនេះផ្ទាល់ហើយ
ប្រធានក្លឹប Real Sociedad គឺលោក Jokin Aperribay ត្រូវបានគេរាយការណ៍ថា បានណាត់ជួបផ្ទាល់ជាមួយឪពុកនៃខ្សែបម្រើក្លឹប Man Utd ដោយផ្ទាល់ ពោលគឺចង់ចរចា នាំយកឲ្យបាននៅឆ្នាំ ២០២២ អាចថាជាខែមករា ឬនៅខែកក្កដាខាងមុខ។
នោះគឺកីឡាករត្រៀមផុតកុងត្រា Juan Mata ដែលគេសល់ពេលវេលាជាមួយក្លឹបម្ចាស់ដី Old Trafford ត្រឹមតែរយៈពេល ៦ ខែទៀតប៉ុណ្ណោះ ហើយមិនមានដំណឹងថា នឹងបន្តកុងត្រាថ្មីឡើយ ជាមួយក្លឹប។ សម្រាប់ Mata គេមានវ័យ ៣៣ ឆ្នាំទៅហើយ ដូច្នេះតម្លៃផ្ទេរ បើយកនៅខែមករានេះ ក៏មិនថ្លៃហួសពី ៥ លានផោនដែរ។
បើតាមសារព័ត៌មាន AS បានចុះផ្សាយថា ភាគីខាងប្រធានក្លឹប Sociedad និងឪពុករបស់ Mata ដែលជាភ្នាក់ងាររត់ការផ្ទាល់ខ្លួន គឺបានជួបជជែកគ្នាហើយ ដោយទំនងជាបើកភ្លើងខៀវរួចជាស្រេចផងដែរ ជុំវិញការផ្ទេរក្នុងពេលឆាប់ៗខាងមុខ។
ប្រភពបានឲ្យដឹងថា បើការផ្ទេរសម្រេចទៅបាន ក៏ Mata នឹងត្រូវកាត់បន្ថយថ្លៃពលកម្មដែរ ជារួមគឺមិនអាចទទួលបានលើសពី ១៣៥ ០០០ ផោន/សប្តាហ៍ដូចនៅ Man Utd នោះទេ ព្រោះស្ថានភាពហិរញ្ញវត្ថុក្លឹបនៅ La Liga រយៈពេលចុងក្រោយ មិនធូរធារដូចក្លឹបនៅអង់គ្លេសឡើយ៕
ប្រភព៖ AS