អ្នកចាំទីនៃក្លឹប Watford គឺលោក Ben Foster បានបង្ហាញការប៉ាន់ប្រមាណជុំវិញទំហំចំណាយ ដែល Cristiano Ronaldo បានចាយវាយលើការប្រគល់អាវ ទៅឲ្យក្រុមគូប្រជែង ក៏ដូចជាអ្នកគាំទ្រក្រោយចប់ការប្រកួត។ នេះមិនមែនជាតួលេខច្បាស់ការនោះទេ ដោយវាត្រឹមជាការប៉ាន់ប្រមាណផ្អែកតាមចំនួនប្រកួត និងតម្លៃអាវ មានលក់លើទីផ្សារប៉ុណ្ណោះ។
តាមរយៈការលើកឡើងលើប៉ុស្តិ៍ YouTube ផ្ទាល់ខ្លួន អ្នកចាំទីវ័យ ៣៨ ឆ្នាំខាងលើ បានប៉ាន់ប្រមាណឃើញថា គ្រាន់តែការចែកអាវ ឬដោះដូរអាវគ្នាទៅមក មួយអាជីពរបស់ Ronaldo គឺទំនងជាចាយអស់ ៧៧ ០០០ ផោន ឬប្រហែលជាង ១០០ ០០០ ដុល្លារ។
Foster និយាយ៖ “Cristiano Ronaldo បានប្រគល់អាវទៅឲ្យក្រុមគូប្រជែងនៅចប់ការប្រកួត ហើយអ្នកប្រហែលមិនដឹងទេ ថាអាវទាំងអស់នោះ កីឡាករផ្ទាល់ត្រូវចាយលុយចេញពីហោប៉ៅផ្ទាល់ខ្លួន ដូច្នេះយើងគិតថា ក្នុងអាជីពរបស់គាត់ គាត់លេង ១ ១០០ ប្រកួត ដោយក្នុងការប្រកួតនីមួយៗខាងក្រុមផ្តល់ឲ្យ ២ អាវសម្រាប់ការប្រើប្រាស់”។
លោកបន្តថា៖ “ខ្ញុំមិនបាននិយាយថា Ronaldo នឹងផ្តល់ឲ្យគ្រប់ការប្រកួតទេ តែបើយើងគិតឲ្យងាយ អាចថា អាវមួយ ឬពីរដែលលោកចំណាយនៅការប្រកួត ដូច្នេះបើយើងគិតអាវតម្លៃ ១០០ ផោន ឬទាបបំផុតកាលពីមុន ៥០ ទៅ ៦០ ផោន ដូច្នេះថាតម្លៃអាវជាមធ្យម ៧០ ផោនចុះ អ៊ីចឹង ១ ១០០ អាវគឺ ៧៧ ០០០ ផោនហើយគិតជាលុយសុទ្ធ”៕
ប្រភព៖ Sportskeeda
អានអត្ថបទបន្ទាប់៖ ទោះវ័យចំណាស់ តែ Liverpool ជឿថាគុណភាពនៅតែមាន ឥឡូវចង់ឲ្យ R.Madrid ២៥ លានផោន
ក្លឹបហង្សក្រហម Liverpool ត្រូវបានគេរាយការណ៍ថា កំពុងចាប់អារម្មណ៍ចង់បានកីឡាករកាន់ឆ្នាំនៅក្លឹប Real Madrid ហើយបើទោះបីជាវ័យរាងចំណាស់ តែខាងក្លឹបដឹកនាំដោយលោក Jurgen Klopp ហាក់នៅជឿជាក់លើគុណភាពរបស់គេ និងចង់ចរចានាំយកមកទឹកដី Anfield នៅពេលខាងមុខ។
នោះគឺខ្សែបម្រើជំនាញកាត់បាល់វែង Toni Kroos ដែលគេមានវ័យ ៣២ ឆ្នាំហើយ និងសេសសល់សុពលភាពកុងត្រានៅ Bernabeu ដល់ចុងខែមិថុនា ឆ្នាំ ២០២៣។ មានក្លឹបធំៗ នៅអង់គ្លេស ទាំង Man City និង Liverpool ជាដើមនេះ ដែលលឺថាចាប់អារម្មណ៍មកលើកីឡាករសញ្ជាតិអាល្លឺម៉ង់។
បើតាមសារព័ត៌មាន El Nacional ចុះផ្សាយថា ក្លឹបអធិរាជស ក៏គិតចង់ចរចាបន្តកុងត្រាថ្មីឲ្យ Kroos ផងដែរ តែឆ្លៀតពេលវេលានេះ ខាងភាគីក្លឹប Liverpool ក៏ដាក់សម្ពា.ធខ្លាំង ដោយបានចូលចរចាកាត់មុខ និងសង្ឃឹមថា Kroos អាចសម្រេចចិត្តមកចូលរួមជាមួយក្លឹបរបស់ខ្លួន។ ហង្សបានដាក់សំណើនៅទឹកប្រាក់ ២៥ លានផោន និងចង់ផ្តល់កុងត្រារយៈពេល ៣ ឆ្នាំឲ្យខ្សែបម្រើខាងលើ។
យើងមិនច្បាស់ថា Kroos នឹងយល់ព្រមសំណើដ៏ធំមួយនេះ ឬបែបណាទេ។ រំឭកទៅស្ថិតិរបស់គេបន្តិច ចាប់តាំងពីការបង្ហាញខ្លួនឲ្យ Real Madrid នៅរដូវក្តៅ ឆ្នាំ ២០១៤ សរុបការលេង ៣៤១ ប្រកួត រកបាន ២៥ គ្រាប់និង Assist ៨៣ លើក។ អតីតកាលគេមិនធ្លាប់ស្គាល់រសជាតិក្នុងការលេងឲ្យក្លឹបនៅអង់គ្លេសនោះឡើយ៕
ប្រភព៖ El Nacional