ក្លិបអ្នកមានបុណ្យ Barcelona អាចនឹងពិចារណាដាក់ឲ្យតារាឆ្នើមរបស់ខ្លួន ខ្ចីជើងទៅកាន់ក្លិបទទៃម្នាក់ទៀត បន្ទាប់ពីបានអនុញ្ញាតឲ្យ Philippe Coutinho ផ្ទេរទៅចូលរួមជាមួយក្រុម Aston Villa ក្នុងពេលថ្មីៗកន្លងទៅ ។
គួរឲ្យដឹងផងដែរថាក្លិបយក្សកាតាឡាន់តែបានចុះហត្ថលេខាលើខ្សែប្រយុទ្ធ Ferran Torres ដែលនេះមានន័យថាពួកគេ ត្រូវតែព្យាយាមកាត់បន្ថយការចំណាយទៅលើថ្លៃឈ្នួលជាមួយកីឡាករ នៅក្នុងក្រុមរបស់ពួកគេបន្ថែមទៀត ។
ហើយដើម្បីធ្វើដូច្នេះបាន យោងតាមរបាយការណ៍ចុងក្រោយមួយ បានបង្ហាញថា ក្រុម Barca អាចនឹងអនុញ្ញាតឱ្យខ្សែការពារស្តាំ កីឡាករ Sergino Dest ចាកចេញពីក្លឹប នៅក្នុងទីផ្សារដោះដូរខែមករានេះ ។
ជាក់ស្តែង កីឡាករសញ្ជាតិអាមេរិករូបនេះ ហាក់មិនបានបង្ហាញទម្រង់លេងគួរឲ្យចាប់អារម្មណ៍ សម្រាប់ក្លិបនោះឡើយ ស្របពេលគ្រូបង្វឹក លោក Xavi Hernandez ក៏បានផ្ទេរយកកីឡាករ Dani Alves មកកាន់ក្លិបវិញ ហើយឥឡូវបានក្លាយជាជម្រើសទី ១ សម្រាប់លោកផងដែរ ។
តែទោះបីជាយ៉ាងណាក៏ដោយ វាត្រូវបានគេរាយការណ៍ទៀតថា Barca នឹងអនុញ្ញាតឲ្យ Dest ចាកចេញក្នុងកិច្ចព្រមព្រៀងខ្ចីជើងប៉ុណ្ណោះ ចំពេលក្រុមតោខៀវ Chelsea កំពុងបង្ហាញចំណាប់អារម្មណ៍ខ្លាំង ដើម្បីយកមកជំនួសតំណែងរបស់ Ben Chilwell ដែលត្រូវអវត្តមានរយ:ពេលយូរ ដោយសាររបួស ៕
ប្រភព: Football-Espana
អានអត្ថបទបន្ទាប់៖ Rooney អត់យល់ស្រប Ronaldo រឿងនេះទេ ជុំវិញការលើកឡើងពីក្លឹប Man Utd ថ្ងៃមុន
កន្លងទៅ តារាឆ្នើមក្លឹប Man Utd គឺ Cristiano Ronaldo បាននិយាយជុំវិញស្ថានភាពរបស់ក្លឹបនៅពេលចុងក្រោយ ហើយសង្កត់ធ្ងន់ថា យ៉ាងហោចណាស់ក៏គួរតែបាន Top 3 ដែរនៅបញ្ចប់រដូវកាល ស្របពេលដែលចំណាត់ថ្នាក់បច្ចុប្បន្ន ក្លឹបម្ចាស់ដី Old Trafford ឈរនៅលេខរៀងទី ៧ ឯណោះក្នុងតារាង។
នៅបទសម្ភាសន៍ជាមួយ Sky Sports កីឡាករព័រទុយហ្គាល់ និយាយថា៖ “ខ្ញុំទទួលយកអត់បានទេ បើក្រុមរបស់យើងមិនអាចបញ្ចប់ចំណាត់ថ្នាក់ Top 3 យើងមានលទ្ធភាពអាចផ្លាស់ប្តូររឿងអស់ទាំងនេះបាន ពេលឥឡូវនេះ ព្រោះអីខ្ញុំអត់ចង់ស្ថិតនៅក្លឹបដែលប្រជែងដើម្បីតំណែងលេខ ៦ លេខ ៧ ឬលេខ ៥ អីនោះទេ”។
ជាការឆ្លើយតបរបស់ Wayne Rooney អតីតខ្សែប្រយុទ្ធនៅ Man Utd បានយល់ឃើញផ្ទុយស្រឡះពីនោះ ហើយនិយាយថា កីឡាករទាំងអស់នៅក្លឹប គួរតែមានឆន្ទៈចង់ប្រជែងយកលេខ ១ វាដូចជាអ្វីដែលអ្នកគាំទ្រចង់បានពី Man Utd មិនមែនចំណោមក្រុមលេខ ៣ នោះទេ។
Rooney ថា៖ “Man Utd ត្រូវតែជាក្រុមលេខ ១ មិនមែនចំណោមក្រុមលេខ ៣ ទេ ខ្ញុំគិតថានេះក៏ជាអ្វីដែលអ្នកគាំទ្រទទូចចង់បានដូចគ្នាពីកីឡាករ ពោលជាតម្រូវការដែលក្លឹបត្រូវតែមានជាចាំបាច់ និយាយទៅឆន្ទៈ គឺត្រូវឈ្នះពានរង្វាន់ ទាំងនេះជាអ្វីដែលក្លឹបត្រូវវិលត្រលប់ទៅរកភាពដ៏ល្អនោះវិញ ក៏ដូចជាកន្លែងចាស់ ដែលពួកគេធ្លាប់ឆ្ពោះទៅដល់”៕
ប្រភព៖ Metro