ក្លិប Tottenham Hotspur មានការបើកចំហរក្នុងការត្រៀមលក់ខ្សែបម្រើ Dele Alli និង Giovani Lo Celso នៅថ្ងៃចុងក្រោយនៃទីផ្សារដោះដូរ ស្របពេលកីឡាករទាំងពីររូបនេះ មិនមានឈ្មោះក្នុងបញ្ជីក្រុមសម្រាប់ការប្រកួតទល់នឹង Chelsea នោះទេកាលពីយប់មិញនេះ។
កីឡាករទាំងពីររូបមានការភ្ជាប់នឹងការចាកចេញពី Spurs ក្រោមការដឹកនាំដោយលោក Antonio Conte ដោយពួកគេបន្ដអវត្តមានក្នុងប្រកួតសំខាន់នៅទឹកដី Stamford Bridge។
អវត្តមានរបស់ Lo Celso ត្រូវបានប្រកាសថា ជាប់ពាក់ព័ន្ធនឹងបញ្ហារបួស តែខ្សែបម្រើអាហ្សង់ទីន បានសរសេរនៅលើគណនីបណ្ដាញសង្គមផ្ទាល់ខ្លួនថា គេមិនមានបញ្ហាអ្វីពាក់ព័ន្ធនឹងសុខភាពឡើយ។
ដោយឡែកសម្រាប់ Alli វិញ បន្ទាប់ពីក្រុមរបស់គេចាញ់ការប្រកួត ២-០ ទល់នឹង Chelsea អ្នកចាត់ការ Conte បដិសេធមិននិយាយអ្វីឡើយពាក់ព័ន្ធនឹងមូលហេតុអវត្តមានកីឡាកររូបនេះ៕
ប្រភព៖ 90Min
អានអត្ថបទបន្ទាប់៖ គ្រូធំ Tuchel សរសើរកីឡាករ Chelsea រូបនេះពេញៗមាត់ ថាមានតិចនិកល្អណាស់
ក្លឹបតោខៀវ Chelsea បានយកឈ្នះទៅលើក្លឹប Tottenham Hotspur តាមរយៈលទ្ធផល ២-០ នៅក្របខ័ណ្ឌ Premier League កាលពីយប់មិញ ដោយនេះអរគុណដល់គ្រាប់បាល់របស់ Hakim Ziyech និង Thiago Silva នៅដើមតង់ទីពីរ។
ក្រោយចប់ការប្រកួត អ្នកចាត់ការលោក Thomas Tuchel ក៏បានសរសើរមិនដាច់ពីមាត់ ដល់ខ្សែប្រយុទ្ធម៉ារ៉ុកគឺ Ziyech ថាពោរពេញទៅដោយតិចនិក និងបានបង្ហាញទម្រង់លេងល្អបំផុតហើយនៅប្រកួតសារនេះ។
គ្រូសញ្ជាតិអាល្លឺម៉ង់និយាយ៖ “អាចថានេះជាប្រកួតដ៏ល្អបំផុតរបស់គេហើយ ដោយគេហ៊ានប្រ.ថុយតាមដែលអាចធ្វើទៅបាន ហើយពេលខ្លះលទ្ធផលចេញមកគឺល្អ ដោយតំណែងរបស់គេលើទីលានយប់នេះ ក៏ល្អខ្លាំងសម្រាប់គេដែរ ដោយវាអាចបន្សល់ចន្លោះ និងអនុញ្ញាតឲ្យគេអាចស៊ុតបានយ៉ាងអស្ចារ្យ”។
លោកបន្ត៖ “ខ្ញុំនៅពីក្រោយគ្រាប់បាល់នោះដែរ ខ្ញុំមានអារម្មណ៍ថាបាល់នោះបន្តក់រាងខ្ពស់ តែយ៉ាងណាវាធ្លាក់ចំពេលល្អណាស់ និយាយទៅជាគ្រាប់បាល់ដ៏ពិសេសមួយ វាជាតិចនិកដ៏ល្អចេញពីថ្វីជើងរបស់គេ”។
រំឭកថា កីឡាករដែលជាប់សញ្ជាតិនៅប៉ែកអាហ្វ្រិក គេពុំបានជាប់ឈ្មោះទៅចូលរួមជួយក្រុមជម្រើសជាតិនោះទេ ហេតុនេះហើយទើបអាចបន្តលេងឲ្យ Chelsea បានជាធម្មតា។ ស្ថិតិរដូវកាលនេះ ២៤ ប្រកួត Ziyech រកបាន ៦ គ្រាប់និង Assist ៤ លើក៕
ប្រភព៖ Metro