ក្នុងមួយរយ:កន្លងមកនេះ គេសង្កេតឃើញថាអនាគតរបស់ខ្សែបម្រើ Frenkie de Jong គឺមិនមានភាពច្បាស់លាស់ទេ ដោយគេហាក់ជួបភាពពិបាក ក្នុងការលេងក្រោមការដឹកនាំរបស់លោក Xavi បន្ទាប់ពីមកជំនួសតំណែងរបស់លោក Ronald Koeman ក្នុងខែតុលាមក ។
គួរឱ្យដឹងថា De Jong បានចូលរួមជាមួយ Barcelona ពីក្រុម Ajax នៅរដូវក្តៅឆ្នាំ ២០២០ ក្នុងតម្លៃ ៨៥លានអឺរ៉ូ ប៉ុន្តែយ៉ាងណាក៏ដោយ ក្នុងពេលឥឡូវនេះ វាត្រូវបានគេរាយាករណ៍ក្លិប អាចនឹងបង្ខំចិត្តចែកផ្លូវជាមួយខ្សែបម្រើសញ្ជាតិហូឡង់វិញ នៅចំពេលពួកគេកំពុងមានបញ្ហាហិរញ្ញវត្ថុ ដែលមិនទាន់ដោះស្រាយចេញ ។
ហើយមិនតែប៉ុណ្ណោះ បើយោងទៅតាមសារព័ត៌មាន ពី Diario Sport បានឲ្យដឹងថា Bayern Munich កំពុងបង្ហាញការចាប់អារម្មណ៍ខ្លាំងទៅលើ De Jong នៅក្នុងអំឡុងពេលទីផ្សារដោះដូរកីឡាករខែមករានេះ ។
ស្របពេលជាមួយគ្នានេះ ក្លិប Barcelona ក៏នឹងមិនស្ទាក់ស្ទើក្នុងការលក់រូបគេចេញផងដែរ ដោយសារតែបច្ចុប្បន្នក្លិបកំពុងតែគិតគូទៅលើ ឱកាស ក្នុងការចុះហត្ថលេខាលើខ្សែប្រយុទ្ធ Erling Haaland នៅក្នុងទីផ្សារដោះដូរកីឡាកររដូវក្តៅខាងមុខ ដោយវាត្រូវបានគេនិយាយថាកីឡាករសញ្ជាតិន័រវេសរូបនេះ គឺជាបំណងប្រាថ្នាដ៏ធំរបស់ប្រធានក្លិប លោក Joan Laporta ៕
ប្រភព: Football-Espana
អានអត្ថបទបន្ទាប់៖ ឥតលាក់បាំង! តារាឆ្នើម Spurs មួយរូប បង្ហើបប្រាប់មិត្តជិតស្និទ្ធរបស់ខ្លួន ថាចង់ផ្ទេរទៅលេងឲ្យ Newcastle
ខ្សែបម្រើ Dele Alli របស់ក្រុម Tottenham Hotspur ត្រូវបានគេរាយការណ៍ថាបានជូនដំណឹងទៅកាន់មិត្តជិតស្និទ្ធរបស់ខ្លួនថា រូបគេចង់ដើរចូលក្លិប Newcastle United ជំនួសវិញ ក្នុងអំឡុងពេលទីផ្សារដោះដូរកីឡាករខែមករានេះ ។
ជាក់ស្តែង នេះបើតាមការចុះផ្សាយចុងក្រោយរបស់សារព័ត៌មាន Football Insider ដែលបានអះអាងថាខ្សែបម្រើសញ្ជាតិអង់គ្លេសរូបនេះ កំពុងតែបង្ហាញពីចំណាប់អារម្មណ៍ខ្លាំង ក្នុងការផ្ទេរទៅលេងនៅទឹកដី St James’ Park។
គួរឲ្យដឹងផងដែរថា កីឡាករវ័យ ២៥ ឆ្នាំរូបនេះ បានក្លាយជាផ្នែកដ៏សំខាន់របស់ក្លិប បន្ទាប់ពីបានផ្ទេរមកពីក្រុម MK Dons ក្នុងតម្លៃ ៦ លានផោនកាលពីឆ្នាំ ២០១៥ ប៉ុន្តែយ៉ាងណា ទម្រង់លេងរបស់ Dele ក្នុងពេលថ្មីៗនេះ វាត្រូវបានគេមើលឃើញថា កីឡាកររូបនេះ បានធ្លាក់ចេញពីការពេញចិត្ត នៅក្រោមការដឹកនាំរបស់លោក Antonio Conte ។
ហើយមិនតែប៉ុណ្ណោះ បើតាមប្រភពជិតស្និទ្ធជាមួយនឹងកីឡាកររូបនេះ បានបង្ហើបប្រាប់ Football Insider ថា Dele ពិតជាចង់ចុះហត្ថលេខាជាមួយក្លិបផ្សេង ហើយថែមទាំងបាននិយាយជាមួយអតីតមិត្តរួមក្រុម កីឡាករ Kieran Trippier ដែលបានផ្ទេរទៅចូលរួមជាមួយក្រុម Newcastle កាលពីដើមខែកន្លងទៅផងដែរ ៕
ប្រភព: Caughtside