យោងតាមរបាយការណ៍ Bloomberg ចុះផ្សាយមុននេះបន្តិចបានឲ្យដឹងថាក្រុមហ៊ុនយក្សអាមេរិក Apple នឹងចាប់ផ្តើមកាត់បន្ថយការជ្រើសរើសបុគ្គលិកនាពេលខាងមុខនេះ ឆ្លើយតបទៅនឹងការលក់ដែលកំពុងមានតួលេខដាំក្បាលចុះក្នុងរយៈពេលចុងក្រោយ។
បញ្ជាក់ផ្ទាល់ពីនាយកប្រតិបត្តិលោក Tim Cook ដែលត្រូវបានគេចោទសួរជុំវិញការជ្រើសរើសបុគ្គលិកនាពេលខាងមុខ លោកក៏បានឆ្លើយថាការធ្វើបែបនេះពុំមែនជាដំណោះស្រាយលើបញ្ហាដែលក្រុមហ៊ុនកំពុងជួបនោះទេ។ ពុំទាន់ត្រូវបានបង្ហើបជាក់លាក់តើផ្នែកណាមួយនឹងត្រូវប៉ះពាល់ខ្លាំងពីការជម្រុះកម្លាំងពលកម្ម ប៉ុន្តែលោកសង្កត់ធ្ងន់ថាសម្រាប់បុគ្គលិកបម្រើការផ្នែក AI នឹងមិនមានអ្វីត្រូវព្រួយបារម្ភឡើយ ព្រោះបច្ចុប្បន្នផ្នែកនេះកំពុងដើរតួយ៉ាងសំខាន់ជាមួយ Apple នាថ្ងៃអនាគត។
រំឭកដែរថាក្រុមហ៊ុនយក្សមានមូលដ្ឋានក្នុងរដ្ឋ California មួយនេះបានធ្លាក់ចុះតម្លៃទីផ្សារប្រមាណ ៤៤៦ ពាន់លានដុល្លារត្រឹមរយៈពេល ៣ ខែជាហេតុធ្វើឲ្យ Amazon និង Microsoft វ៉ៃផ្តាច់ឈរនៅចំណាត់ថ្នាក់ជាក្រុមហ៊ុនមានតម្លៃទ្រព្យច្រើនជាងគេបង្អស់ក្នុងសកលលោកនាពេលបច្ចុប្បន្ន។
ប្រភព: PhoneArena