Chelsea កៀកនឹងបាន កីឡាករដែលមានដើមកំណើតនៅអាស៊ីអាគ្នេយ៍ មុនពេលចាយលុយធំទិញ Kepa

គ្រូបង្វឹកអ្នកចាំទីរបស់ក្លឹប Chelsea លោក Christophe Lollichon បានទំលាយថា អ្នកចាំទីដៃទី២របស់ក្លឹបបារាំង Paris Saint-Germain កីឡាករ​ Alphonse Areola កៀកនឹងផ្ទេរមកកាន់ទឹកដី Stamford Bridge ទៅហើយកាលពីរដូវក្ដៅកន្លងទៅនេះ។ ប៉ុន្ដែចុងក្រោយ Chelsea បែជាប្ដូរទៅទិញអ្នកចាំទី Kepa Arrizabalaga ដែលមានតំលៃ ៧១លានផោន ដែលជាតំលៃបំបែកកំណត់ត្រារបស់អ្នកចាំទី។

ប៉ុន្ដែលោក Lollichon បានលើកឡើងថា លោកចង់ធ្វើការជាមួយ កីឡាករដែលមានដើមកំណើតមកពីហ្វីលីពីនជាង ដោយសារលោកចាត់ទុកថារូបគេ ជាអ្នកចាំទីល្អបំផុតប្រចាំក្រុមជម្រើសជាតិបារាំង ហើយល្អជាង Hugo Lloris ទៅទៀត បន្ទាប់ពីរូបគេជួយក្រុមបារាំងបញ្ចប់លទ្ធផល ០-០ ទល់នឹងក្រុមអាល្លឺម៉ង់ ក្នុងការប្រកួត UEFA Nations League។

នៅក្នុងបទសម្ភាសន៍ជាមួយ Le Figaro លោក Lolichon បាននិយាយថា៖ “យើងនិយាយជាមួយគេច្រើនណាស់កាលពីរដូវក្ដៅនេះ ហើយគេចង់មកលេងនៅទីនេះផងដែរ ប៉ុន្ដែការសំរេចចិត្តចុងក្រោយមិនស្ថិតនៅក្នុងការទទួលខុសត្រូវរបស់ខ្ញុំទេ។

“ខ្ញុំប្រាកដជាមានអារម្មណ៍រំភើបណាស់បើបានធ្វើការជាមួយគេ[Areola]។ ខ្ញុំមិនចាំបាច់រង់ចាំមើលគេបង្ហាញខ្លួនក្នុងការប្រកួត នៅថ្ងៃព្រហស្បត្តិ៍នោះទេ។ សំរាប់ខ្ញុំគេជាអ្នកចាំទីល្អបំផុតនាពេលបច្ចុប្បន្ននេះ។​ ទាំងរូបរាង ទាំងសមត្ថភាពលេងបាល់ និង ភាពអត់ធ្មត់ គេជាកីឡាករដែលវិវត្តខ្លួនបានល្អជាមួយនឹងក្រុម។ យើងយកចិត្តទុកដាក់តែទៅលើ Lloris ច្រើនពេកហើយ ប៉ុន្ដែ Areola គឺលេងល្អជាងគេ។”

បច្ចុប្បន្ន Areola ជាអ្នកចាំទីដៃទី២ នៅ PSG បន្ទាប់ពី Gianluigi Buffon ដែលទើបតែផ្លាស់មកពី Juventus ប៉ុន្ដែរូបគេសំរេចចិត្តនៅបន្ដលេងអោយក្លឹបបារាំង ដោយសារគេគិតថា គេនឹងទទួលបានតំណែងអ្នកចាំទីដៃទី១ នៅពេលដែល Buffon ចូលនិវត្ត៕

ប្រភព៖ Daily Mail

មតិយោបល់