Courtois ទំលាយការពិតមួយប្រាប់ទៅអ្នកគាំទ្រតោខៀវ ល្មមបាត់ខឹងរូបគេ

អ្នកចាំទីចំនូលថ្មីរបស់ក្លឹប Real Madrid កីឡាករ Thibaut Courtois មានអារម្មណ៍សោកសៅចំពោះអ្នកគាំទ្រ Chelsea ហើយរូបគេបានផ្ញើសារឆ្លើយតបចំពោះការយល់ច្រលំ នៅពេលដែលរូបគេមិនបានបង្ហាញខ្លួននៅជំរុំហ្វឹកហាត់ មុនបើករដូវកាល ដោយសារតែរូបគេចចារត្រូវរូវជាមួយ Real Madridរួចរាល់ហើយ។

អ្នកចាំទីសញ្ជាតិបែលហ្ស៊ិក បានចាកចេញពីទឹកដី Stamford Bridge ក្នុងតំលៃ ៤៥លានដុល្លារ កាលពីខែសីហាបន្ទាប់ពីរូបគេ បានបញ្ជាក់យ៉ាងច្បាស់ពីបំណងត្រលប់មកកាន់ទីក្រុងម៉ាឌ្រីដវិញ ដើម្បីជួបជុំជាមួយនឹងកូនៗរបស់គេ ដែលរស់នៅទីនោះ។

កីឡាករវ័យ២៦ឆ្នាំរូបនេះ បានធ្វើអោយអ្នកគាំទ្រក្រុមតោខៀវមានការខឹងសម្បារជាខ្លាំង បន្ទាប់ពីរូបគេមិនបានចូលរួមហ្វឹកហាត់មុនបើករដូវកាល ដើម្បីបង្ខំអោយក្លឹបផ្ទេររូបគេចេញកាលពីរដូវក្ដៅនេះ។ ប៉ុន្ដែ Courtois បានបកស្រាយចំពោះអ្វីដែលខ្លួនបានធ្វើថាជាការយល់ច្រលំ ដោយបានលើកឡើងថា Chelsea ក៏បានដឹងពីបំណងរបស់គេ មុនពេលដែលចចារជាមួយក្លឹបអេស្ប៉ាញទៅទៀត។

Coutois បាននិយាយប្រាប់អ្នកកាសែតបន្ទាប់ពីការប្រកួតមិត្ដភាពទល់នឹងក្រុមស្កត់ឡែនថា៖ “វាធ្វើអោយខ្ញុំមិនសប្បាយចិត្ត ប្រាកដណាស់ពួកគេមិនដឹងពីការពិត នៅពីក្រោយរឿងនេះនោះទេ។ ខ្ញុំបានសំរេចចិត្តថាចាកចេញពីក្លឹបតាំងពីខែមីនាមកម្ល៉េះ ហើយខ្ញុំគិតថា ក្លឹបនឹងទទួលយកការសំរេចចិត្តនេះ។

“បន្ទាប់មកដោយសារតែទីផ្សារដោះដូរបិទទ្វារ ទើបខ្ញុំមិនបង្ហាញមុខនៅកន្លែងហ្វឹកហាត់ ព្រោះខ្ញុំគិតថាវាជារឿងល្អ ដែលខ្ញុំមិនទៅនាំតែរំខានអារម្មណ៍មិត្ដរួមក្រុម។ តាមពិតទៅ វាជារឿងដែលគួរអោយតូចចិត្តព្រោះខ្ញុំស្រលាញ់ Chelsea ខ្ញុំពេញចិត្តពេលលេងនៅទីនោះ៕

ប្រភព៖ Goal

មតិយោបល់