Dybala ទំលាយនូវអ្វីដែលគេនិយាយជាមួយលោក Mourinho ក្រោយ United បានយកឈ្នះ Juventus

Paulo Dybala បានបង្ហើបថា រូបគេបានប្រាប់ទៅលោក Jose Mourinho កុំអោយបង្ហាញកាយវិការទៅកាន់អ្នកគាំទ្រ Juventus បន្ទាប់ពីក្រុម Manchester United បានយកឈ្នះក្រុមម្ចាស់ផ្ទះ ២-១ នៅទីក្រុងទូរីន។ ក្រុមបិសាចក្រហម បានវាយបកយកឈ្នះ Juventus ទទួលបានបីពិន្ទុ បន្ទាប់ពីក្រុមម្ចាស់ផ្ទះនាំមុខ ដោយខ្សែប្រយុទ្ធឆ្នើម Cristiano Ronaldo ស៊ុត Volley ដ៏អស្ចារ្យ។

ប៉ុន្ដែ United រកបានមួយគ្រាប់តាមស្មើវិញដោយ ខ្សែបម្រើ Juan Mata ដោយបាល់ហ្វ្រីឃីគ និង បាល់ own goal របស់ខ្សែការពារ Alex Sandro បានជួយអោយ ក្រុមរបស់លោក Mourinho ទទួលបានជ័យជំនះត្រលប់ទៅអង់គ្លេសវិញ។

បើតាមសេចក្ដីរាយការណ៍ បានបង្ហើបថា Dybala បានប្រើពាក្យមិនសមរម្យ ទៅលើអ្នកចាត់ការបិសាចក្រហម ដោយរូបគេនិង ខ្សែការពរា Leonardo Bonucci បានប្រឈមមុខគ្នាដោយកំហឹង មុនពេលដែលគ្រូបង្វឹកសញ្ជាតិព័រទុយហ្គាល់ចាកចេញពីទីលាន។

ប៉ុន្ដែនៅក្នងបទសម្ភាសន៍របស់ Sky Sports, Dybala បានប្រកែកថារូបគេមិនបានប្រើពាក្យធ្ងន់ៗដាក់លោក Mourinho នោះទេ ប៉ុន្ដែរូបគេបានប្រាប់ទៅគាត់ថា មិនចាំបាច់ប្រើកាយវិការចំអកដល់អ្នកគាំទ្រ Juventus ឡើយ។

ខ្សែប្រយុទ្ធអាហ្សង់ទីនបាននិយាយថា៖ “ខ្ញុំគ្រាន់តែប្រាប់ទៅគាត់ថា មិនចាំបាច់ធ្វើកាយវិការបែបនេះទេ។ វាមិនចាំបាច់ត្រូវបន្ថែមភាពតានតឹង ទៅលើអ្វីដែលបានកើតឡើងរួចមកហើយ ពេលខ្លះអ្នកត្រូវបានគេជេរ វាមិនមែនជារឿងល្អនោះទេ ប៉ុន្ដែមិនគួរធ្វើអោយកាន់តែមានភាពតានតឹងនោះដែរ។ ខ្ញុំគ្រាន់តែប្រាប់គាត់ពីអ្វីដែលមិនគួរធ្វើ ខ្ញុំមិនបានជេរគាត់ទេ។ ខ្ញុំគ្រាន់តែប្រាប់គាត់អ៊ីចឹង ហើយក៏ចាកចេញទៅ។”

គួររំលឹកថា ជ័យជំនះរបស់ United នៅទីក្រុងទូរីន បានជួយអោយពួកគេឈរនៅតំណែងលេខ២ ក្នុងតារាងពូល H កៀកនឹងក្រុមអ៊ីតាលី ដោយចាញ់តែពីរពិន្ទុប៉ុណ្ណោះ៕

ប្រភព៖ The Sun

មតិយោបល់