យោងតាមការលើកឡើងរបស់កញ្ញា ងួន កូលីកា ហាក់មានការហួសចិត្តជាខ្លាំងនឹងជនខិលខូចដែលបានប្រើប្រាស់រូបភាពនិងឈ្មោះរបស់នាងបន្លំជាគណនីក្លែងក្លាយ ដែលមិនដឹងច្បាស់ថាជនទាំងនោះមានគោលបំណងអ្វីឲ្យប្រាកដ។
គណនីឈ្មោះ Koy Chan Kolikaa (Official Account) ដែលមាន Follower ប្រមាន ៩ ២៤២ នាក់នៅលើបណ្តាញសង្គម Facebook សព្វថ្ងៃកំពុងបំភ័ន្តភ្នែកមិត្តភក្តិអ្នកប្រើប្រាស់ឯទៀត ដោយគ្រប់គ្នាប្រហែលគិតថានោះជាគណនីពិត ប៉ុន្តែតាមការបកស្រាយជាក់ស្តែងពីម្ចាស់កញ្ញា កូលីកា បានសង្កត់ធ្ងន់ម្តងហើយម្តងទៀតថានាងពុំបានជាប់ពាក់ព័ន្ធនឹងគណនីដូចបានលើកឡើងខាងលើនេះឡើយ។
សព្វថ្ងៃគណនីប្រើប្រាស់របស់កញ្ញាមានតែមួយគត់ ដែលមានឈ្មោះ Kolika Ngoun ដោយឡែកមិនថាតែនៅលើ Instagram ក៏ជនខិលខូចបានបន្លំធ្វើជាកញ្ញាដូចគ្នា។ តាមរយៈការអង្កេតមើលកន្លងមក ជនខិលខូចបានចម្លងនៅរាល់រូបភាពនិងពាក្យសម្តី (Caption) ទាំងអស់ ចេញពីគណនីម្ចាស់ពិត មកបង្ហោះចែកចាយលើគណនីក្លែងក្លាយ។
ដោយឥតទ្រាំនឹងទង្វើដ៏មិនគប្បីនេះ សាមីខ្លួនផ្ទាល់កញ្ញា ងួន កូលីកា ក៏បង្ហើបថាកញ្ញាបានដាក់ពាក្យបណ្តឹងទៅកាន់នាយកដ្ឋានប្រឆាំងបទល្មើសបច្ចេកវិទ្យារួចជាស្រេច ដោយរង់ចាំតែចំណាត់ការនិងការដោះស្រាយរបស់ច្បាប់តែប៉ុណ្ណោះ។
បែបណាមិញសុំបងប្អូននិងជាពិសេសអ្នកដែលបាន Follow គណនីក្លែងក្លាយខាងលើ មេត្តាជ្រាបជាដំណឹង ដោយសាមីខ្លួននឹងមិនទទួលខុសត្រូវលើទង្វើប៉ះពាល់ឬពាក្យសម្តីមិនសមរម្យណាមួយដែលចែកចាយចេញពីគណនីក្លែងក្លាយនោះឡើយ។