យោងតាមការចុះផ្សាយចុងក្រោយមួយ បានបង្ហាញថាទាំងក្លិប Chelsea និង Arsenal កំពុងស្ថិតក្នុងចំណោមក្លឹបជាច្រើនទៀត ដែលកំពុងតាមដានលើខ្សែការពារសញ្ជាតិកូរ៉ខាងត្បូងរបស់ក្លិប Fenerbahce ។
ជាក់ស្តែងនេះបើតាមអ្នកកាសែត Pedro Sepulveda ដែលបានរាយការណ៍ថាក្លិបរបស់ក្របខ័ណ្ឌ Premier League ទាំង២ កំពុងរក្សាការចាប់អារម្មណ៍លើកីឡាករ Kim Min-jae ដោយរូបគេ កំពុងតែមានរដូវកាលដ៏ល្អ នៅក្នុងក្របខ័ណ្ឌទួរគី Super Lig ។
ហើយមិនតែប៉ុណ្ណោះ ប្រភពខាងលើ បានបន្ថែមទៀតថា ក្លិបអង់គ្លេសទាំង ២ ក៏បានបញ្ជូនអ្នកសង្កេតការណ៍ ទៅមើល Min-jae ក្នុងការប្រកួតរបស់ក្រុម Fenerbache ទល់នឹង Trabzonspor កាលពីពេលថ្មីៗនេះផងដែរ ។
យ៉ាងណាក៏ដោយ ក្រៅពីក្លឹបយក្ស Premier League ពីរ ក៏នៅមានក្លិប Tottenham Hotspur, FC Porto និងក្លឹប Juventus របស់ក្របខ័ណ្ឌ Premier League ក៏បានបញ្ជូនក្រុមការងាររបស់ពួកគេ ទៅតាមដានកីឡាករអាស៊ីរូបនេះផងដែរ។
គួរឱ្យដឹងថា Min-Jae ដែលមានវ័យ ២៥ ឆ្នាំ បានផ្លាស់ទៅប្រទេសទួរគី ពីក្រុមរបស់ចិន BJ Guoan កាលពីខែសីហាឆ្នាំមុន ហើយរហូតមកដល់ពេលនេះ គេបានបង្ហាញខ្លួន ២៥ ប្រកួតហើយ នៅក្របខ័ណ្ឌ Super Lig៕
ប្រភព: Sportskeeda