អ្នកចាំទី David de Gea បានបង្ហាញការខ.កចិត្ត ជុំវិញការលេងរបស់មិត្តរួមក្រុម នៅជំនួបដែលក្រុមបរាជ័យក្រោមលទ្ធផល ០-១ ទល់ក្លឹប Everton នៅឯកីឡដ្ឋាន Goodison Park នាល្ងាចថ្ងៃសៅរ៍។ ការខកខានយកបាន ៣ ពិន្ទុនាំឲ្យក្រុមដឹកនាំដោយលោក Ralf Rangnick ខ្ទាតមកឈរនៅលេខ ៧ ដែលនេះពិបាកទាំងសង្ឃឹមការប្រជែងកៅអី UCL/UEL ដោយចាញ់ក្រុម Top 4 ចំនួន ៦ ពិន្ទុ។
បន្ទាប់ចប់ការប្រកួត ដែល United មានស្ថិតិស៊ុត ១២ លើក ចំគោលដៅ ៤ លើក តែមិនអាចសម្រេចបានសូម្បីមួយគ្រាប់ ក៏ត្រូវបានអ្នកចាំទី De Gea និយាយ៖ “យើងដឹងមុនថ្ងៃនេះទៅទៀត ថាក្រុមយើងមានបញ្ហា ហើយនឹងមានរឿងពិ.បាក ដោយយើងអត់អាចរកបានគ្រាប់បាល់ ហើយមិនអាចសូម្បីបង្កើតឱកាសក្នុងការស៊ុតដ៏ជាក់លាក់មួយ”។
លោកបន្ត៖ “ខ្ញុំអត់ដឹងថាត្រូវនិយាយរបៀបម៉េចទេ បើនិយាយស្មោះត្រង់ទៅ ក្រុមយើងលេងអត់ល្អគ្រប់គ្រាន់ទេ នេះពិតជាពិបាកហើយសម្រាប់ពេលនេះ ក្នុងការប្រជែងចំណាត់ថ្នាក់ Top 4″។ រំឭកថា ជំនួបនៅ PL សល់តែ ៧ ជុំទៀតប៉ុណ្ណោះ មុននឹងបញ្ចប់រដូវកាល ហើយពេលបន្ទាប់ គឺបិសាចត្រូវកំណត់ប៉ះ Norwich City មុនទៅជួបគីឡូធ្ងន់ Liverpool។
ប្រសិនជា ២ ជុំបន្ត មិនអាចយកបានពិន្ទុទៀត ហើយក្រុមដទៃដូចជា West Ham, Arsenal និង Spurs ជាដើមបន្តឈ្នះ នោះក្តីសង្ឃឹមសម្រាប់ United គឺសល់តែពានលំដាប់ទី ៣ របស់ UEFA គឺ Europa Conference League មួយគត់៕
ប្រភព៖ Metro