ក្លឹប West Ham United ត្រូវបានគេរាយការណ៍ថា កំពុងស្ថិតក្នុងការចាប់អារម្មណ៍តាមចង់បានសមាជិករបស់ក្លឹប Sevilla ដែលកំពុងឡើងជើងខ្លាំងនៅរដូវកាល ២០២១/២២។ យ៉ាងណាងាកមកក្លឹបអាណាព្យាបាលបានឆ្លើយតបមកវិញហើយ ដោយពួកគេនឹងមិនឃាត់.ឃាំងអ្វីទេ ឲ្យតែបានលុយដល់ដៃ ៨០ លានអឺរ៉ូ។
ប្រភពពី Estadio Deportivo ចុះផ្សាយថា ក្លឹប West Ham ពេញចិត្តលើខ្សែប្រយុទ្ធវ័យ ២៧ ឆ្នាំ Lucas Ocampos ដែលគេសេសសល់សុពលភាពកុងត្រាដល់ចុងខែមិថុនា ឆ្នាំ ២០២៥ ឯណោះ។ ការលក់នេះ គឺលក់ផ្អែកតាមតម្លៃផ្តាច់កុងត្រា មិនមែនហាងឆេងលើទីផ្សារ ដោយកំណត់ល្បាក់ ៧០ ទៅ ៨០ លានអឺរ៉ូ។
ក្រៅពី West Ham ក៏លឺថាមានក្លឹប Wolves ជាក្លឹបរួមលីគ PL ចាប់អារម្មណ៍មកលើ Ocampos ដូចគ្នា។ ស្ថិតិរដូវកាល ២០២១/២២ ដែលកំពុងជួយក្លឹបឈរលេខ ២ នៅលីគកំពូល La Liga គេបង្ហាញខ្លួន ៣៦ ប្រកួត រកបាន ៩ គ្រាប់និង Assist ៤ លើក។ អតីតកាលគេមិនធ្លាប់ឈរជើងឲ្យក្លឹបនៅអង់គ្លេសឡើយ ដោយមានតែក្លឹបបារាំង Marseille, Monaco និងក្លឹបអ៊ីតាលី AC Milan, Genoa។
យ៉ាងណាយើងមិនច្បាស់ថា West Ham នឹងឆ្លើយតបបកមកវិញ នូវចម្លើយយល់ព្រមឬអត់ ព្រោះនេះ ៨០ លានអឺរ៉ូ គឺរាប់ថាច្រើនណាស់ សម្រាប់ក្លឹបដែលមិនសូវហ៊ានចាយច្រើនដូចជាញញួរធំ។ គោលដៅផ្សេងទៀតរបស់ក្រុមដឹកនាំដោយលោក David Moyes គឺរួមមាន Darwin Nunez របស់ Benfica និង Raphinha របស់ Leeds United ជាដើម៕
ប្រភព៖ Estadio Deportivo