សម្រាប់ក្លឹបបារាំង Paris Saint-Germain ពេលវេលាទៅមុខអាចនឹងបាត់បង់នូវខ្សែប្រយុទ្ធ Kylian Mbappe ហើយឥឡូវក៏ស្រាប់តែទទួលដំណឹងថា Lionel Messi បានស្នើទៅថ្នាក់លើក្លឹប ឲ្យពិចារណាលើការនាំយកមិត្តរួមសញ្ជាតិ ដើម្បីមកបំពេញ ហើយមានការជឿជាក់អនាគតគេនឹងអាចក្លាយជាតារាឆ្នើមប្រចាំក្លឹប។
នោះគឺយុវជនវ័យ ១៧ ឆ្នាំ សញ្ជាតិអាហ្សង់ទីន Luka Romero។ បើតាមសារព័ត៌មាន Football Italia ចុះផ្សាយថា Messi ពិតជាចាប់អារម្មណ៍លើសមត្ថភាពកីឡាករលេងតំណែងប្រយុទ្ធស្លាបស្តាំខាងលើជាខ្លាំង ជាពិសេសកំឡុងពេលហ្វឹកហាត់នៅជម្រើសជាតិកាលពី International Break។
បុរសវ័យ ៣៤ ឆ្នាំ ចង់ឲ្យ PSG ទៅចរចាយក Romero ចេញពីក្លឹប Lazio ដែលជាក្លឹបអាណាព្យាបាល ទើបចាយអស់ ២០ មុឺនអឺរ៉ូ នាំយកគេចេញពី Mallorca ឈុត B កាលពីរដូវក្តៅឆ្នាំទៅ។ ឥឡូវតម្លៃខ្លួនគេក៏មិនឡើងខ្ពស់អ្វីដែរ ពោលអាចគុណ ១ ទ្វេជា ៥ ចូលល្បាក់ជាង ១ លានអឺរ៉ូប៉ុណ្ណោះ គ្រាន់ថាបែបណា ក៏ក្លឹបអ៊ីតាលីមិនងាយនឹងព្រមអនុញ្ញាតឲ្យគេចាកចេញ ដ្បិតអីសុពលភាពកុងត្រា សេសសល់ដល់ចុងខែមិថុនា ឆ្នាំ ២០២៣។
គួរបញ្ជាក់ថា រដូវកាលនេះ Romero បង្ហាញខ្លួនសរុប ៩ ប្រកួត មិនទាន់រកបានគ្រាប់បាល់នៅឡើយ ស្របពេលដែលនៅជម្រើសជាតិ គេក៏ទើបតែមានឱកាសបង្ហាញខ្លួនជាលើកដំបូងកាលពីខែមិនា។ តែមិនងាយទេ ការដែលម្ចាស់ពាន Ballon d’Or ៧ សម័យកាល ចាប់ចិត្តលើយុវជនណានោះ អ៊ីចឹងសារនេះ ប្រហែលជា PSG នឹងសាកល្បងព្យាយាមចូលចរចាមិនខាន៕
ប្រភព៖ Sportskeeda