Liverpool នឹងបានជាង ៣៥លាន$ ពី Barca បន្ថែមបើត្រូវបីលក្ខខណ្ឌដែល សំរាប់ការលក់ Coutinho

ខ្សែបម្រើ Philippe Coutinho បានផ្លាស់ពី Liverpool ទៅលេងអោយ Barcelona ក្នុងតំលៃ ១៨៥លានដុល្លារ កាលពីខែមករារដូវកាលមុន ក្រោយក្លឹបយក្សកាតាឡាន់ព្យាយាមតាមទិញរូបគេ អស់រយៈពេលជាច្រើនខែ។

បើទោះបីជាត្រូវលក់តារាឆ្នើមរូបនេះ ទៅអោយ Barcelona ក៏ពិតមែនប៉ុន្ដែក្លឹបហង្សក្រហម នៅមានកីឡាករឆ្នើមៗជាច្រើនទៀត រួមមាន Mohamed Salah និង មិត្តរួមក្រុមរបស់គេ ដែលបានធ្វើអោយ Liverpool នៅតែជាក្រុមដែលខ្លាំងមួយនៅតំបន់អឺរ៉ុប។

ពិតណាស់ Liverpool អាចទទួលបានទឹកប្រាក់បន្ថែមក្រោយពីការលក់ ខ្សែបម្រើប្រេស៊ីល វ័យ២៦ឆ្នាំ។ ហើយបើយោងតាមកាសែតអង់គ្លេស Daily Mirror បានអោយដឹងថា ក្លឹបដែលដឹកនាំដោយលោក Jurgen Klopp នឹងទទួលបានទឹកប្រាក់ ៣៥.៥លានដុល្លារបន្ថែមទៀត ប្រសិនបើឈានដល់លក្ខខណ្ឌបីដែលក្លឹបទាំងពីរបានចចារគ្នា។

លក្ខខណ្ឌទី១៖ ការបង្ហាញខ្លួនលើទីលាន

វាជារឿងដ៏សមញ្ញមួយ Barcelona ត្រូវតែហ៊ានចំនាយទឹកប្រាក់ដ៏ច្រើនសន្ធឹកសន្ធាប់របស់ពួកគេ ដើម្បីអោយព្រមលក់តារាឆ្នើមរបស់ក្លឹប។

ហើយសំរាប់កិច្ចព្រមព្រៀងសព្វថ្ងៃនេះ បើកាលណាដែលកីឡាករដែលបានដោះដូរ ចូលលេងបានច្រើនប្រកួត អ្នកត្រូវតែចំនាយបន្ថែមសំរាប់ក្លឹបដែលអ្នកបានទិញកីឡាកររូបនោះមក។ ហើយបើក្នុងករណីដែល Coutinho ចូលលេងបាន ១១០ប្រកួតនោះ Barca ត្រូវចំណាយ ២៣លានដុល្លារទៅអោយហង្សក្រហម។

លក្ខខណ្ឌទី២៖ Barcelona មានឈ្មោះទៅប្រកួតនៅ Champions League

នៅពេលដែល Barcelona អាចមានឈ្មោះទៅលេងនៅ Champions League នោះពួកគេត្រូវចំនាយអោយ Liverpool ៥.៧៥លានដុល្លារ។ ពួកគេនឹងទទួលបានទឹកប្រាក់បន្ថែមសំរាប់រដូវកាលនេះ ដរាបណាក្រុមអាចមានឱកាសចូលរួម Champions League នៅខែសីហាឆ្នាំក្រោយ។

លក្ខខណ្ឌទី៣៖ Barcelona ឈ្នះពាន Champions League

វាអាចជារឿងមួយដ៏លំបាក ប្រសិនបើមិនអាចធ្វើបាននូវលក្ខខណ្ឌទី២ ប៉ុន្ដែបើសិន Barcelona ឈ្នះពាន Champions League នោះ Liverpool ក៏នឹងទទួលបាន ៥.៧៥លានដុល្លារផងដែរ៕

ប្រភព៖ talkSPORT

មតិយោបល់