Mourinho ត្រៀម១១០លានអឺរ៉ូ ដើម្បីអន្ទងយកខ្សែប្រយុទ្ធមួយរូបពីអ៊ីតាលី

អ្នកចាត់ការ José Mourinho មានគោលដៅច្បាស់លាស់មួយនៅក្នុងអារម្មណ៍ ក្នុងការពង្រឹងក្រុម Manchester United នៅតំបន់ប្រយុទ្ធ នេះបើយោងតាមប្រភពកាសែតអាហ្សង់ទីន Olé។ ហើយអ្នកចាត់ការព័រទុយហ្គាល់រូបនេះ សង្ឃឹមថា ក្លឹបនឹងព្រមតាមការចង់បានរបស់លោក ក្នុងការចុះហត្ថលេខានាំយក ខ្សែប្រយុទ្ធ Mauro Icardi របស់ Inter Milan មកកាន់ទឹកដី Old Trafford។

ប្រធានក្រុមរបស់ Inter រកបាន ២៩គ្រាប់ សំរាប់ការបង្ហាញខ្លួន ៣៤ប្រកួតកាលពីរដូវកាលមុន ដែលអាចជះឥទ្ធិពលទៅដល់តំលៃនៃការផ្ទេរចេញ ប្រសិនបើក្លឹបណាមួយចង់បានរូបគេ។ បើតាមការរាយការណ៍បានបង្ហាញថាតំលៃ ផ្ដាច់កុងត្រារបស់ខ្សែប្រយុទ្ធអាហ្សង់ទីន មិនក្រោម១១០លានអឺរ៉ូនោះទេ ខណៈដែលកីឡាកររូបនេះ មានបំណងចង់ចាកចេញផងដែរ។

បច្ចុប្បន្ន Romelu Lukaku ជាខ្សែប្រយុទ្ធចំបងមួយរូបនៅ United ប៉ុន្ដែអនាគតរបស់ខ្សែប្រយុទ្ធរូបនេះ អាចនឹងផ្លាស់ប្ដូរនាពេលខាងមុខ ហើយប្រសិនបើ Icardi ចាកចេញពី Inter ពិតមែន តំលៃខ្លួនរបស់គេនឹងមិនក្រោមតំលៃដែលបានបញ្ជាក់ខាងលើនោះទេ៕

ប្រភព៖ AS