Nacho ទំលាយពាក្យក្នុងចិត្តជុំវិញស្ថានភាពរបស់ក្រុម និង ការចាកចេញរបស់ CR7 ទៅ Juve

ខ្សែការពារ Nacho Fernandez បាននិយាយថា កីឡាកររបស់ក្លឹប Real Madrid នឹងតស៊ូដល់ថ្ងៃស្លាប់ ជាមួយ គ្រូបង្វឹក Julen Lopetegui ដែលរងសំពាធខ្លាំង ក្រោយមិនអាចដឹកនាំក្រុមរកគ្រាប់បាល់បាន៤ប្រកួតជាប់ៗគ្នា ដែលកំណត់ត្រាដ៏អាក្រក់មួយនេះ មិនដែលកើតមានឡើង ចាប់តាំងពីឆ្នាំ ១៩៨៥ មកម្ល៉េះ។

ក្រុមរបស់លោក Lopetegui បានបរាជ័យក្នុងលទ្ធផល ១-០ ទល់នឹងក្រុម Alaves មុនការសំរាកប្រកួតអន្ដរជាតិមកដល់ ហើយក្រុមការពារជើងឯកពានអឺរ៉ុប ក៏បរាជ័យក្នុងការប្រកួតទល់នឹងក្រុម CSKA Moscow នៅក្នុងការប្រកួត Champions League។

បន្ទាប់ពីបរាជ័យ៣លើកក្នុងចំនោម៤ប្រកួត បានធ្វើអោយលោក Lopetegui រងនូវសំពាធ ហើយមានការរាយការណ៍មកថា Madrid មានគំរោងពិចារណាទៅលើអនាគតរបស់អតីតគ្រូបង្វឹកជម្រើសជាតិអេស្ប៉ាញរូបនេះ ក្នុងជំនួប El Clasico ទល់នឹងក្រុម Barcelona នៅថ្ងៃទី២៨ តុលាខាងមុខនេះ។

ហើយ Nacho ដែលជាកូនក្រុមរបស់លោក បានចេញមុខការពារគ្រូបង្វឹករបស់ខ្លួន ប្រាប់ទៅ EFE ថា៖ “យើងជាកីឡាករគឺនៅជាមួយគាត់ដល់ដង្ហើមចុងក្រោយ។ យើងរំងាប់អារម្មណ៍ ហើយយើងធ្លាប់ជួបស្ថានភាពអាក្រក់បែបនេះរួចមកហើយ យើងក៏អាចដោះស្រាយវាបាន។

“ខ្ញុំមិនអាចធានាថាយើងអាចឈ្នះគ្រប់ពានរង្វាន់នោះទេ ប៉ុន្ដែ Real Madrid នៅតែបង្ហាញអោយឃើញថា ទាំងគ្រូបង្វឹក និង កីឡាករដែលយើងមាន នឹងព្យាយាមជំនះរាល់ឧបសគ្គគ្រប់យ៉ាង។ យើងនឹងតស៊ូរហូតដល់ទីបញ្ចប់។”

ចំពោះការអវត្តមានរបស់ Cristiano Ronaldo ខ្សែការពារអេស្ប៉ាញរូបនេះបាននិយាយថា៖ “នៅដើមរដូវកាល យើងរកគ្រាប់បាល់បានច្រើនគ្រាប់ ប៉ុន្ដែគ្មាននរណាម្នាក់ខ្វល់ពីគាត់នោះទេ។ គាត់ចាប់ផ្ដើមនៅ Juventus ប៉ុន្មានប្រកួតដោយមិនអាចរកគ្រាប់បាល់បាន ពេលនោះគេនាំគ្នានិយាយថា ដោយសារតែគាត់បានចាកចេញពី Real Madrid។

“គាត់ធ្លាប់ជាកីឡាករដ៏សំខាន់មួយរូប ព្រោះគាត់អាចរកគ្រាប់បាល់បានលើសពី៥០គ្រាប់ ក្នុងមួយរដូវកាល ប៉ុន្ដែវាមិនមែនជារឿងត្រូវបន្ទោសយើងនោះទេ ហើយយើងមិនគួរសោកស្ដាយអ្វីដែលបានកើតឡើងពីអតីតនោះដែរ។”

ប្រភព៖ Be Soccer

មតិយោបល់