Navas ទំលាយពាក្យក្នុងចិត្តរបស់ខ្លួន ក្រោយមិនមានមុខក្នុងការប្រកួត ក្រោមការដឹកនាំរបស់គ្រូថ្មី

បន្ទាប់ពីលោក Santiago Solari ចូលកាន់តំណែងជា អ្នកចាត់ការក្លឹប Real Madrid អ្នកចាំទី Keylor Navas មិនសូវបានបង្ហាញមុខសំរាប់ការប្រកួតប៉ុន្មានទេ។ គ្រូបង្វឹកអាហ្សង់ទីន ជ្រើសរើសតែ អ្នកចាំទី Thibaut Courtois ប៉ុណ្ណោះសំរាប់ជម្រើស១១នាក់ដំបូងរបស់លោក ហើយ Navas បានបង្ហាញខ្លួនសំរាប់ជម្រើសដំបូង តែម្ដងប៉ុណ្ណោះ ក្នុងការប្រកួត Copa del Rey ទល់នឹងក្រុម Melilla។

ហើយអ្នកចាំទីសញ្ជាតិកូស្ដារីការូបនេះ បានបង្ហាញអារម្មណ៍ពិតរបស់ខ្លួន នៅក្នុងបទសម្ភាសន៍ របស់ទូរទស្សន៍អេស្ប៉ាញ កាលពីយប់ថ្ងៃព្រហស្បត្តិ៍កន្លងទៅ ដោយ Navas បាននិយាយយ៉ាងខ្លីថា៖ “ខ្ញុំលេងពីឈ្នះ Champions League បីរដូវកាលជាប់គ្នា រហូតដល់អត់បានចូលលេងសោះ។”

គួររំលឹកថា ក្នុងកំឡុងពេលដែលលោក Julen Lopetegui នៅដឹកនាំក្រុម Navas និង Courtois ស្ថិតនៅក្នុងប្រព័ន្ធឆ្លាស់គ្នា ដោយអ្នកចាំទីកូស្ដារីកា ត្រូវបានជ្រើសរើសអោយលេងនៅ Champions League ហើយ អ្នកចាំទីបែលហ្ស៊ិក ត្រូវជ្រើសរើសអោយលេងនៅ LaLiga។ ប៉ុន្ដែប្រព័ន្ធនេះ មិនត្រូវបានប្រើប្រាស់នោះទេ ក្រោមការដឹកនាំរបស់លោក Solari ដែលធ្វើអោយអនាគតរបស់ Navas កាន់តែស្រពេចស្រពិលនៅទឹកដី Santiago Bernabeu៕

ប្រភព៖ AS

មតិយោបល់