ការវិលត្រលប់របស់ Cristiano Ronaldo ក្រោយសម្រាកព្យាបាលជំងឺ COVID-19 អស់រយៈពេលជាង ២ សប្តាហ៍ លោកបានក្លាយជាចំណែកដ៏សំខាន់មួយដែលជួយឲ្យក្លឹប Juventus យកឈ្នះម្ចាស់ដី Spezia ក្រោមលទ្ធផល ១-៤ កាលពីយប់មិញ។
ចំពោះការយកបាន ៣ ពិន្ទុនេះសោត តារាឆ្នើម CR7 មិនបានឈ្នះ MOTM នោះទេ ត្បិតបើរកបាន ២ គ្រាប់តាមរយៈការឈរជើងលើទីលានមិនដល់ ៤០ នាទីពេញលេញក្តី។
បើតាមការវាយតម្លៃពី WhoScored នោះគឺ Alvaro Morata ឯណោះទេ ដែលគេរកបាន ១ គ្រាប់និង Assist ១ បាន ៨,៩ ពិន្ទុ ខណៈកីឡាករព័រទុយហ្គាល់បាន ៧,៨ ពិន្ទុ ខ្ពស់ជាងគេលំដាប់ទី ៣ បន្ទាប់បី Chiesa ប្រយុទ្ធស្លាបវ័យក្មេងបាន ៧,៩ ពិន្ទុ។
ដោយឡែកសម្រាប់កីឡាករបានពិន្ទុទាបបំផុតប្រចាំការប្រកួត នោះគឺជាអ្នកចាំទីរបស់ក្រុមម្ចាស់ផ្ទះកីឡាករ Provedel បានត្រឹម ៥,០ ពិន្ទុប៉ុណ្ណោះ ក្រោយពីមិនអាចសង្រ្គោះបាល់សូម្បីតែមួយលើកក្នុងការប្រកួត៕
ប្រភព៖ WhoScored
អានអត្ថបទបន្ទាប់៖ គ្រប់គ្នាគេពាក់អាវមានប៉ាក់រូបផ្កា ចម្លែកតែ Matic អត់ពាក់ដូចគេ តើដោយសារមូលហេតុអ្វី?
នៅកំឡុងខែវិច្ឆិកាជារៀងរាល់ឆ្នាំ ក្លឹបនៅ Premier League ទាំងអស់នឹងអនុវត្តទំនៀមទម្លាប់មួយដែលបណ្តាកីឡាករមានប៉ាក់រូបផ្កានៅលើអាវរបស់ពួកគេ។ ដោយក្នុងការប្រកួតដ៏ធំរវាង Arsenal និង Man Utd កាលពីយប់មិញ ក៏ដើរតាមសកម្មភាពបែបហ្នឹងដែរ តែសម្រាប់ Nemanja Matic គឺមិនបានអនុវត្តនោះទេ។
ហេតុផលដែលខ្សែបម្រើរបស់ក្លឹប Man Utd មិនអនុវត្តដូចបណ្តាកីឡាករដទៃ ក៏ដោយសារតែគេមិនអាចទទួលយកនូវភាពឈឺចាប់ ដែលធ្លាក់លើប្រទេសជាតិរបស់គេ កំឡុងពេលមានសង្រ្គាមកាលពីជាង ២០ ឆ្នាំមុន។
នោះគឺកើតឡើងនៅឆ្នាំ ១៩៩៩ ក្នុងប្រទេសស៊ែប៊ី នៅពេលដែល Matic ទើបតែមានអាយុ ១២ ឆ្នាំ ហើយក្នុងប្រទេសនិងតំបន់រស់នៅរបស់គេមានមនុស្សស្លាប់និងរងរបួសជាច្រើន ក៏ដោយសារតែការទម្លាក់គ្រាប់បែកក្នុងដំណើរការប្រតិបត្តិការយោធាដែលមានប្រទេសជាច្រើនចូលរួម ហើយរួមទាំងយោធារបស់ចក្រភពអង់គ្លេសផងដែរ។
បែបនេះមានន័យថា យោធាអង់គ្លេសក៏មានចំណែកក្នុងការស្លាប់របស់ប្រជាជននៅឯប្រទេសស៊ែប៊ីនាឆ្នាំនោះដូចគ្នា អ៊ីចឹងហើយទើប Matic មិនអាចពាក់រូបផ្កាលើអាវតំណាងដល់ការគោរពសម្រាប់ក្រុមយោធាដែលធ្លាប់សម្លាប់ជាតិសាសន៍របស់គេបាន៕