តារាឆ្នើមឲ្យក្លឹបហង្ស កីឡាករ Mohamed Salah ត្រូវបានគេថតបានទិដ្ឋភាពប្រើប្រាស់ទូរសព្ទអំឡុងពេលបើកបរ ក្រោយបញ្ចប់ភារកិច្ចយកឈ្នះលើក្លឹប West Ham នៅលទ្ធផល ៤–០ កាលពីយប់ថ្ងៃអាទិត្យ។
បុរសសញ្ជាតិអេហ្ស៊ីបធ្លាប់តែទទួលបានការគោរពស្រលាញ់ កំពុងមានការមិនពេញចិត្តពីសំណាក់អ្នកគាំទ្រជាច្រើនជុំវិញទង្វើមួយនេះ ដោយចោទថាអំឡុងអ្នកគាំទ្រទៅសូមចុះហត្ថលេខានិងថតរូបជាមួយ ប៉ុន្តែ Salah នៅតែបន្តបើកបររថយន្ត ព្រមជាមួយទូរសព្ទជាប់នៅនឹងដៃ ក្នុងរថយន្ត Mercedes SUV តម្លៃជាង ៥០ ០០០ ផោនរបស់ខ្លួន។
គ្រានោះគេឃើញថាអ្នកគាំទ្រវ័យក្មេងម្នាក់បានរត់ទៅសូមថតរូបជាមួយ ប៉ុន្តែត្រូវបានខ្សែប្រយុទ្ធរូបនេះបដិសេធមិនឆ្លើយតប ដោយឡែកការផ្តល់មតិពី David Humphries បានសរេសរថា៖ “គាត់គួរតែត្រូវចាប់ខ្លួនក្រោមទង្វើប្រើប្រាស់ទូរសព្ទអំឡុងពេលបើកបរ ដោយគ្មានការលើកលែងអ្វីទាំងអស់“។
ខណៈអ្នកគាំទ្រមួយរូបទៀត Su Besncon-Carson បន្ថែម៖ “ជារឿងមិនល្អមួយ ដែលគាត់គួរតែបើកផ្លូវផ្តល់ហត្ថលេខាឲ្យអ្នកគាំទ្រវ័យក្មេងនោះ“។ បន្ថែមពី Smith ៖ “ជាពិសេសគេបើកបរបណ្តើរ ចុចទូរសព្ទ ដោយនោះខុសបំផុតត្រង់ថាពេលនោះក៏ក្មេងកំពុងរត់ទៅក្បែររថយន្តនោះទៀត“។
ប្រភព: TheSun