សម្រាប់ Mesut Ozil មិនយូរនោះទេ ដោយអាចនៅចុងសប្តាហ៍នេះក្លឹប Arsenal នឹងប្រកាសអំពីការចែកផ្លូវ ខណៈដែលសាមីខ្លួនបានហោះទៅដល់ក្លឹប Fenerbache ក្នុងប្រទេសទួរគីរួចទៅហើយ។
យ៉ាងណាមិញក្រុមមានមូលដ្ឋានក្នុងទីក្រុងឡុង ក៏បានប្រកាសនៅដំណឹងផ្លូវការមួយអំពីការចាកចេញរបស់កីឡាករមួយរូបផ្សេងទៀត នោះគឺ Sokratis Papastathopoulos ដែលលេងនៅតំណែងខ្សែការពារ។
បុរសវ័យ ៣២ ឆ្នាំបានផ្ទេរចេញពី Dortmund មកចូលរួមនៅ Arsenal កាលពីខែកក្កដា ឆ្នាំ ២០១៨ ហើយតាមពិតទៅកុងត្រារបស់គេត្រូវផុតនៅបញ្ចប់រដូវកាល ២០២០/២១ ឯណោះ ប៉ុន្តែក្លឹបបានទូទាត់បញ្ចប់កុងត្រាមុនកាលកំណត់រយៈពេលជាង ៥ ខែ។ គិតមកត្រឹមថ្ងៃទី ២០ មករា គេជាកីឡាករឥតតម្លៃខ្លួនលើទីផ្សារដោះដូរជាផ្លូវការ។
រំឭកថា Sokratis បានជួយឲ្យក្រុមដឹកនាំដោយលោក Mikel Arteta ឈ្នះពាន FA Cup កាលពីខែសីហា ឆ្នាំ ២០២០ កន្លងទៅ ដោយកាលនោះបានយកឈ្នះទៅលើក្រុមតោខៀវ Chelsea។ ដោយឡែកវាក៏បានក្លាយជាប្រកួតចុងក្រោយសម្រាប់កីឡាករសញ្ជាតិក្រិករូបនេះផងដែរ៕
ប្រភព៖ Sportsmole
អានអត្ថបទបន្ទាប់៖ Pochettino ទម្លាយថាគាត់ប៊ិះតែខ្ចីជើង Messi ទៅឲ្យក្លិបមួយនេះបានទៅហើយ កាលគេនៅមានវ័យជំទង់
លោក Mauricio Pochettino បានបង្ហើបឱ្យដឹងថាគាត់ធ្លាប់ខិតជិត ក្នុងការនាំយក Lionel Messi មកលេងក្រោមការដឹកនាំរបស់ខ្លួន កាលនៅដឹកនាំឲ្យក្រុម Espanyol ស្របពេលបច្ចុប្បន្នក្រុម PSG កំពុងមានទំនាក់ទំនងខ្លាំង ក្នុងការចុះហត្ថលេខាលើខ្សែប្រយុទ្ធអាហ្សង់ទីនរូបនេះ ។
ជាក់ស្តែងក្រុមម្ចាស់ជើងឯក Ligue 1 ត្រូវបានគេរាយការណ៍ថាកំពុងស្ថិតក្នុងចំណោមក្លិបកំពូលៗ ផ្សេងទៀត ដែលមានចេតនាចុះហត្ថលេខាលើ Messi ប្រសិនបើគេសំរេចចិត្តចាកចេញពី Barcelona នៅចុងបញ្ចប់នៃរដូវកាល ២០២០-២១ នេះនោះ ។
រំលឹកផងដែរថា Messi ហាក់មិនបានបដិសេធអំពីបំណងប្រាថ្នារបស់ខ្លួន ក្នុងការដើរចេញពីទឹកដី Camp Nou កាលពីរដូវក្តៅមុននោះទេ ស្របពេលបេក្ខភាពប្រធានក្លិបថ្មី លោក Joan Laporta សង្ឃឹមថាការឡើងកាន់តំណែងរបស់គាត់ នឹងជួយបញ្ចុះបញ្ចូលខ្សែប្រយុទ្ធរូបនេះ ឱ្យស្នាក់នៅបន្តទៀត ។
ហើយយ៉ាងណាមិញ Pochettino ហាក់មិនចង់និយាយអ្វីច្រើននោះទេ អំពីចំណាប់អារម្មណ៍របស់ក្រុម PSG ទៅលើ Messi នាពេលបច្ចុប្បន្ននេះ ប៉ុន្តែបុរសសញ្ជាតិអាហ្សង់ទីនរូបនេះ ក៏បានរំលឹកថាគាត់ធ្លាប់ខិតជិតនាំយកកីឡាករជំនាញជើងឆ្វេងរូបនេះ មកលេងក្រោមការដឹកនាំរបស់ខ្លួនដែរ ពេលគេនៅមានវ័យជំទង់នៅឡើយ ។
មិនតែប៉ុណ្ណោះ លោក Pochettino បានពន្យល់ទៅកាន់ El Larguero ថា ៖ “ Messi ទៅ PSG ? ខ្ញុំអត់មានយោបល់អ្វីទេ ។ ប៉ុន្តែនៅពេលខ្ញុំនៅក្លិប Espanyol ឬ Southampton ក្តីសុបិន្តរបស់ខ្ញុំគឺចង់មានកីឡាករឆ្នើមៗ នៅក្រុមរបស់ខ្ញុំ ហើយ Messi គឺធ្លាប់ខិតជិតខ្ចីជើងមកកាន់ Espanyol ផងដែរ” ។
លោកបន្តទៀតថា ៖ ” កិច្ចព្រមព្រៀងនេះគឺមានភាពខិតជិតមែនទែន ប៉ុន្តែគាត់បានបង្ហាញទម្រង់លេងដ៏អស្ចារ្យមួយ ក្នុងការប្រកួតមិត្តភាពនៅឯ Trofeo Gamper ដែលនោះហើយរឿងគ្រប់យ៉ាងត្រូវបានបញ្ចប់ទៅវិញ ។ ហើយពេលនេះ ខ្ញុំពិតជាមិនចង់និយាយអ្វីអំពី Messi ច្រើនទេ ស្របពេលដែលអ្វីៗ គឺនៅមិនទាន់មានភាពច្បាស់លាស់នៅឡើយ” ៕
ប្រភព: Goal