Mesut Ozil ដែលទើបតែផ្ទេរចេញពី Arsenal មកចូលរួមនៅក្លឹបទួរគី Fenerbahce បានមានឱកាសបង្ហាញខ្លួននៅប្រកួតដំបូងរបស់គេហើយកាលពីយប់មិញ។
នោះគឺនៅជំនួបទល់ក្រុម Hatayspor ដែលគេបានប្តូរចូលនៅ ១៥ នាទីចុងក្រោយ។ ត្បិតបើ Ozil មានឱកាសប៉ះបាល់បានតែ ២ លើកក្តី ប៉ុន្តែគេបានបង្កើតឱកាសយក ៣ ពិន្ទុឲ្យក្រុម ដែលធ្វើឲ្យមានការសរសើរមិនដាច់ពីមាត់។
Ozil ដែលប្តូរចូលនៅតង់ទីពីរជំនួស Mame Thiam មកដល់នាទី ៨៨ គេបានអូសបាល់មកស្លាបខាងស្តាំ ហើយព្យាយាមក្រុសកាត់ទៅក្នុងប្រអប់គ្រោះថ្នាក់ តែសំណាងអីកីឡាករ Jean Claude របស់ក្រុមម្ចាស់ផ្ទះបែរជាឈូសបាល់នោះបញ្ចូលទីខ្លួនឯង ឲ្យកើតមានជាបាល់ Own Goal ប៉ុន្តែទទួលបានការកាត់ចេញពីជើងរបស់ Ozil។ បញ្ចប់លទ្ធផល ៩០ នាទី Fenerbahce យកឈ្នះម្ចាស់ផ្ទះ ២-១។
ទស្សនាវីដេអូ Highlight ខាងក្រោម៖
https://www.youtube.com/watch?v=yiCryeIqDZk
បញ្ជាក់ថា បច្ចុប្បន្ន Fenerbahce ឡើងមកឈរកំពូលតារាង Super Lig ដោយមាន ៤៨ ពិន្ទុ នាំមុខ Galatasaray ៣ ពិន្ទុ ដែលជាឱកាសល្អសម្រាប់ក្រុមក្នុងការបន្តដណ្តើមយកកៅអីលេងនៅ Champions League រដូវកាលក្រោយ៕
ប្រភព៖ BeSoccer
អានអត្ថបទបន្ទាប់៖ ទីបំផុតគ្រាប់បាល់ Cristiano Ronaldo យកឈ្នះ Bican និង Pele មែនទែនហើយ
កាលពីប៉ុន្មានថ្ងៃមុននៅតែមានមតិចម្រូង.ចម្រាសថាគ្រាប់បាល់របស់ Cristiano Ronaldo នៅមិនទាន់អាចក្លាយជាកីឡាកររកបានគ្រាប់បាល់ច្រើនបំផុតក្នុងប្រវត្តិសាស្ត្រទេ។
នោះក៏ដោយសារគ្រាប់បាល់ផ្លូវការដែលគេប្រកាស Josef Bican រកបាន ៧៥៩ គ្រាប់ ធាតុពិតគឺរកបាន ៧៦២ គ្រាប់ឯណោះ ពោលគឺស្មើនឹង Pele [តួលេខចាស់គេកំណត់ថា Pele រកបាន ៧៥៧ គ្រាប់)។
យ៉ាងណាមិញឆ្លងកាតយប់មិញនេះ CR7 បានបន្ថែម ២ គ្រាប់ទៀតហើយនៅជំនួបទល់ Inter Milan ដែលរំកិលឲ្យគ្រាប់បាល់ក្នុងអាជីពរបស់កីឡាករព័រទុយហ្គាល់កើនឡើងសរុបដល់ ៧៦៣ គ្រាប់។ តាមរបាយការណ៍ពី Marca បានអះអាងថា លទ្ធផលនេះគឺសម្រេចយកច្បាស់ការហើយថា Ronaldo នាំមុខដាច់គេទាំងអស់ក្នុងប្រវត្តិសាស្ត្រ។
សម្រាប់ Ronaldo មានគ្រាប់បាល់ ៣១ គ្រាប់នៅ Sporting CP ១១៨ គ្រាប់នៅ Man Utd ៤៥១ គ្រាប់នៅ Real Madrid ១១១ គ្រាប់នៅ Juventus និង ១០២ គ្រាប់នៅព័រទុយហ្គាល់។ តួលេខច្បាស់ការដែលកីឡាករដទៃអាចមានឱកាសប្រជែង Ronaldo បានក្នុងសម័យកាលនេះ គឺមានតែ Lionel Messi តែប៉ុណ្ណោះ ដែលគេឈរលេខរៀងទី ៥ មាន ៧២០ គ្រាប់និងមិនទាន់ចូលនិវត្ត៕
ប្រភព៖ Marca