ក្លឹប Atletico Madrid នឹងបើកទ្វារទទួល Lionel Messi ជានិច្ច សម្រាប់ការត្រៀមផុតកុងត្រារបស់គេនៅពេលដ៏ខ្លីខាងមុខ។ នេះបើតាមសម្តីរបស់ខ្សែប្រយុទ្ធនិងជាមិត្តរួមសញ្ជាតិអាហ្សង់ទីនកីឡាករ Angel Correa។
ជាមួយសារនេះបានធ្វើឲ្យអ្នកគាំទ្រកំពុងមានមន្ទិលសង្ស័យមួយកម្រិតទៀតថា តើ Messi អាចនឹងសម្រេចចិត្តទៅចូលរួមជាមួយ Atletico Madrid ដែលមានមិត្តចាស់ Luis Suarez របស់ខ្លួននៅទីនោះមែនឬយ៉ាងណា?
បើតាមការបញ្ជាក់របស់ Correa ប្រាប់ TyC Sports កន្លងទៅ៖ “Atletico Madrid បើកទ្វារសម្រាប់ Messi ដោយខ្ញុំមិនយល់ទេថាហេតុអ្វី Barcelona អនុញ្ញាតឲ្យលេខ ៩ ល្អដូចជា Suarez ចាកចេញ”។
លោកសង្កត់ធ្ងន់៖ “គេជាខ្សែប្រយុទ្ធដ៏អស្ចារ្យ ហើយយើងពិតជារីករាយពន់ពេកពេលមានគេនៅជាមួយយើង ដោយខ្ញុំសង្ឃឹមថាគេនឹងបន្តលេងល្អបែបហ្នឹង ពីព្រោះយើងសុទ្ធសឹងតែចង់បញ្ចប់រដូវកាលនេះដោយក្តីរីករាយ”។
គួររំឭកថា បច្ចុប្បន្ន At Madrid កំពុងឈរកំពូលតារាង La Liga ដោយមាន ៥០ ពិន្ទុនាំមុខដាច់ ១០ ពិន្ទុធៀបនឹង Barcelona/Real Madrid ហើយនៅសល់ប្រកួតក្នុងដៃមួយជុំថែមទៀត៕
ប្រភព៖ BeSoccer
អានអត្ថបទបន្ទាប់៖ ទីបំផុតគ្រាប់បាល់ Cristiano Ronaldo យកឈ្នះ Bican និង Pele មែនទែនហើយ
កាលពីប៉ុន្មានថ្ងៃមុននៅតែមានមតិចម្រូង.ចម្រាសថាគ្រាប់បាល់របស់ Cristiano Ronaldo នៅមិនទាន់អាចក្លាយជាកីឡាកររកបានគ្រាប់បាល់ច្រើនបំផុតក្នុងប្រវត្តិសាស្ត្រទេ។
នោះក៏ដោយសារគ្រាប់បាល់ផ្លូវការដែលគេប្រកាស Josef Bican រកបាន ៧៥៩ គ្រាប់ ធាតុពិតគឺរកបាន ៧៦២ គ្រាប់ឯណោះ ពោលគឺស្មើនឹង Pele [តួលេខចាស់គេកំណត់ថា Pele រកបាន ៧៥៧ គ្រាប់)។
យ៉ាងណាមិញឆ្លងកាតយប់មិញនេះ CR7 បានបន្ថែម ២ គ្រាប់ទៀតហើយនៅជំនួបទល់ Inter Milan ដែលរំកិលឲ្យគ្រាប់បាល់ក្នុងអាជីពរបស់កីឡាករព័រទុយហ្គាល់កើនឡើងសរុបដល់ ៧៦៣ គ្រាប់។ តាមរបាយការណ៍ពី Marca បានអះអាងថា លទ្ធផលនេះគឺសម្រេចយកច្បាស់ការហើយថា Ronaldo នាំមុខដាច់គេទាំងអស់ក្នុងប្រវត្តិសាស្ត្រ។
សម្រាប់ Ronaldo មានគ្រាប់បាល់ ៣១ គ្រាប់នៅ Sporting CP ១១៨ គ្រាប់នៅ Man Utd ៤៥១ គ្រាប់នៅ Real Madrid ១១១ គ្រាប់នៅ Juventus និង ១០២ គ្រាប់នៅព័រទុយហ្គាល់។ តួលេខច្បាស់ការដែលកីឡាករដទៃអាចមានឱកាសប្រជែង Ronaldo បានក្នុងសម័យកាលនេះ គឺមានតែ Lionel Messi តែប៉ុណ្ណោះ ដែលគេឈរលេខរៀងទី ៥ មាន ៧២០ គ្រាប់និងមិនទាន់ចូលនិវត្ត៕
ប្រភព៖ Marca