បច្ចុប្បន្នលោក Jose Mourinho ហាក់កំពុងទទួលរងសម្ពាធយ៉ាងខ្លាំង បន្ទាប់ពីបានដឹកនាំក្រុម Tottenham Hotspur ចាញ់ ៥ ប្រកួត ក្នុងចំណោម ៦ ប្រកួតលើកចុងក្រោយ ខណ:វាត្រូវបានគេរាយការណ៍ថាទៀតថាបុរសសញ្ជាតិព័រទុយហ្គាល់រូបនេះ នឹងត្រូវទុកពេលរយ:ពេល ១២ ថ្ងៃទៀត ដើម្បីស្រោចស្រង់ស្ថានការណ៍របស់ក្រុម មុនពេលត្រូវសម្រេចថាអនាគតរបស់គាត់នៅតែមានទៀតឬអត់ នៅរដូវកាលក្រោយ ។
យ៉ាងណាមិញ របាយការណ៍ចុងក្រោយមួយបានបង្ហាញថាពេលនេះ ក្រុម Tottenham កំំពុងតែដាក់គោលដៅទៅលើលោក Julian Nagelsmann ដើម្បីត្រៀមសម្រាប់ជំនួសតំណែងរបស់លោក Jose Mourinho ប្រសិនបើគ្រូបង្វឹករូបនេះ នៅតែបន្តដឹកនាំក្រុមទទួលរងបរាជ័យទៀតនោះ ។
ជាក់ស្តែងក្រុម Spurs នឹងត្រូវជួបប្រកួតជាមួយ Wolfsberger សម្រាប់ពានរង្វាន់ប្រកខ័ណ្ឌ Europa League នៅថ្ងៃពុធខាងមុខនេះ មុនពេលធ្វើការប្រកួតក្នុងលីគ ជាមួយក្រុម Burnley, Fulham និង Crystal Palace ។
លើសពីនេះ ប្រភពព័ត៌មានពី The Telegraph បានឱ្យដឹងទៀតថាក្រុម Spurs ហាក់កំពុងរៀបចំផែនការរបស់ពួកគេរួចស្រេចទៅហើយ ប្រសិនបើលោក Mourinho នៅតែមិនអាចផ្លាស់ប្តូរលទ្ធផលរបស់ក្រុម ឲ្យវិលត្រឡប់មករកភាពល្អប្រសើឡើងវិញ ជាមួយនឹងគ្រូបង្វឹកបច្ចុប្បន្នរបស់ក្រុម RB Leipzig លោក Nagelsmann ដែលកំពុងឈរលើកំពូលបញ្ជីសម្រាប់ត្រៀមមកជំនួសតំណែងនេះវិញ ។
គួរបញ្ជាក់ផងដែរថា លោក Nagelsmann ដែលមានវ័យត្រឹមតែ ៣៣ ឆ្នាំ ត្រូវបានគេចាត់ទុកជាគ្រូបង្វឹកឆ្នើមបំផុតម្នាក់ ក្នុងចំណោមគ្រូបង្វឹកដែលលេចធ្លោជាងគេនៅអ៊ឺរ៉ុប ដោយសារតែគាត់បានដឹកនាំក្រុម Leipzig ឡើងទៅលេងនៅក្នុងក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រកាលពីរដូវកាលមុន ហើយថែមទាំងកំពុងប្រកួតប្រជែងជាមួយ Bayern សម្រាប់ពានរង្វាន់លីគ រដូវកាលនេះថែមទៀតផង ៕
ប្រភព: Allfootball
អានអត្ថបទបន្ទាប់៖ Suarez ថា Barcelona ហ៊ានទាំងនិយាយពាក្យនេះដាក់ខ្លួនទៀត មុនចាកចេញពីក្លឹប
Luis Suarez បាននឹងកំពុងបង្ហាញឲ្យក្លឹប Barcelona មានការសោក.ស្តាយជាពន់.ពេកជាមួយនឹងទម្រង់លេងដ៏ល្អឥតខ្ចោះរបស់គេនៅក្លឹបថ្មី Atletico Madrid ដែលបច្ចុប្បន្នជាក្លឹបលេខ ១ នៅ La Liga និងកំពុងឈរចំណាត់ថ្នាក់ Top Scorer រកបាន ១៦ គ្រាប់ថែមទៀត។
មុនការប្រកួតទល់ក្លឹប Chelsea មកដល់នៅរាត្រីនេះ Suarez ក៏បានឆ្លៀតលើកឡើងសារជាថ្មីពាក់ព័ន្ធនឹងការចាកចេញរបស់ខ្លួន ហើយថា Barcelona ធ្លាប់និយាយខ្លួនចាស់ពេក និងមិនអាចលេងបាននៅកម្រិតដ៏ល្អបំផុតទៀតនោះទេ។
បុរសវ័យ ៣៤ ឆ្នាំនិយាយ៖ “អ្វីដែលរំខានខ្ញុំបំផុតនោះ គឺពួកគេធ្លាប់បានប្រាប់ខ្ញុំថាខ្ញុំចាស់ណាស់ ហើយមិនអាចលេងនៅកម្រិតដ៏ខ្ពស់ទៀតនោះទេ ពោលមិនអាចដើរតួក្នុងក្រុមដ៏ល្អមួយឡើយ ដោយវាជាអ្វីដែលខ្ញុំមិនចូលចិត្ត”។
លោកបន្ថែមទៀតថា៖ “បើថាខ្ញុំធ្វើអ្វីមិនបានសោះនៅ Barcelona នារយៈពេល ៣ ឬ ៤ រដូវកាលនោះ អ៊ីចឹងខ្ញុំយល់បាន តែនេះរៀងរាល់ឆ្នាំខ្ញុំស៊ុតលើសពី ២០ គ្រាប់/រដូវកាល ដោយតែងតែមានស្ថិតិល្អហើយនៅពីក្រោយតែ Leo (Messi) ម្នាក់ប៉ុណ្ណោះ បែបនេះយើងមើលឃើញហើយថា វាមិនមែនជារឿងងាយទេក្នុងការលេងនៅ Barca ដោយកីឡាករជាច្រើនដែលបានចុះហត្ថលេខានៅទីនោះមិនអាចស្ថិតនៅកម្រិតដែលក្លឹបចង់បាន តែខ្ញុំក៏នៅតែគិតថាខ្ញុំសក្តិសមនឹងទទួលបានការឲ្យតម្លៃខ្លះពីក្លឹប ទាំងដែលខ្ញុំលេងនៅទីនោះ ៦ ឆ្នាំហើយរក្សាការលេងនៅកម្រិតដ៏ល្អមួយទៀត”៕
ប្រភព៖ Goal