ខ្សែប្រយុទ្ធ Kylian Mbappe បាននិយាយពាក់ព័ន្ធជាមួយក្រុម Bayern Munich នៅពេលដែលគេបានបង្ហាញថាកីឡាករ Lucas Hernandez ធ្លាប់បានបញ្ចុះបញ្ចូលឲ្យខ្លួន ចូលរួមជាមួយក្លិបយក្សនៅ Bundesliga មួយនេះ ។
ជាក់ស្តែង Mbappe ត្រូវបានភ្ចាប់ទំនាក់ទំនងយ៉ាងខ្លាំង ជាមួយនឹងការផ្លាស់ប្តូរទៅកាន់ក្លិប Real Madrid មុនពេលទីផ្សារដោះដូរកីឡាកររដូវក្តៅមកដល់ បន្ទាប់ពីគេនៅតែមិនទាន់ឈានដល់ការចុះកិច្ចព្រមព្រៀងថ្មីណាមួយបន្ថែមទៀត ជាមួយក្រុម Paris Saint-Germain នៅឡើយនោះទេ ។
តែទោះយ៉ាងណាក៏ដោយកីឡាករវ័យ ២២ ឆ្នាំរូបនេះ បាននិយាយថាមិត្តរួមក្រុមជម្រើសជាតិបារាំង គឺកីឡាករ Hernandez បានព្យាយាមបញ្ចុះបញ្ចូលខ្លួនឱ្យជ្រើសរើសយកផ្លូវផ្សេងមួយទៀត ពីការផ្លាស់ទៅរដ្ឋធានីអេស្ប៉ាញ ។
មិនតែប៉ុណ្ណោះ ដោយនិយាយប្រាប់ទៅកាន់ SportBild ខ្សែប្រយុទ្ធវ័យ ២២ ឆ្នាំរូបនេះបានបង្ហើបថា ៖ “ Lucas Hernandez បានប្រាប់ខ្ញុំថាខ្ញុំគួរតែមកទីក្រុង Munich ដើម្បីលេងឱ្យ Bayern ។ Bayern គឺជាក្លឹបមួយក្នុងចំណោមក្លឹបល្អបំផុតទាំង ៥ នៅលើពិភពលោក។ រឿងមួយដែលយើងមិនរំលងពួកគេបាន គឺជាការរក្សាគុណភាពក្នុងក្រុមរបស់ពួកគេបានជារៀងរាល់ឆ្នាំ ។ ហើយពួកគេគ្រាន់តែដឹងពីអ្វីដែលពួកគេត្រូវធ្វើប៉ុណ្ណោះ ” ។
លើសពីនេះ Mbappe ក៏បានសង្កត់ធ្ងន់ទៅលើកុងត្រារបស់គេជាមួយក្រុម PSG ដែលខិតនឹងត្រូវបញ្ចប់ថា ៖ ” នៅក្នុងបាល់ទាត់អ្នកមិនដែលដឹងថានឹងមានអ្វីកើតឡើងនោះទេ ប៉ុន្តែបច្ចុប្បន្នខ្ញុំពិតជារីករាយខ្លាំងណាស់ ” ៕
ប្រភព: Goal
អានអត្ថបទបន្ទាប់៖ កីឡាករអង់គ្លេសកាន់កាប់តំណែងកំពូលតារាងកីឡាករថ្លៃបំផុត ខណៈ Mbappe នៅក្រៅ Top 10
ខ្សែបម្រើវ័យក្មេង Phil Foden របស់ក្លិប Manchester City ក្លាយជាកីឡាករដែលមានតម្លៃខ្ពស់បំផុត នេះបើយោងតាមរង្វាយតម្លៃរបស់ CIES Football Observatory។
CIES បានបង្ហាញបញ្ជីតម្លៃកីឡាករបាល់ទាត់ចុងក្រោយបង្អស់ក្នុងចំណោមក្លិបធំៗនៃលីគកំពូលទាំង៥នៅអឺរ៉ុប ខណៈ Foden ដែលទើបឈ្នះពានកីឡាករវ័យក្មេងប្រចាំឆ្នាំរបស់ PFA មានតម្លៃប្រមាណ ១៩០,២លានអឺរ៉ូ។
នៅក្នុងវ័យ២១ឆ្នាំ ខ្សែបម្រើជនជាតិអង់គ្លេសរូបនេះ បានសាងភាពលេចធ្លោសម្រាប់ Man City ដោយជួយពួកគេឈ្នះ Premier League និង League Cup ព្រមទាំងស្ថិតនៅក្នុងជម្រើស១១នាក់ប្រចាំរដូវកាលនៃលីគកំពូលអង់គ្លេសផងដែរ។
គេថែមទាំងរកគ្រាប់បាល់បាន៣គ្រាប់ និង assist ៣លើកនៅ UEFA Champions League ដែលជួយឱ្យក្រុមលោក Pep Guardiola ឈានដល់វគ្គផ្ដាច់ព្រ័ត្រពានអឺរ៉ុបមួយនេះ ប៉ុន្ដែត្រូវខកចិត្តដោយបរាជ័យក្រោមថ្វីជើង Chelsea ដោយលទ្ធផល ១-០។
ដោយឡែកខ្សែប្រយុទ្ធ Mason Greenwood របស់ Manchester United ស្ថិតនៅលេខរៀងទី២ មានតម្លៃ១៧៨លានអឺរ៉ូ តាមពីក្រោយដោយមិត្តរួមក្រុម Marcus Rashford ដែលឈរនៅលេខ៣ មានតម្លៃ១៥៥,៥លានអឺរ៉ូ។
កីឡាករវ័យក្មេងទាំងពីររូបនេះបានរួមចំណែកជួយ Man United ឡើងដល់វគ្គផ្ដាច់ព្រ័ត្រ UEFA Europa League តែត្រូវបរាជ័យ ក្រោមថ្វីជើង Villarreal ដោយការស៊ុតប៉េណាល់ទីកាត់សេចក្ដី។ Rashford ត្រូវបានកោះហៅចូលរួមក្រុមជម្រើសជាតិអង់គ្លេស ត្រៀមប្រកួត EURO ខណៈ Greenwood បានដកខ្លួនពីជម្រើសជាតិ ដោយសារបញ្ហារបួស។
ខ្សែប្រយុទ្ធ Erling Haaland ដែលរកគ្រាប់បាល់បាន៤១គ្រាប់សម្រាប់ Borussia Dortmund គ្រប់ពានរង្វាន់ក្នុងរដូវកាល ២០២០-២១ មានតម្លៃ ១៥៥,៥លានអឺរ៉ូ។ ខ្សែប្រយុទ្ធន័រវែសស្ថិតនៅក្នុងចំណាតថ្នាក់ទី៤ ប៉ុន្ដែគេឈរនៅកំពូលតារាង បើមិនគិតកីឡាករនៅ Premier League។
ដោយឡែកខ្សែបម្រើព័រទុយហ្កាល់ Bruno Fernandes របស់ក្រុមបិសាចក្រហម ទទួលបានចំណាត់ថ្នាក់លេខ៥មានតម្លៃ ១៥៤,៣លានអឺរ៉ូ។
ខ្សែបម្រើ Frankie de Jong(១៣៨,៧លានអឺរ៉ូ) និង Pedri(១៣៣,២លានអឺរ៉ូ) របស់ Barcelona ស្ថិតនៅលេខរៀងទី ៦ និង ទី៧ តាមពីក្រោយដោយ Alphanso Davies(១៣១,៦លានអឺរ៉ូ ) និង Joao Felix(១២៧,៨លានអឺរ៉ូ) ដែលនៅលេខរៀងទី៨ និង ទី៩។
រីឯម្ចាស់ពាន Champions League, Mason Mount របស់ Chelsea ឈរនៅចំណាត់ថ្នាក់លេខ១០ ខណៈ តារាឆ្នើមបារាំង Kylian Mbappe ធ្លាក់មកលេខ១២ មានតម្លៃតែ ១១៨,៣លានអឺរ៉ូប៉ុណ្ណោះ។ ចំណាត់ថ្នាក់ដ៏គួរឱ្យភ្ញាក់ផ្អើលរបស់ Mbappe អាចបណ្ដាលមកពីកត្តាសំខាន់ៗមួយចំនួន ហើយរឿងដែលសំខាន់ជាងគេនោះគឺ គេនៅសល់កិច្ចសន្យាជាមួយក្លិប Paris Saint-Germain តែមួយរដូវកាលទៀតប៉ុណ្ណោះ។
បច្ចុប្បន្នគេកំពុងចូលរួមជាមួយក្រុមជម្រើសជាតិបារាំង ក្នុងការចូលរួមព្រឹត្តិការណ៍ EURO 2020 ដែលនឹងធ្វើឡើងនៅប៉ុន្មានថ្ងៃខាងមុខនេះ ខណៈក្រុមដែលបង្វឹកដោយលោក Didier Deschamps ស្ថិតនៅក្នុងពូល F ដែលជាពូលមរ.ណៈ ជាមួយក្រុមការពារជើងឯកព័រទុយហ្កាល់ ក្រុមជើងឯក World Cup 2014 អាល្លឺម៉ង់ និង ក្រុមហុងគ្រី។
Ederson ជាអ្នកចាំទីថ្លៃជាងគេមានតម្លៃ ៦១,៩លានអឺរ៉ូ ខណៈមិត្តរួមក្រុម Man City, Ruben Diaz ជាខ្សែការពារថ្លៃបំផុត ពោលគឺ ១១៤,៤លានអឺរ៉ូ។
សូមបញ្ជាក់ថា តម្លៃរបស់កីឡាករត្រូវបានគណនាផ្អែកលើ អាយុ ទម្រង់លេង រយៈពេលនៃកុងត្រា តម្លៃសេដ្ឋកិច្ចរបស់ក្លិបដែលពួកគេកំពុងលេង និងកត្តាសំខាន់ៗមួយចំនួនផ្សេងទៀត៕
ប្រភព៖ BBC