Kylian Mbappe សព្វថ្ងៃកំពុងស្ថិតក្នុងការលេងឲ្យជម្រើសជាតិបារាំង ត្រៀមសម្រាប់ព្រឹត្តិការណ៍ Euro 2020 នាពេលខាងមុខ តែតាមការបញ្ជាក់មុននេះសាមីខ្លួនថាក្រោយចប់ Euro គេនឹងធ្វើការ Call ទៅគ្រូចាស់លោក Thomas Tuchel ដើម្បីអបអររឿងឈ្នះពាន Champions League។
ជាការពិត Tuchel បានដឹកនាំក្រុមពីរឡើងដល់វគ្គផ្តាច់ព្រ័ត្រ Champions League ផ្ទួនគ្នានៅពីរឆ្នាំចុងក្រោយ ហើយទើបតែមកជោគជ័យក្លាយជាក្រុមឈ្នះជើងឯកជាមួយ Chelsea កាលពីចុងខែឧសភាកន្លងទៅ។
ទៅមើលការយល់ឃើញរបស់អតីតកូនក្រុមគឺ Mbappe បានសរសើរថា Tuchel ជាគ្រូដែលពូកែរៀបក្បួនយុទ្ធសាស្រ្ត ហើយយល់ពីចិត្តគូស.ត្រូវជាងនរណាទាំងអស់។ ប្រាប់ Sport Bild បុរសវ័យ ២២ ឆ្នាំនិយាយ៖ “ក្រោយចប់ Euro ខ្ញុំនឹង Call ទៅគាត់ ព្រោះខ្ញុំមានទំនាក់ទំនងល្អខ្លាំងណាស់ជាមួយគាត់”។
Mbappe បន្ត៖ “គាត់ពូកែរៀបក្បួនយុទ្ធសាស្រ្តប្រកួត គាត់ដឹងច្បាស់ថាគូប្រជែងលើទីលាន នឹងបញ្ចេញសកម្មភាពមកបែបណា និយាយទៅគាត់ទស្សន៍ទាយត្រូវសឹងតែគ្រប់ការប្រកួត ហើយណាមួយគាត់នៅវ័យក្មេងដែរ អ៊ីចឹងគាត់នឹងអាចក្លាយជាគ្រូល្អបំផុតមួយក្នុងលោកនៅពេលអនាគត តួយ៉ាងគាត់ក៏បានសបង្ហាញមកហើយដែរនៅជ័យជម្នះ Champions League”។
គួរបញ្ជាក់ថា Tuchel មានវ័យ ៤៧ ឆ្នាំ ឆ្លងកាត់ការដឹកនាំ ៤៧៨ ប្រកួត លោកទទួលបានជ័យជម្នះ ២៧៦ ស្មើ ៨៥ និងចាញ់ ១១៧ លើក លោកដឹកនាំក្រុមរកបាន ៩៦៨ គ្រាប់និងរបូត ៥៣២ គ្រាប់។ ពានរង្វាន់ធំតូចទាំងក្នុងនិងក្រៅស្រុក បុរសសញ្ជាតិអាល្លឺម៉ង់លើកបានសរុបចំនួន ១០ ពាន៕
ប្រភព៖ Metro
អានអត្ថបទបន្ទាប់៖ មុនថ្ងៃ ១៥ កក្កដា Upamecano នៅតែជាកីឡាកររបស់ Leipzig បើ Bayern ចង់យកទៅ ត្រូវចាយថែមប៉ុណ្ណេះ
ដ្បិតការប្រកាសផ្លូវការបានបង្ហាញចេញមកហើយក៏ដោយ ពាក់ព័ន្ធនឹងការផ្ទេរ Dayot Upamecano ទៅចូលរួមនៅក្លឹប FC Bayern Munich ប៉ុន្តែការឈរជើងរបស់គេ នឹងមិនទាន់អាចប្រព្រឹត្តិទៅបានដូចការរំពឹងទុករបស់អ្នកគាំទ្រនោះឡើយ។
ជាការពិត កីឡាករដែលប្រកាសផ្ទេររួចរាល់ហើយ និងមានសិទ្ធទៅឈរជើងនៅក្លឹបថ្មីចាប់ពីថ្ងៃទី ១ កក្កដាតទៅ ប៉ុន្តែសម្រាប់ Upamecano ក្នុងកុងត្រារបស់គេគឺខុសពីកីឡាករមួយចំនួនផ្សេងទៀត ហើយគេត្រូវបង្គ្រប់ការឈរជើងឲ្យក្លឹបចាស់ RB Leipzig រយៈពេល ១៥ ថ្ងៃបន្ថែម។ នេះមានន័យនៅការហ្វឹកហាត់ត្រៀមបើករដូវកាលចាប់ពីថ្ងៃទី ១ កក្កដាតទៅនោះ ខ្សែការពារខាងលើនៅតែកម្តៅសាច់ដុំនៅ Leipzig ដដែល ហើយរង់ចាំរហូតដល់ថ្ងៃទី ១៥ កក្កដាទើបអាចសម្រេចទៅឈរជើងឲ្យ Bayern បាន។
យ៉ាងណាសម្រាប់ Bayern ក៏មានសិទ្ធពិសេសដូចគ្នា នោះប្រសិនគេប្រញា.ប់ចង់បានកីឡាករសញ្ជាតិបារាំង ចាប់ពីថ្ងៃទី ១ កក្កដាតទៅ នោះពួកគេត្រូវចំណាយពាក់កណ្ដាលនៃប្រាក់ពលកម្មរបស់ Upamecano ឲ្យទៅ Leipzig ពោលគឺប្រហែល ២០០ ០០០ អឺរ៉ូ។ ជុំវិញរឿងនេះគេជឿថា Bayern នឹងឲ្យពេលវេលាបញ្ចប់ទៅតាមសម្រួល ពោលពួកគេមិនតក់ក្រហ.ល់នោះទេ លើការនាំយក Upamecano មកក្លាយជាកីឡាករថ្មី។
រំឭកថា Bayern បានសម្រេចការនាំយក Upamecano ពី Leipzig នៅតម្លៃខ្លួន ៤២,៥ លានអឺរ៉ូ លើកុងត្រារយៈពេល ៥ ឆ្នាំ ហើយគេនឹងមកជំនួសតំណែងសំខាន់របស់ David Alaba ដែលទើបចាកចេញផ្ទេរទៅចូលរួមឲ្យ Real Madrid៕
ប្រភព៖ SportBible